1 Corinthians 9

Ahirani (आहिराणी नवा करार) - No Year

← Chapter 8 Jump to: Chapter 10 →

1मनी जे काही करान ईच्छा शे ते करासाठे मी स्वतंत्र शे, मी प्रेषित शे, मनी आपला प्रभु येशु ले देखेल शे, तुमी मना काम ना प्रतीफय शेतस जो मनी प्रभु ना साठे करेल शे.

2कदी दुसरा लोक नई मानतस कि मी प्रभु येशु ना प्रेषित शे, पण तुमी लोक म्हणाले पाहिजे. कारण कि मीच शे जो तुमना लगून सुवार्ता ले लिसन उनू, प्रभु येशु ख्रिस्त वर तुमना विश्वास कण हय स्पष्ट हुई जास कि मी ख्रिस्त ना प्रेषित शे.

3ज्या लोक मनी प्रेषिताई ना अधिकार वर प्रश्न उचलतस, तेस्ना साठे मना हवूच उत्तर शे.

4बर्णबा आणि मले खावा-पिवाना अधिकार शे.

5आमले हवू अधिकार शे, कि आमी कोणी तरी ख्रिस्ती विश्वासीनी संगे लग्न करीसन तिले संगे लिसन फिरोत, जसा दुसरा प्रेषित आणि प्रभु ना भावू आणि केफा (पेत्र) करतस.

6काय मले आणि बर्णबा लेच जीवन जगाले काम कराले पाहिजे?

7एक सैनिक ले कदी बी आपला खर्च स्वता ले नई देन पळत. कोणी बी माणुस असा नई शे जो द्राक्षमया लावस आणि तीना मधला फय नई खावो, कोणी बी माणुस असा नई शे जो मेंढ्यास्नी राखोई करस आणि तेना दुध नई पिवाव.

8मी ह्या गोष्टी माणसस्ना रितीस्वर नई बोलत.

9मोशे ना नियम बी असाच सांगस, मोशे ना नियम मा लिखेल शे, “धान्य नि मळणी करतांना बईल ना तोंड वर मुकसा घालज्यात नका.” काय तुमी असा विचार करतस कि परमेश्वर फक्त बईलस्निच चिंता करस? नई.

10तो खास करीसन आमना साठे सांगस. हा, आमना साठेच लिखामा एयेल शे, कारण कि उचित शे, कि शेतकरी आशा कण वावर करस आणि जो नागरस तेले नागर कणच उत्पन्न ना भाग भेटानी आशा कराले पाहिजे.

11आमनी तुमना मधमा आत्मिक बीज पेर, एनासाठे हय कोणतीच मोठी गोष्ट नई शे, कि आमी तुमना पासून शारीरिक वस्तूस्ना पिक कापानि आशा ठेवूत.

12जव कि दुसरा लोक ज्या तुमना मधमा प्रचार करतस तेस्ले हवू अधिकार शे, त निश्चितच मले आणि बर्णबा ले बी हवू अधिकार शे. तरी बी आमनी कदीच तुमना वर जबरजस्ती नई करी तुमी आमले काही देवोत, पण सर्व काही सहन करतस, कि आमना द्वारे ख्रिस्त नि सुवार्ता नि काही रोक नई होवो.

13काय तुमले नई माहिती ज्या लोक मंदिर मा काम करतस तेस्ले आपली भाकर मंदिर मधून भेटस? हा, ज्या वेदी वर अर्पण करतस तेस्ले त्या अर्पण मधून हिस्सा भेटस.

14ह्याच प्रमाणे प्रभु नि बी ठराव, कि ज्या लोक सुवार्ता आयकाळतस, तेस्नी जीविका सुवार्ता आयकाळनारस कळून होवो.

15पण मनी एस्ना मधून एक बी अधिकार ना वापर नई करनू. मी हय एनासाठे नई लिखी ऱ्हायनु कि तुमी मनासाठे काही करोत, कदीच नई. एनातून त चांगल मनासाठे मरी जान शे. कारण कि कोणी बी ह्या गोष्ट वर गर्व करा पासून कोणी रोकु नई सकत कि मनी आपला ध्यान स्वता नि ठीयेल शे.

