1 Corinthians 11

Ahirani (आहिराणी नवा करार) - No Year

← Chapter 10 Jump to: Chapter 12 →

1तुमी मना अनुकरण करा, जसा मी ख्रिस्त ना अनुकरण करस.

2मी तुमनी प्रशंसा करत ऱ्हास, कारण कि तुमी मले प्रत्येक टाईम ले आठवण करत ऱ्हातस, आणि जी शिक्षा मनी तुमले दियेल शे, तेस्नी सावधानी कण पालन करी ऱ्हायनात.

3पण मनी ईच्छा शे कि तुमी एक गोष्ट समजी लेवोत, कि प्रत्येक माणुस ना डोक ख्रिस्त शे, प्रत्येक बाई ना डोक माणुस शे, आणि ख्रिस्त ना डोक परमेश्वर शे.

4एनासाठे जो माणुस, लोकस्ना मधमा डोक झाकीसन प्रार्थना करस व परमेश्वर ना संदेश सांगस तो ख्रिस्त ना अपमान करस.

5आणि जी बाई बिगर डोक झाकानी लोकस्ना मधमा प्रार्थना करस व परमेश्वर ना संदेश सांगस ती आपला नवरा ना अपमान करस. अशी बाई मा आणि डोक मुंडायेल बाई मा कोणताच फरक नई.

6कदी बाई पदर डोका वर नई लेस, त ती केस बी कापी लेवो, कदी बाई ना साठे केस कापण व डोक मुंडण करान लाज नि गोष्ट शे, त डोका वर पदर ठेवा.

7हा माणुस ले आपल डोक झाकान उचित नई शे, कारण कि माणुस परमेश्वर नि महिमा शे, आणि परमेश्वर नि आपलीच प्रतिमा मा बनावामा एयेल शे. पण बाई माणुस नि महिमा ले दर्शावस.

8कारण कि पहिला माणुस (आदाम) बाई पासून नई हुईना, पण पहिली बाई (हव्वा) माणुस पासून हुईनी.

9आणि परमेश्वर नि माणुस ले बाई नि मदत करासाठे नई निर्माण कर, पण तेनी बाई ले माणुस नि मदत साठे निर्माण कर.

10हय दाखाळा साठे बायास्ले आपला डोका वर पदर लेवाले पाहिजे कि ती आपला नवरा ना अधिकार ना आधीन मा शे, आणि एनासाठे बी कि स्वर्गदूत तीस्नावर नजर ठीयेल शेतस.

11तरी बी प्रभु ना विश्वासीस्मा बिगर बाई ना माणुस काहीच नई शे आणि नईत बिगर माणुस नि बाई काही शे.

12कारण कि ज्या प्रकारे बाई नि उत्पत्ती माणुस पासून हुयेल शे त्याच प्रकारे आते माणुस ना जल्म बाई पासून होस व पुरी सृष्टी नि उत्पत्ती परमेश्वर पासून शे.

13मनी ईच्छा शे कि तुमी स्वता ठरावोत, कि काय बाई ले लोकस समोर बिगर डोका वर पदर लिसन परमेश्वर ले प्रार्थना करान चांगले शे?

14काय स्वभाविक रिती कण बी तुमले नई माहिती, कि कदी माणुस लंबा केस ठेवस, त तेना साठे अपमान शे.

15पण कदी बाई लंबा केस ठेवस त तीना साठे शोभा शे, कारण केस तिले ओढणी साठे देवामा एयेल शे.

16पण कदी कोणी संगे सहमत नई शे, त हय समजो कि नईत आमना जोळे आणि नईत परमेश्वर नि मंडळीस्ना जोळे एले सोळीसन दुसरा कोणता रिवाज शे.

17त्या विषयस्ना बारामा जे मी सांगाले जाईऱ्हायनु, मी तुमनी प्रशंसा नई करत, एनासाठे कि तुमन एकत्र होवा कण चांगल नई, पण नुकसान होस.

18कारण कि पहिले त मी हय आयकस, कि जव तुमी स्तुती करासाठे मंडळी मा एकत्र होतस, त तुमना मा फुट होस आणि मी विश्वास करस कि तेस्ना सांगेल काही गोष्टी बरोबर शेतस.

