Revelation 5

Edo ((E Baibol Ẹdo) Version 1996)

← Chapter 4 Jump to: Chapter 6 →

1I keghi bẹghe ebe ne a kiri ọkpa vbe obọ erha ọmwa ọmwa ne ọ tota ye uhunmwu ẹkete, a keghi wa gbẹnnẹ emwi vuọn rẹn obọ eva, a keghi ye emwi gba ẹe kugbe vbe ihe ihinrọn.

2I keghi bẹghe odibosa nọkhua ọkpa ne ọ wa gha ye urhu ne ọ la kha wẹẹ, “Gha ọ sẹ ihe ẹre, ne ọ gha fian emwi ne a ya gba ẹe na, ne ọ vbe rhan ebe ne a kiri na?”

3Sokpan a ma miẹn ọmwa rhọkpa ne ọ si ihe vbe ẹrinmwi, ra vbe agbọn, ra vbe agbọn ne ọ rre ototọ, ne ọ gha sẹtin rhan ebe ne a kiri na, ne ọ vbe ghe uwu ẹre.

4I keghi viẹ egbe viẹ ẹhi rhunmwuda, a ma miẹn ne ọ sẹe ne ọ rhan ebe ni ne a kiri, ne ọ vbe ghe uwu ẹre

5Ẹghẹ nii ọre ọkpa vbe uwu avbe ediọn nii na khama mwẹ wẹ, “Ghẹ ghi viẹ! Ghe oduma ne ọ ke uniẹn Juda rre, ọmọ nọkhua ne ovbi uniẹn Devid, khọn miotọ nẹ, ọ gha rhan emwi ne a ya gha ẹe ihinrọn nii, ọ ghi vbe rhan ebe nii, ne a kiri.”

6I keghi bẹghe Oteghe Ohuan ọkpa, ọ mudia ye adesẹneva ọghe ẹkete, emwi ne a yi ni ma he wu enẹ nii, kevbe avbe ediọn, keghi lẹga ẹre. Oteghe Ohuan nii keghi ye vbe ne a miẹn wẹ a gbe ẹe ua nẹ. Ọ kegha mwẹ igho ihinrọn kevbe aro ihinrọn, ena kegha re orhiọn ihinrọn ọghe Osanobua, ne a gie nẹ, gha rrie otọ agbọn hia.

7Oteghe Ohuan nii keghi bu ọmwa ne ọ tota vbe uhunmwu ẹkete nii gha khian, ọ keghi miẹn re ebe ne a kiri nii ne ọ rre ọre obọ erha ọmwa.

8Ugbẹn vbe ọ ghi wa ru vberriọ nẹ, avbe emwi ne a yi ni ma wu nii, kevbe ediọn eneyanugie nii keghi dele gbe otọ vbe odaro Oteghe Ohuan nii. Ọkpọkpa vbe uwu iran kegha mwẹ akpata kevbe avbe ọkpan igoru ne a ye eturari vuọn, ena ni re erhunmwu emwa Osanobua.

9Iran keghi so ihuan ọgbọn: “U sẹe ne ọ gha rhie ebe ne a kiri ni. Kevbe ne u giagia emwi ne a ya gbalọ ẹe rhunmwuda, a te gbe ua nẹ, u keghi ye uwu ruẹ dẹlẹ emwa ne agbọn gie Osanobua.

10U ya uniẹn hia, ẹvbo ne a zẹ, emwa kevbe agbọn ẹvbo, ru arriọba avbe ohẹn, ne iran gha ga Osanobua mwa. Iran gha vbe khaemwisẹ vbe agbọn.”

11I keghi dọlegbe tọn aro mu ghe iran, I keghi họn ẹmwẹ avbe odibosa arriaisẹn igbe. Iran mudia lẹga ẹkete kevbe avbe emwi ne a yi ni ma wu enẹ nii, kevbe avbe ediọn nii.

12Iran keghi ya urhu le ọ la so ihuan wẹẹ: “Oteghe Ohuan ne a te gbe ua sẹe, Ne ọ gha miẹn asẹ ẹfe, ẹwaẹn kevbe ẹtin. Uyi, ọghọ kevbe urhomwẹ!”

13I keghi họn vbe emwi na e yi hia ni rre ẹrinmwi, kevbe agbọn, kevbe agbọn vbe ototọ, kevbe avbe emwi ne a yi hia ni rre okun, avbe emwi ne a yi hia ni rre ideghedeghe aro iso ehia kegha so ihuan wẹẹ: “Ọmwa ne ọ tota vbe ẹkete kevbe Oteghe Ohuan, ọre urhomwẹ, uyi, ọghọ kevbe ẹtin, gha rrọọ na, ẹdẹ kevbe ẹdẹdẹmwẹdẹ.”

14Emwi ne a yi ni ma wu enẹ nii keghi wanniẹn wẹẹ, “Isẹ!” Avbe ediọn nii keghi dele gbe otọ, iran ya uhunmwu rhanmwẹ otọ.

← Chapter 4 Jump to: Chapter 6 →