16कदी मी सुवार्ता आयकाळू, त एना कण मले गर्व करानी कोणतीच गोष्ट नई, कारण कि हय त मले सोपामा एयेल जबाबदारी शे. आणि कदी मी सुवार्ता ना प्रचार नई करत, त मनावर धिक्कार शे.

17कारण कि कदी आपली ईच्छा कण मी हय काम करस, त मजुरी मले भेटीन. आणि कदी हय काम मी आपली ईच्छा कण नई करत, तरी बी हय जबाबदारी मले परमेश्वर ना कळून सोपामा एयेल शे.

18त मंग मनी कोणती मजुरी शे? मनी कोणती मजुरी हय शे कि मी ख्रिस्त नि सुवार्ता फुकट मा प्रचार करू, जरी मले अधिकार शे कि तेना पासून मले उपजीविका भेटो.

19एना अर्थ हय शे, जरी लोक मले काही देतस तरी बी मी तेस्नी आदन्या मानाना साठे बांधायेल नई शे, तरी बी मी सर्वास्ना सेवक बनणु एनासाठे कि मी तेस्ले ख्रिस्त मा लई सकू.

20म्हणजे जव मी यहुदीस संगे होतु, त मी यहुदीस सारखा ऱ्हायनु, एनासाठे कि यहुदीस्ले ख्रिस्त मा लई सकू. जव मी मोशे ना नियमले मानणारस्ना संगे होतु, त मी बी मोशे ना नियम ना आधीन ऱ्हायनु, जरी मले मोशे ना नियमले मानानी गरज नई होती तरी बी मनी अस कर एनासाठे कि मी नियमले मानणारस्ले ख्रिस्त मा लई सकू.

21तसाच जव मी दुसरा जाती ना लोक संगे होतु, त मी दुसरा जाती ना लोकस सारखा ऱ्हायनु ज्या यहुदी मोशे ना नियम ना पालन नई करतस, एनासाठे कि तेस्ले ख्रिस्त मा लई सकू. एना अर्थ हय नई शे कि मी परमेश्वर ना आदन्यास्ना पालन नई करत, कारण कि मी प्रत्येक टाईम ख्रिस्त ना आदन्यास्ना पालन करस.

22जव तेस्ना संगे ज्या विश्वास मा कमजोर शेतस, त मी तेस्ना सारखा वागत होतु, एनासाठे कि मी ख्रिस्त ना अनुकरण करामा तेस्नी मदत करी सकू. मी सर्वा माणसस साठे सर्व काही बनेल शे, एनासाठे कि कोणत्यान-कोणत्या रिती कण काही लोकस्ना तारण कराई सकू.

23आणि मी सर्व काही ख्रिस्त नि सुवार्ता ना प्रचार साठे करस, एनासाठे कि मी दुसरास्ना संगे सुवार्ता ना आशीर्वादस्ना भागी हुई जाऊ.

24निश्चित तुमले माहिती शे कि गैरा स्पर्धक पयाले भाग लेतस, पण तेस्ना मधून एकलेच बक्षिश भेटस. तुमी बी असाच पया, कि बक्षिश प्राप्त करी सकोत.

25सर्वा स्पर्धक प्रत्येक गोष्टीस्मा संयम ठेवतस त्या नाशवान मुकुट ले प्राप्त करासाठे असा करतस, पण आमी असा मुकुट ले प्राप्त करासाठे हय करतस जो कदी नाश नई होवाव.

26एनासाठे मी एक निश्चित लक्ष समोर ठियसन पयस. मी एक असा मुष्ठयोद्धा शे जो हवा मा बुक्का नई मारत.

27मी आपली ईच्छास्ले वश मा ठेवस, एनासाठे कि अस नई हुई जावो कि मी जो दुसरास्ले सुवार्ता ना प्रचार करस, स्वताच त्या बक्षिश ले प्राप्त करा पासून अयोग्य ठरू.

← Chapter 8 Jump to: Chapter 10 →