1 Corinthians 7

Ahirani (आहिराणी नवा करार) - No Year

1आते त्या प्रश्नस्ना विषय मा ज्या तुमनी आपला पत्रस्मा विचारेल शेतस, काय आमना साठे हय चांगल शे कि आमी लग्न नई करोत?

2पण व्यभिचार पासून वाचा साठे, मी सल्ला देस कि प्रत्येक माणुस लग्न करो आणि आपली नवरी संगे विश्वास योग्य राहो, आणि प्रत्येक बाई आपला नवरा संगे विश्वास योग्य राहो.

3नवरा होवा मुळे माणुस आपला कर्तव्यस्ले पुरा करो, तशीच बाई बी नवरी ना रूप मा आपला कर्तव्यस्ले पुरा करो.

4नवरीले आपला शरीर वर अधिकार नई पण तीना नवरा ना अधिकार शे, तसच नवराले बी आपला शरीर वर अधिकार नई, पण नवरीले शे.

5तुमी एक दुसरा पासून आल्लग नका राहा, पण काही टाईम साठे कि आपली सम्मती कण प्रार्थना ले संद्धी भेटो, आणि परत नवरा-नवरी ना सारखा एकत्र राहा, अस नई हुई जावो कि, तुमना संयम मुळे सैतान तुमले परखो.

6पण मी जो हय सांगी ऱ्हायनु ती आज्ञा नई पण सल्ला शे.

7मनी ईच्छा शे, कि जसा मी अविवाहित शे, तसाच सर्व माणस राहोत, पण प्रत्येक ले परमेश्वर ना कळून खास वरदान भेटेल शेतस, कोले परमेश्वर ना कळून विवाहित होवाना आणि कोले अविवाहित राहाणा वरदान भेटेल शे.

8पण मी अविवाहित आणि विधवास्ले हय सल्ला देस, कि तेस्ना साठे ना विषय मा सांगस कि एस्ना साठे अविवाहित राहाणच चांगल शे, जसा मी शे.

9पण कदी त्या आपल्या ईच्छास्वर नियंत्रण नई ठेवू सकतस त, तेस्ले लग्न करी लेवाले पाहिजे, कारण कि लग्न करान कामतर राहा पेक्षा चांगल शे.

10जेन लग्न हुईजाएल शे, तेस्ले मी नई, पण प्रभु येशु आदन्या देस, कि नवरी आपला नवराले फारकती नई देवो.

11आणि जर ती फारकती देस, त बिगर दुसरा लग्न नि राहो, किंवा आपला नवरा संगे समजोता करी लेवो, आणि नईत नवरा आपली नवरीले फारकती देवो.

12दुसरास्ले प्रभु नई, पण मीच सांगस, कदी कोणी विश्वासी भावू नि नवरी प्रभु येशु वर विश्वास नई करत आणि तेना संगे राहाले खुश शे, त तो विश्वासी भावू तिले फारकती नई देवो.

13आणि जी विश्वासी बाई ना नवरा प्रभु येशु वर विश्वास नई करत, आणि तीना संगे राहाले खुश हो, त ती विश्वासी बाई तेले फारकती नई देवो.

14कारण कि परमेश्वर अविश्वासी नवरा ना संगे आपला लोकस्ना सारखाच वागस, कारण कि तेनी नवरी ख्रिस्ती शे. तसाच परमेश्वर अविश्वासी नवरी ना संगे आपला लोकस सारखाच वागस, कारण कि तीना नवरा ख्रिस्ती शे. कदी अस नई होत त तुमना पोर-सोर अशुद्ध होतात, पण आते त पवित्र शेतस.

15पण जो माणुस विश्वास नई करत, कदी तो फारकती देस त तेले दिवू ह्या, अशी स्थिती मा कोणी बी विश्वासी नवरा व नवरी लग्न ना बंधन पासून मुक्त शेतस, कारण कि परमेश्वर नि त आमले शांती कण जीवन जगाले बलायेल शे.

16ओ नवरीसहोण, आठवण ठेवा कि तुमना मुळे तुमना नवरा ना तारण होवू सकस. तसाच नवरासहोण, आठवण ठेवा कि तुमना मुळे तुमनी नवरीस्ना तारण होवू सकस.

17जे मी सांगी ऱ्हायनु तेना सार हवू शे, कि प्रत्येक व्यक्ती ले त्या स्थिती मा राहाले पाहिजे जेनामा प्रभु नि तेले ठीयेल शे, हय तीच स्थिती शे, जेना कण तुमी परमेश्वर ना लोक होवा साठे बलावामा एयेल शेतस. आणि मी प्रत्येक ख्रिस्ती मंडळी ले असच कराले सांगस.

18कदी कोणी सुंता करेल माणुस प्रभु येशु वर विश्वास करस, त तेले आपला सुंता नि निशाणी ले लपाळानी गरज नई शे. तसाच कदी कोणी बिगर सुंता ना माणुस प्रभु येशु वर विश्वास करस, त तेले सुंता करानी गरज नई.

19कारण कि भले माणुस सुंता करेल राहो कि बिगर सुंता ना राहो तेना कण काहीच फरक नई पळत, परमेश्वर नि आदन्यास्नाच पालन करान महत्वान शे.

20प्रत्येक झन त्याच दशा मा राहो, ज्या दशा मा तेले बलावामा एयेल शे.

21जर तू ख्रिस्त येशु वर विश्वास करतांना दास नि दशा मा होता, त निराश नको हुईजो, पण कदी तुले स्वतंत्र होवानी संद्धी भेटस, त त्या संद्धी ना फायदा उचल जो.

