Revelation 15

Edo ((E Baibol Ẹdo) Version 1996)

← Chapter 14 Jump to: Chapter 16 →

1Iyeke ọnii, I keghi do bẹghe ama ọvbehe nọkhua kevbe ne ọ mu ọmwa ohan vbe ẹrinmwi, avbe odibosa ihinrọn ne egboghogbogho ihinrọn guẹ, ena ọrọre egboghogbogho ne okiekie, rhunmwuda iran ọrọre enokiekie vbe avbe odẹ ne Osanobua ya rhie izohu ẹre maa.

2I keghi vbe ya bẹghe emwi ne ọ ye vbe ẹzẹ ne ughegbe ne a ya erhẹn zẹguagua, I keghi vbe bẹghe iran ni khọnmiotọ nẹ vbe egbe aranmwẹ oha nii, kevbe amazẹ nii kevbe egbe ọmwa ne a ya olaba gbẹn eni ẹnrẹn. Iran keghi mudia ye ọkpẹn ẹzẹ ne ughegbe nii, iran keghi viọ akpata ne Osanobua viọ ne iran mwẹ obọ.

3Iran kegha so ihuan e Mosis ne ọguọmwadia Osanobua kevbe ihuan ọghe Oteghe Ohuan nii. “Nọyaẹnmwa Osanobua ne Oghodua, ne ọ kpọlọ kevbe ne ọ yan ọmwa unu ọre avbe iwinna obọ ruẹ khin. Ọba avbe agbọn ẹvbo hia, ne ọ gbae kevbe ne ọ re uhunmwu ẹmwẹ ọre odẹ ruẹ hia khin.

4Nọyaẹnmwa, de ọmwa ne ẹ i ra mu ohan ruẹn? De ọmwa ne ẹ i ra kha ighẹ ne ọ kpọlọ wẹ khin? Rhunmwuda, wẹ ọkpa kẹkan ọre ọ huanrẹn. Agbọn ẹvbo hia gha rre, iran ghi do ya uhunmwu rhanmwẹ otọ vbe odaro ruẹ. Rhunmwuda, iran hia miẹn uyinmwẹ ẹmwata ruẹ.”

5Vbe iyeke ọna, I keghi ya bẹghe vbe a kie urho Ọgua Osa ye otọ vbe ẹrinmwi, owa ne a ya ukpọn bọ, ọghe ne a ya rẹn ighẹ Osanobua rre evba, kegha rre uwu ẹre.

6Avbe odibosa ihinrọn ne ọ viọ egboghogbogho ne ihinrọn ni kiekie mwẹ, keghi ke uwu ọgua Osa ladian, iran keghi ye eto ovbiohuẹ ni huanrẹn ni fua kokoko haan. Iran mu ukugba igoru gba ẹwẹe.

7Ẹghẹ nii, ọkpa vbe uwu avbe emwi ne a yi ni ma wu nii, keghi viọ ọkpan igoru ihinrọn ne ọ vuọn ne izohu Osanobua ne ọ rrọọ ẹdẹdẹmwẹdẹ, ne avbe odibosa nii.

8Ighogho ọghe uyi kevbe ẹtin Osanobua keghi wa gba Ọgua Osa nii, a ma miẹn ọmwa ne ọ sẹtin la uwu Ọgua Osa, ọ te do sẹ ẹghẹ ne ọ ya fo vbe otọ ighẹ avbe egboghogbogho nii ne avbe odibosa ihinrọn ni viọ rre.

← Chapter 14 Jump to: Chapter 16 →