Revelation 3

Edo ((E Baibol Ẹdo) Version 1996)

← Chapter 2 Jump to: Chapter 4 →

1“Gbẹn ebe gie odibosa esọsi ne ọ rre Sadis wẹ: “Uhunmwu ne ọ gie rre ọ na khin ighẹ ọmwa ne ọ mwẹ Orhiọn Ihinrọn ọghe Osanobua kevbe avbe orhọnmwẹ ihinrọn. I rẹn emwi ne u ru: I rẹnrẹn ighẹ te a wa kpe ọbọbọ nuẹn ighẹ u rre agbọn, vberriọ, u wu nẹ.

2Rhunmwuda ọnii nian, rhiọrre ne u gbe avbe emwi ne u ghi mwẹ igiẹ, ne ọ ghẹ wa ya wu fo fẹẹrẹ. Rhunmwuda, I miẹn wẹ, emwi ne u he ru, ma he gba vbe odaro Osanobua mwẹ.

3Rhunmwuda ọnii, ye emwi ne a ma ruẹn re rre, kevbe vbene uwẹ họẹn hẹ, ya ẹe gha ru emwi, ne u fiwerriẹ hin orukhọ ruẹ rre. A deghẹ u ma rhiọrre, I gha fan rhuẹ zẹ vbe oyi, u i ra vbe rẹn ẹghẹ ne I gha ya rre.

4Sokpan ihozẹghẹ eso rre uwu uwa vbe Sadis ni ma ya iruẹn ye ukpọn iran. Wa gha lele mwẹ khian, a ghi yọ uwa ẹwu nọfua rhunmwuda wa sẹe ne ọ gha ru vberriọ.

5Iran ni khọnmiotọ nẹ, erriọ ọre a ra yọ iran ukpọn nọ fua. Mẹ i ra vbe khiẹn eni iran hin ebe emwa ni ma wu rre. Vbe odaro Erha mwẹ kevbe avbe odibo ẹre, I ghi miẹn kue wẹ emwa mwẹ ọre iran khin.

6“A deghẹ u mwẹ ehọ, u ghi danmwehọ ẹmwẹ ne Orhiọn tama avbe esọsi.

7“Gbẹn ebe gie odibosa esọsi ne ọ rre Filadẹlfia wẹ: “Uhunmwu ne ọ gie rre ọ na khin ighẹ ọmwa ne ọ re ọmwata kevbe ne ọ huanrẹn, ọmwa ne ọ rhie isahẹn Devid mwẹ, ọmwa ne ọ gha kie nẹ, a i miẹn ne ọ khui, ọ gha khui, a i miẹn ne ọ kie.

8I rẹn emwi ne u ru, I rẹnrẹn i ghẹ ẹtin kherhe ọ re u mwẹ, u wa rhie ekhọe lele emwi ne I ma ruẹn re, u keghi wa vbe rhie egbe mu mwẹ. I kie urho ọkpa ye otọ nuẹn, ọmwa ne ọ gha sẹtin khui ẹre, ẹ i rrọọ.

9U ghi danmwehọ. U ma miẹn avbe otu nii, ni re ọghe Setan, avbe ọhọn ohoghe ni, ni tie egbe iran e Ju vberriọ iran i re ọre, I gha ru ẹe ne iran bu ruẹ gha dee ne iran do mu ẹko rhu otọ, ne iran vbe ya uhunmwu rhanmwẹ otọ nuẹn. Iran hia gha rẹn ighe I ho ẹmwẹ ruẹn.

10Rhunmwuda ighẹ u rhie iyi ne I yi ne uwa, wẹ ne uwa ziengbe, mẹ gha vbe rhie ruẹ lẹre vbe ne a i na mwẹ ẹbe hin obọ ẹghẹ ọlọghọmwa, ne ọ ra do hihiẹ yan uhunmwu otọ agbọn hia, ne a ya danmwẹ emwa hia ni rre agbọn ghe.

11I dee ẹgiẹgiẹ. Emwi ne ọ gu uẹ, dae yi mwẹ gbain ne ọmwaikọmwa ghẹ ya gbe uẹ miẹn ruẹn igho ọmẹguae ne a se yuẹ obọ.

12Ọmwa ne ọ khọn miẹn otọ, I gha ya ẹe ru orre vbe Ọgua Osa ọghe Osanobua mwẹ, ẹ i ghi vbe kpao vbe evba ẹdẹ. I ghi gbẹn eni Osanobua mwẹ yan rẹn, Jerusalẹm ne ọgbọn ne ogha ke obọ Osanobua mwẹ ke odukhunmwu tuorre gha di otọ. I gha vbe gbẹn eni mwẹ ne ọgbọn yan rẹn.

13“A deghẹ u mwẹ ehọ khekherriọ, danmwehọ ẹmwẹ ne Orhiọn tama avbe esọsi.

14“Gbẹn ebe gie odibosa ne ọ rre Laodisia wẹ: “Uhunmwu ne ọ gie rre ọ na khin ighẹ Isẹ, osẹe ẹmwata, kevbe ọghe uhunmwu ẹmwẹ, ọmwa ne ọre ehe ne emwi hia ne Osanobua yi ke rre.

15I rẹn emwi ne u ru nẹ, I rẹnrẹn wẹ, u i mwẹ Ọghae, u ma furre. Vbe ọ rrọọ nian akpawẹ te u mwẹ ọghae ra te u furre!

16Sokpan rhunmwuda ighẹ tu u ye rẹghẹrẹghẹ, u i mwẹ oghae, u ma furre, te I ghi ra tu uẹ fua vbe unu mwẹ na.

17U khare wẹ, ‘I fe nẹ, obọ gue mwẹ, emwi ne I ho gba mẹ.’ Sokpan, u ma rẹn ighẹ agbọn ọrhiae ne a gbe ọsọre na, ọre u ye. Ovbiogue ọre u khin, te u bannọ uan, te u rhu aro.

18Rhunmwuda ọnii, I gu uẹ zẹ iro nian ne u do gun mwẹ dẹ igoru, igoru ne a ma gua, ne u miẹn ehe na fe. Vbe dẹ ogbọnmwọkpa ya gha mu egbe, ne u rhuan ẹn gue irhunmwirhun efaa ne u ye. U ghi vbe dẹ ukhunmwu eso gha ya ye aro, ne u miẹn ehe na gha dẹghe.

19Ọmwa ne I ho ẹmwẹ ọnrẹn ọre I gu gui, ọre I vbe gbe hin ọkhọ rre. Mu aro yọ khekherriọ, ne u fiwerriẹ hin orukhọ ruẹ rre.

20Dọ re! I mudia ye onurho gha so obọ, a deghẹ ọmwaikọmwa ghi họn, ọ na kie ẹre mẹ, I gha bu ẹre la owa, I ghi gu ẹe rri evbare, rẹn ghi vbe gun mwẹ rri evbare.

21Iran ni khọnmiotọ, I gha rhie asẹ ne iran, ne iran tota ke mwẹ vbe ẹkete mwẹ, zẹe vbene imẹ khọnmiotọ, ne I na vbe tota ke Erha mwẹ nian vbe ẹkete ẹre.

22“Adeghẹ u mwẹ ehọ danmwehọ ẹmwẹ ne Orhiọn tama avbe esọsi.”

← Chapter 2 Jump to: Chapter 4 →