1 Corinthians 2

Ahirani (आहिराणी नवा करार) - No Year

← Chapter 1 Jump to: Chapter 3 →

1ओ विश्वासी भावूसहोण, जव मी परमेश्वर ना गुप्त सत्यता ले आयकाळत तुमना जोळे उनू, त मोठ्या-मोठ्या गोष्टी आणि ज्ञान ना गोष्टीस्ना प्रचार नई करनू.

2कारण कि जव मी तुमना संगे होतु, त मनी पक्क करी लीयेल होत कि मी येशु ख्रिस्त आणि तेनी क्रूस नि मृत्यु ले सोळीसन आखो कोणतीच गोष्ट नई समजू.

3एनासाठे जव मी तुमना जोळे उनू, त मी दुर्बळता आणि भीती ना संगे, आणि गैरा थरथर कापत तुमना संगे ऱ्हायना.

4आणि मना विरुद्ध मा प्रचार करामा माणसस्ना ज्ञान ले पटाळणाऱ्या गोष्टी नई होत्यात, पण पवित्र आत्मा नि प्रमाणित कर कि मना संदेश मा सत्यता होती.

5एनासाठे तुमना विश्वास, माणसस्ना ज्ञान वर नई, पण परमेश्वर ना सामर्थ्य वर निर्भर होवो.

6तरी बी मी, ज्ञान ना संदेश त्या लोकस्ले आयकाळस ज्या आत्मिक रूप कण पक्का शेतस. पण हय ज्ञान नईत ह्या जग ना शे आणि नईत ह्या जग वर अधिकार करणारा त्या शासकस्ना ज्या नाश होणार शेतस.

7ज्या ज्ञान ना बारामा आमी सांगतस, तो ज्ञान परमेश्वर ना गुप्त ज्ञान होता. आते लगून एले कोणी समजू नई सकना. पृथ्वी ना निर्मिती ना पहिलेच, परमेश्वर नि हय निर्णय लीयेल होता कि तेनी बुद्धी ना द्वारे आमनी महिमा होवो.

8परमेश्वर नि हय योजना ले ह्या जग ना शासक नई समजू सकनात, कारण कि कदी समजतात, त तेजमय प्रभु ले क्रूस वर नई चळावतात.

9तरी बी जस पवित्र शास्त्र मा लिखेल शे, “जो कदी डोयास कण देखामा नई उना, जो कदी कानस कण आयकामा नई उना, आणि जो माणसस्ना हृदय मा नई उतरणा, ते सर्व परमेश्वर नि तेस्ना साठे तयार ठीयेल शे ज्या तेनावर प्रेम करतस.”

10पण परमेश्वर नि हय रहस्य आपली पवित्र आत्मा ना द्वारे प्रेषितस्वर प्रगट कर, कारण कि आत्मा ले सर्वा गोष्टी माहिती शेतस, व परमेश्वर ना रहस्यक योजनास्नी खोलाई ले बी तपासस.

11माणसस मधून कोलेच कोणता माणुस ना गोष्टी नई माहित कि तो काय विचार करस, पण फक्त त्याच माणुस नि आत्मा ले सर्व काही माहिती शे जे तेना मधमा शे. ह्याच प्रकारे, फक्त परमेश्वर नि आत्मा ले परमेश्वर ना गोष्टी माहिती शे.

12आमले जग नि आत्मा नई भेटणी, पण आमले ती आत्मा भेटेल शे, जी परमेश्वर कळून शे, एनासाठे कि आमी त्या गोष्टीस्ले समजोत, जी परमेश्वर नि आमले उदारपणा दियेल शे.

13एनासाठे, आमी माणुस ना ज्ञान ना द्वारे शिकाळेल गोष्टी नईत, पण परमेश्वर नि आत्मा ना शिकाळेल गोष्टीस्ले त्या लोकस्ले समजाळतस, ज्या आत्मिक शेतस.

14जेना जोळे परमेश्वर ना आत्मा नई शे तो परमेश्वर नि आत्मा नि शिक्षा ग्रहण नई करू सकत, कारण कि त्या तेनी नजर मा मूर्खता ना गोष्टी शेतस, आणि नईत त्या तेस्ले समजू सकतस कारण कि ती शिक्षा नि तपासणी आत्मिक रिती कण होस.

15त्या लोक जेस्ले पवित्र आत्मा भेटेल शे, त्या पवित्र आत्मा ना सर्वा शिक्षास्ले समजतस. पण ज्या माणुस जोळे आत्मा नई शे तो आत्मिक माणुस नि गोष्टीस्ले नई समजू सकत.

16जसा पवित्र शास्त्र सांगस, कि “कारण कि प्रभु ना मन कोण जानस, कि तेले सीखाळो?” पण आमना मा ख्रिस्त ना मन शे.

← Chapter 1 Jump to: Chapter 3 →