Revelation 13

Edo ((E Baibol Ẹdo) Version 1996)

← Chapter 12 Jump to: Chapter 14 →

1Iyeke ọnii, I keghi ya bẹghe aranmwẹ oha ọkpa vbe ọ ke uwe okun ladian dee, ọ keghi mwẹ igho igbe kevbe uhunmwu ihinrọn. Ẹdẹ keghi rre ọkpọkpa vbe uwu avbe igho na, a keghi gbẹn eni uyinmwẹ dan ye ọre uhunmwu.

2Aranmwẹ oha ne I bẹghe keghi ye vbe ubidọn. Owẹ ọre keghi ye vbe ọ ghe akpakomiza, unu ẹnrẹn keghi ye vbe ọghe oduma. Ugbogiorinmwi nii keghi rhie ẹtin ẹnrẹn ne aranmwẹ oha na, ke ẹkete ẹre kevbe asẹ ọrhẹnrhẹn ne ọ gu ẹe.

3Ọkpa vbe avbe uhunmwu aranmwẹ oha na, keghi ye vbe ne a gbe ua nẹ, sokpan ehe ne a na fian re ẹwẹn ne ọ da, rrie nẹ, ọ keghi wa yan agbọn hia unu an, iran keghi vẹ lele ẹe ighẹ aranmwẹ oha na.

4Emwa hia kegha kpe ga Ugbogiorinmwi nii rhunmwuda ọ rhie asẹ ọre ne aranmwẹ oha nii nẹ. Iran keghi ye uhunmwu rhanmwẹ otọ ne aranmwẹ oha ni kha wẹẹ, “De ọmwa ne ọ ye vbe aranmwẹ oha nii? De ọmwa ne ọ gha sẹtin guẹe gbinna?”

5A keghi fan obọ ẹre ne aranmwẹ oha nii, ne ọ gha ya unu talọ ẹmwẹ dan hia, a keghi vbe rhie ẹghẹ nẹẹn ne ọ gha mwẹ asẹ la, uki eva yan iyeva.

6Rẹn keghi wa suẹn gha kpa unu ghe Osanobua kevbe eni Osa, kevbe ehe ne ọ ye, kevbe ya ba iran ni rre ẹrinmwi.

7A keghi vbe rhie ẹghẹ nẹẹn ne ọ ya gha gu emwa Osanobua gbinna kevbe ne obọ ẹre vbe gha ke ukhunmwu ne iran, a keghi rhie asẹ nẹẹn yan uhunmwu ẹwae hia kevbe emwa ẹvbo ne azẹ kevbe uhunmwu ẹvbo.

8Emwa ni rre agbọn hia gha ya uhunmwu rhanmwẹ otọ nẹẹn, ọnii nọ wẹ, avbe emwa hia ne a ma he gbẹnnẹ eni iran vbe agbọn te do suẹn, ye ebe emwa ni rrọọ, iran ni re ọghe Oteghe Ohuan ne a te gbe ua.

9“Danmwehọ nian, a deghẹ u mwẹ ehọ ne a ya họn ẹmwẹ.

10Ọmwa ne a kha nẹ ighẹ te a ra mu ẹre izẹghede, te a ra gele mu ẹre izẹghede, ne a wẹ a gha ya umozo gbe ua, te a ra gele ya umozo gbe ẹe ua. I ziengbe kevbe iyayi ọre ọ na nọ rẹn vbe obọ emwa Osanobua.”

11I keghi vbe bẹghe aranmwẹ oha ọvbehe vbe ọ ke uwu otọ ladian. Ọ kegha mwẹ igho eva zẹ vbe ọghe oteghe ohuan, ọ keghi guan zẹ vbe Ugbogiorinmwi.

12Ọ kegha sirra aranmwẹ ne ogieva nii lo ẹtin ẹnrẹn. Ọ keghi ye obọ yẹn emwa ni rre agbọn hia ẹho, ne iran gha ye uhunmwu rhanmwẹ otọ ne aranmwẹ oha ne okaro, ne ẹwẹn ne ọ da ne a fian ẹre rrie nẹ.

13Aranmwẹ ogieva na kegha winna iwinna ọyunnuan nekhua, ọ ghi tie erhẹn ne ọ ke iso gha dele ye otọ agbọn, vbe sirra emwa hia.

14Ọ keghi ye iwinna ọyunnuan ne a rhie ẹghẹ nẹẹn ya winna mu emwa hia ni rre agbọn rẹrẹ vbe sirra aranmwẹ oha ne okaro nii. Aranmwẹ oha na keghi wẹ ne emwa ne agbọn hia ma amazẹ ọkpa ne a ya ya ọghọ nẹẹn ighẹ aranmwẹ oha nii ne a ya umozo kuan rẹn egbe ne ọ ma wu.

15A keghi rhie asẹ ne aranmwẹ oha ne ogieva ne ọ hiọnrẹn arrọọ ye uwu amazẹ ọghe aranmwẹ ne okaro, ne aranmwẹ oha nii sẹtin gha guan, ne ọ gbele iran ighẹ avbe emwa hia ni ma ya uhunmwu rhanmwẹ otọ nẹẹn.

16Aranmwẹ oha nii keghi ya ẹtin munọ emwa hia ni kanmwa kevbe ni kpọlọ, ivbiogue kevbe avbe ọdafẹn, eviẹn kevbe ni yan egbe iran, ne a vinnọ ama ye iran obọ erha ọmwa kevbe uharo.

17Ọmwa ọkpa ne ọ ghi sẹtin khiẹn, ra na ọ dẹ, ẹ i ghi rrọọ vbe ẹ i re te ọ mwẹ ama na, ọnii nọ wẹ, eni aranmwẹ oha nii, ra olaba ne ọ mudia ye ihe eni ẹnrẹn.

18Ogie ẹwaẹn ọna gualọ, ọmwa ne ọ wa mwẹ irẹnmwi ẹsẹse gha sẹtin rria emwi ne a ya olaba aranmwẹ oha nii kha rhunmwuda olaba na, eni okpia ọkpa ọre ọ mudia ye ihe ẹre. Nene olaba kegha re ehan yan iyeha yan uri eha (666.)

← Chapter 12 Jump to: Chapter 14 →