22कारण कि जेले दास नि दशा मा बलावामा एयेल होत, तेले प्रभु येशु ना द्वारे स्वतंत्र करामा एयेल शे आणि तसाच जेले स्वतंत्र नि दशा मा बलावामा एयेल शे, तो ख्रिस्त ना दास शे.

23परमेश्वर नि तुमले मोठा दाम दिसन विकत लीयेल शे, एनासाठे माणसस्ना दास नका बना, पण परमेश्वर ना दास बना.

24ओ विश्वासी भावूसहोण, जी दशा मा तुमनी परमेश्वर ले स्वीकार कर, तीच दशा मा तेना संगे संगतीमा सदा राहा.

25कुवारीस्ना विषय मा प्रभु नि काही आदन्या मले नई भेटणी, पण विश्वास योग्य होवा साठे जशी दया प्रभु नि मनावर करेल शे, तेनाच नुसार मी तुमले सल्ला देस.

26कारण कि ह्या दिनस्मा विश्वासीस्ना प्रत्येक जागास्वर छळ हुई ऱ्हायना, एनासाठे मना सल्ला शे कि बिगर लग्न ना लोक बिगर लग्न नाच राहोत.

27जर तू विवाहित शे, त विवाह मा बनेल ऱ्हाय. आणि कदी तू बिगर लग्न ना शे, त लग्न नको करू.

28पण तू लग्न करस, त तुमी कोणता पाप नई कर, आणि कदी कोणती कुवारी पोर लग्न करस त तिनी कोणता पाप नई कर. पण लग्न करेल लोक ह्या जग मा दुख सहन करतीन, आणि मनी ईच्छा शे कि तुमी असा संकटस पासून वाचोत.

29ओ विश्वासी भावूसहोण, मनी हय सांगानी ईच्छा शे कि ख्रिस्त ले परत येवामा आते जास्त टाईम ऱ्हायेल नई शे. ह्या मुळे, कदी तुमना जोळे बायको राहो कि नई राहो एनी जास्त चिंता नका करा, पण परमेश्वर नि सेवा करासाठे विचार करत राहा.

30ज्या रळनारा, खुशी साजरा करणारा आणि विकत लेणारा शेतस, तेस्ले ह्या सर्वा गोष्टीस्ना बारामा जास्त चिंता नको कराले पाहिजे.

31आणि जे काही ह्या जग मा आमना जोळे शे, आणि तेस्ले गैरा जास्त महत्वान नई समजा ले पाहिजे. कारण कि जे काही ह्या जगन शे ते चालन जाईन.

32मनी ईच्छा हय शे कि तुमी संसारिक जीवन ना वासनास पासून मुक्त राहोत बिगर लग्न ना माणुस ह्या गोष्ट नि चिंतामा ऱ्हास कि प्रभु नि सेवा कशी करू आणि कसा तेले खुश ठेवू.

33पण लग्न करेल माणुस जग ना गोष्टीस्नी चिंतामा ऱ्हास, कि आपली बायको ले कोणत्या प्रकारे खुश ठेवू.

34एनासाठे दोन गोष्टी शेतस जेना बारामा तो विचार करस, कि तो कसा परमेश्वर ले खुश ठेवू आणि कसा आपली बायको ले खुश ठेवू. लग्न करेल आणि लग्न नई करेल मा बी फरक शे. बिगर लग्न नि आणि कुवारी बाई प्रभु नि सेवा नि चिंतामा ऱ्हास, एनासाठे कि ती शरीर आणि आत्मा मा पवित्र राहो, पण लग्न करेल बाई संसार नि जबाबदारीस्नि चिंतास्मा ऱ्हास, कि आपला नवराले खुश ठेवो.

35मी हय गोष्ट तुमनाच चांगला साठे सांगस, नई कि मी तुमना वर कोणता जबरजस्ती कराना देखस. पण मनी ईच्छा शे कि तुमी ते करा जे बरोबर आणि चांगल शे, आणि एक चित्त हुईसन पूर्णपणे परमेश्वर नि सेवामा लागेल राहा.

36कदी कोले हय वाटस कि तो आपली पोर ना लग्न ना साठे उशीर कराना द्वारे तीना संगे अन्याय करी ऱ्हायना, कारण कि तिनी वय चालनी जाई ऱ्हायनी, त तो तेच करो, जे तो चांगल समजस तो तिले लग्न करू देवो. हय कोणता पाप नई शे.

37पण कदी कोणी मन मा निर्णय लेस, कि तेनी पोर ना लग्न नई करान चांगल शे आणि महत्वान नई शे, आणि तो आपला ईच्छास्ले नियंत्रण मा लयु सकस, त तो तेना लग्न नई कराईसन चांगल करस.

38त जो आपली कुवारी पोर न लग्न करी देस, तो चांगल करस, आणि जो आपली कुवारी पोर ना लग्न नई करी देत तो बी चांगल करस.

39जठ लगून कोणती बाई ना नवरा जित्ता ऱ्हास, तठ लगून ती तेना संगे विवाहिक संबंध मा बांधायेल शे, पण जव तीना नवरा मरी जास, त जेना कण तिनी ईच्छा शे लग्न करू सकस, पण तेनाच संगे जी ख्रिस्ती विश्वासी शे.

40पण जर ती बिगर लग्न नि राहो, त मना विचार कण ती आखो बी सुखी राहीन. आणि मी समजस, कि जे मी सांगी ऱ्हायनु ते परमेश्वर नि आत्मा नि प्रेरणा ना द्वारे सांगी ऱ्हायनु.

← Chapter 6 Jump to: Chapter 8 →