Revelation 11

Edo ((E Baibol Ẹdo) Version 1996)

← Chapter 10 Jump to: Chapter 12 →

1Iyeke ọnii, iran keghi rhie erhan ne a ya mwa emwi yọ mwẹ obọ, iran tama mwẹ wẹẹ, “Gha khian ya mwa Ọgua Osa ọghe Osanobua kevbe Ogiukpo ni rrọọ, u ghi vbe ka avbe emwa ni ga vbe uwu Ọgua Osa nii.

2Sokpan ghẹ ka iran ni rre iba ore yọ. Ghẹ mwa iran, rhunmwuda, a zẹ iran obọ ne iran ni ma yayi nẹ, iran ni gha do gbe ọgọlọbọ vbe uwu Ẹvbo Ne Ọ Huanrẹn la uki eva yan iyeva.

3Mẹ gha gie avbe osẹe mwẹ eva, ni yọ ukpọn ẹkpo ivin, iran ghi vbe ya gha kpe orhu ẹmwẹ Osanobua vbe uwu ikpẹdẹ iyeha yan uri yan arriaisẹn nii (1,260).”

4Avbe osẹe eva na ọrọre avbe erhan ohọ kevbe ukpa eva ni mudia vbe odaro e Nọyan agbọn.

5A deghẹ ọmwaikọmwa te ho ne ọ ru iran emwi, erhẹn ghi ke uwu unu iran ladian, ọ ghi giẹn eghian iran uan. Vberriọ zẹẹ ọre a gha ya gha gbele iran uan ighẹ iran ni te ho ne iran kuan iran.

6Iran mwẹ asẹ ne iran gha ya khui iso, ne amẹ ghẹ rhọ vbe uwu ẹghẹ ne iran ya kpe orhu ẹmwẹ Osanobua. Debare, iran vbe mwẹ asẹ vbe uhunmwu avbe uhunmwu ẹzẹ, ne iran ya fi iran werriẹ khian esagiẹn, iran vbe mwẹ asẹ ne iran ya si egboghogbogho fi agbọn inugba ne ọ rhirhi khọn iran.

7Iran ghẹ ghi kpe orhu ẹmwẹ Osanobua fo nẹ, aranmwẹ oha ne ọ ke uwu uvun ne ẹ i mwẹ ehe ne ọ sẹe nii ladian ghi do gu iran gbinna, obọ ẹre gha ke ukhumwu ne ọghe iran, ọ ghi gbele iran uan.

8Ikun iran ghi vbe gha rre adesẹ ẹvbo nọkhua nii, ehe ne a na kan Nọyan iran mu ugbugbe. Eni oro ne a mu ne ẹvbo ni ọrọre Sọdom ra Igipt.

9Emwa ni ke dọmwadẹ uhunmwu agbọn ẹvbo rre kevbe ẹwae, ẹvbo ne a zẹ kevbe iyaẹvbo, ghi ya ikpẹdẹ eha vbe ukhiọnmwẹ gha ghe ikun iran, iran i kue ne a re iran.

10Ẹko gha rhiẹnrhiẹn emwa ne agbọn ye uwu ne iran eva na wulo. Iran ghi do ugie ẹre, iran ghi gha ya emwi ha oko gie egbe, rhunmwuda, akhasẹ eva na, oya ne iran si ye emwa ne agbọn egbe keghi bu ẹsẹse.

11Vbe iyeke ikpẹdẹ eha vbe ukhiọnmwẹ, uhiọnrọnmwẹ ne ọ rhie arrọọ ne ọmwa ke ehe ne Osanobua ye rre la uwu iran, iran keghi kpaegbe mudia, orrirri keghi gbe ku emwa hia ni miẹn iran.

12Avbe akhasẹ eva na keghi họn urhu nọkhua ọkpa, ne ọ ke ẹrinmwi rre gha gu iran guan wẹ, “Wa hin odukhunmwu gha die edinran.” Vbene avbe eghian wa ghe iran nii, iran keghi lele ikpakpaiso hin odukhunmwu gha rrie ẹrinmwi.

13Vbe ẹghẹ ọkpa nii zẹẹ, igbohiotọ ọhanabe ọkpa keghi sunu, obọ ọkpa vbe a wa ẹvbo nii ye ihe igbe keghi wa rẹnkhẹn uan, emwa ni wu ye nene igbohiotọ na, kegha re arriaisẹn ihinrọn (7,000.) Ohan keghi kakabọ mu emwa ni dekẹe, iran keghi tian ukpọlọmwẹ Osanobua ọghe ẹrinmwi.

14Ugborrirri ne okaro gberra nẹ, sokpan ghee! Te ugborrirri ne ogieha ghi ra rre.

15Odibosa ne ogihinrọn keghi fian okpe ọghọe re, a keghi họn urhu ni vannọ vbe ẹrinmwi kha wẹẹ, “Ẹtin ne a ya khaemwisẹ yan agbọn na, Nọyaẹnmwa kevbe Mẹzaia ẹre, ọre ọ ghi yan rẹn nian, ọ gha vbe gha khaemwisẹ ẹdẹ kevbe ẹdẹdẹmwẹdẹ.”

16Avbe ediọn enẹyanugie, ni tota ye ẹkete iran vbe odaro Osanobua, keghi dele viọ aro iran rhu otọ, iran ya uhunmwu rhanmwẹ otọ ne Osanobua.

17Iran wẹẹ: “Nọyaẹnmwa Osanobua Noghodua, ọmwa ne ọ rrọọ na, kevbe ne ọ ka gha rrọọ, ma kpọnmwẹ ọn ne u na ya ẹtin nọkhua ruẹ, suẹn gha khaemwisẹ nian.

18Okuosu keghi yi iran ne ni ma yayi, rhunmwuda ọsẹ ẹghẹ ne ohu ruẹ gha ya rre, ne a do bu ohiẹn iran ni wulo nẹ. Ẹghẹ sẹe ne a gha ya san, avbe akhasẹ ne eguọmwadia ruẹ ẹse, ke avbe emwa ruẹn, ni mu ohan ruẹn, ni kpọlọ kevbe ni kanmwa. Ẹghẹ sẹe ne a ya fuẹn iran an ighẹ iran ni fuẹn agbọn uan.”

19A keghi kie Ọgua Osa ye otọ vbe ẹrinmwi. A keghi bẹghe ẹkpẹti osẹe ne a viọ uhanhan ọghe uhi nii yi. Ayan kegha yan rhai rhai deba owogho, ke uvannọmwẹ avan nukhunmwu, kevbe igbohiotọ, kevbe esia ne ọ kakabọ de.

← Chapter 10 Jump to: Chapter 12 →