19पण, निश्चित पणे, तुमना मधमा पक्षभेद राहाले पाहिजे एनासाठे कि तुमी लोकस्मा जेस्ना जोळे परमेश्वर नि मंजुरी शे, तेले वयखामा येवो.

20जव तुमी प्रभु येशु ख्रिस्त नि मृत्यु ले आठवण करासाठे एक जागा वर एकत्र होतस, त हय प्रभु-भोज लेवा साठे नई.

21कारण कि मले सांगामा एयेल शे कि तुमना मधून काही आपला जेवण दुसरास्ना संगे बिगर समिति ना लवकर खाई लेतस, ह्या मुळे, कोणी त भुक्या चालना जातस आणि काही पिसन झिंगणार हुई जास.

22तुमी आपला घरस्मा खावू आणि पिवू सकतस. तुमले वाटस कि परमेश्वर नि मंडळी महत्वानी नई शे, आणि तुमी त्या लोकस्ले लाजे घालतस ज्या गरीब शेतस. मी तुमले काय सांगू? काय मले तुमनी प्रशंसा कराले पाहिजे? मी अस करासाठे तुमनी प्रशंसा नई करत.

23जी शिक्षा मनी तुमले दियेल शे, हय तीच शिक्षा शे जी मले प्रभु पासून भेटेल होती, कि प्रभु येशु नि ज्या रात ले तेले धरावामा उन भाकर लीधी,

24आणि धन्यवाद करीसन मोळी, आणि सांग, “हय मना शरीर शे, जो तुमना साठे शे, मनी आठवण साठे हईच करत राहा.”

25त्या नंतर तेनी प्याला बी लीधा, आणि सांग, “हवू प्याला मना रक्त मा नवा करार शे, जव बी पिशात त मनी आठवण साठे हईच करत राहा.”

26कारण कि जव बी तुमी ह्या भाकर ले खातस, आणि ह्या प्याला मधून द्राक्षरस पीतस, त प्रभु नि मृत्यु ले जठ लगून तो नई ईजात, प्रचार करत राहा.

27एनासाठे जो कोणी अयोग्य रिती कण प्रभु नि भाकर खास, व तेना प्याला मधून द्राक्षरस पेस, त तो प्रभु ना शरीर ना आणि रक्त ना अपराधी ठरीन.

28एनासाठे माणुस पहिले आपला व्यवहार नि तपासणी करो आणि ह्याच प्रमाणे ह्या भाकर मधून खावो, आणि ह्या प्याला मधून द्राक्षरस पेवो.

29कदी कोणी प्रभु ना शरीर ना संगे आपला नाता ले बिगर वयखाना प्याला मधून पेस आणि भाकर खास, त तो ह्या खावा आणि पिवा कण स्वता वर दंड लयस.

30या मुळे पहिले पासूनच तुमना मधमा गैरा दुर्बळ आणि रोगी शेतस, आणि गैरा मरी बी ग्यात.

31एनासाठे कदी पहिले आमी स्वता नि तपासणी करतूत, त परमेश्वर पासून दंड नई भेटता.

32पण प्रभु आमना न्याय करस आणि आमले शिस्त लावस एनासाठे कि आखरी मा परमेश्वर ले जग ना बरोबर आमले दोषी ठरावन नई पळो.

33एनासाठे, ओ मना विश्वासी भावूसहोण, जव तुमी प्रभु-भोज खावा साठे एकत्र होतस, तर एक-दुसरा साठे थांबत जा एनासाठे कि सर्वास्ना संगे मियसन खाई सकोत.

34कदी कोणी भुक्या शे, त आपला घर मा खाई लेवो, एनासाठे कि जव तुमी एकत्र होतस, तव तुमी चांगल्या प्रकारे व्यवहार करश्यात आणि परमेश्वर तुमना न्याय नई कराव. बाकी गोष्टीस्ले जव मी एसू तव समजाळसू.

← Chapter 10 Jump to: Chapter 12 →