Revelation 16

Edo ((E Baibol Ẹdo) Version 1996)

← Chapter 15 Jump to: Chapter 17 →

1I keghi họn vbe ọmwa ọkpa wa vannọ okan ke uwu Ọgua Osa gu avbe odibosa ihinrọn nii guan wẹẹ, “Wa ya rhurhẹ ọkpa ihinrọn ọghe izohu Osanobua nii yan agbọn!”

2Odibosa ne okaro kegha khian, ọ na ya hihiẹ ọkpa ọghọe yan agbọn. Ẹtẹ ni mu ohan kevbe ne ọ balọ keghi ladian vbe egbe iran ne a vinnọ ẹre ama aranmwẹ oha nii, deba iran ni ya uhunmwu rhanmwẹ otọ ne amazẹ ọre.

3Odibosa ne ogieva keghi hihiẹ ọkpa ọghọe ye uwu okun. Amẹ ne ọ rre okun keghi fi werriẹ do gha ye vbe esagiẹn orinmwi, emwi ni rre uwu okun ni hia keghi wulo.

4Ẹkpo nii ọre odibosa ne ogieha na hihiẹ ọghọe ye ẹzẹ kevbe uhunmwu ẹzẹ hia, ehia keghi wa khian esagiẹn.

5I keghi họn vbe odibosa ne ọ gbe aro ghe amẹ vbe ọ khare wẹẹ, “Ọmwa ẹmwata ọre u khin vbe uwu ohiẹn ne u bu ru na hia fẹẹrẹ, wẹ ne ọmwa Ne Ọ Huanrẹn, ne ọ rrọọ banbanna na kevbe ne ọ ka gha rrọọ dee yi!

6Iran ọ gbe esagiẹn emwa Osanobua ye otọ, ke ẹe kevbe ọghe avbe akhasẹ, rhunmwuda ọnii nian, wẹ keghi mu esagiẹn ne iran gha wọn. Emwi ne ọ kei ne iran, ọre iran miẹn!”

7Mẹ keghi họn vbe urhu ọkpa guan ke uwu Ogiukpo rre wẹẹ, “Nọyaẹnmwa Osanobua ne Oghodua, Ẹmwata ne uhunmwu ẹmwẹ ọre avbe ibuohiẹn ruẹn wa khin.”

8Odibosa ne ukpogienẹ keghi hihiẹ ọkpan ọghọe ye owẹn, a keghi wa fan obọ ẹre nẹẹn ne ọ ya owowo ẹre ọghe ọhanabe gha giẹn iran uan ighẹ emwa ne agbọn.

9Owowo ọhanabe ni kegha giẹn emwa uan, iran keghi ya ẹbọ yan eni Osanobua ọmwa ne ọ mwẹ asẹ vbe uhunmwu avbe egboghogbogho na hia, sokpan iran ma zobọ vbe orukhọ, ne iran rhie urhomwẹ ne ukpọlọmwẹ ọnrẹn.

10Iyeke ọnii odibosa ne ogisẹn keghi hihiẹ ọkpan ọghọe yan ẹkete aranmwẹ oha nii. Ebi keghi ro gue arriọba aranmwẹ oha nii, emwa kegha ya akọn rri aranmwẹ ni rre iran unu, rhunmwuda avbe obalọ nii.

11Iran keghi ya ẹbọ yan Osanobua ne ọ rre ẹrinmwi rhunmwuda ẹtẹ kevbe obaloọ iran, sokpan, iran ma ladian vbe odẹ dan ne iran ye.

12Iyeke ọnii, odibosa ne ogiehan keghi hihiẹ ọkpan ẹnrẹn yan ẹzẹ Yufretes. Ẹzẹ nii keghi wa ka, ne avbe ọba ni ke ọlarre ovẹn dee miẹn ehe la.

13Iyeke ọnii, I keghi dẹghe avbe orhiọn ni ma huan eha ni ye vbe ẹkirẹ, iran kegha ke uwu unu Ugbogiorinmwi ni ladian, kevbe unu aranmwẹ oha nii kevbe unu akhasẹ ohoghe ni.

14Iran na ọrọre avbe orhiọn esu nii, ne ọ winna iwinna ọyunnuan. Avbe orhiọn eha nii, keghi ladian bu avbe ọba ni rre otọ agbọn gha khian, ne iran ya silo iran koko khẹ okuo Ẹdẹ nọkhua ọghe Osanobua ne Oghodua.

15“Wa danmwehọ, I dee zẹ vbe oyi, ọ maa ọre ọghe ọmwa ne ọ ma vbiẹ, ne ọ vbe dọlọ ukpọn ẹnrẹn yi, ne i ra ya irhunmwirhun la ẹvbo, ne ekhue i ra vbe mu vbe adesẹ ẹvbo.”

16Avbe orhiọn keghi do silo avbe ọba nii hia koko ye ihe ọkpa ne emwa Hibru tie ẹre Amagẹdọn.

17Odibosa ne ogi ihinrọn keghi hihiẹ ọkpa ọghọe ye ẹhoho, Urhu ọkpa keghi davan ke uwu Ogiukpo ne ọ rre Ọgua Osa ladian wẹẹ, “A ru nẹ!”

18Ayan kegha yan rhai rhai, avan nukhunmwu kegha vannọ yan egbe, deba igbohiotọ ọhanabe. A ma he miẹn egbe igbohiotọ na ke ne a bu agbọn tua agbọn, ọnọna ọre ọ he re igbohiotọ ne ọ rhia sẹ ehia.

19A keghi wa ẹvbo nọkhua nii ye ihe eha, okpẹvbo ni rre uhunmwu ẹvbo otọ agbọn hia keghi fuẹn uan. Osanobua keghi ye Babilọn rre, ọ keghi ya nẹẹn da vbe ayọn ne ọ rre ukpu ẹre, ayọn ọghe izohu ọhanabe ẹre nii.

20A keghi ho avbe otọ ne amẹ lẹga bẹkun, avbe oke nekhua hia keghi vbe khian ne a ho bẹkun.

21Okuta isan avan ẹrẹkhẹrẹ ne ọkpọkpa vbọ gha sẹ omwa uwan iyisẹn, kegha ke iso werriẹ gbe emwa. Emwa keghi ye ihẹn yan Osanobua rhunmwuda egboghogbogho isan avan nii, rhunmwuda ugborrirri wa gha nọ ighẹ nene egboghogbogho.

← Chapter 15 Jump to: Chapter 17 →