Revelation 22

Edo ((E Baibol Ẹdo) Version 1996)

← Chapter 21 Jump to:

1Odibosa ni keghi vbe do ma mwẹ ẹzẹ amẹ ẹfe, ọ fi wainwain vbe Kristal, ẹkete Osanobua kevbe ọghe nene Oteghe Ohuan ọre ọ ke lẹ de.

2Ọ keghi lẹ la adesẹneva ukpo ọghe ẹvbo ni. Vbe obọ eva ọghe ẹzẹ nii, erhan ẹfe keghi rrọọ, igba iweva ọre ọ mọ vbe ukpo, uhukpukpa vbe uki, ebe ẹre keghi re ne a ya mu agbọn ẹvbo egbe rran.

3Emwi ne Osanobua fi ẹre unu ọkpa ne a gha miẹn vbe ẹvbo nii, ẹ i rrọọ. Ẹkete Osanobua kevbe ọghe Oteghe Ohuan ghi gha rre ẹvbo ni, avbe eguọmwadia ẹre ghi gha ga ẹe.

4Iran gha bẹghe ẹre ugbaro, a ghi vbe gbẹnnẹ eni ẹnrẹn ye iran uharo.

5Asọn i ghi khian gha rrọọ ọvbehe, iran i ghi khian vbe gha gualọ ukpa ra ovẹn ne ọ yunmwu, rhunmwuda Nọyaẹnmwa ọre ọ khian gha re uwanmwẹ iran, iran gha khaemwisẹ zẹ vbe ọha ẹdẹ kevbe ẹdẹdẹmwẹdẹ.

6Odibosa nii keghi vbe khama mwẹ wẹ, “Ẹmwẹ ẹmwata ne ọ gia muẹn ẹtin yan ọre ena khin. Nene Nọyaẹnmwa Osanobua ne ọ rhie Orhiọn ẹnrẹn ne avbe akhasẹ, ọre ọ vbe gie odibosa ẹre ne ọ do rhie emwi ne ọ gha rherhe sunu ma avbe eguọmwadia ẹre.”

7Jesu wẹẹ, “Danmwehọ, I dee ẹgiẹgiẹ, ọ ma ne iran ni ye ẹmwẹ akhasẹ ni rre ehe na ru emwi!”

8Mẹ ne Jọn ọre ọ họẹn, I na vbe miẹn avbe emwi na hia. Ugbẹn vbe I ghi họn ehia, kevbe I ghi miẹn ehia fo nẹ, I keghi degbe otọ vbe akharha odibo Osa nii ne ọ rhie emwi na hia ma mwẹ, I na wẹ ne I ya uhunmwu rhanmwẹ otọ nẹẹn.

9Sokpan rẹn keghi tama mwẹ wẹ, “Ghe danmwẹ ọẹn ghe, ọguọmwadia nii ihua, kevbe ọghe avbe akhasẹ ne etuẹn, ọre imẹ khin, kevbe ọ ghe emwa hia ni ya ẹmwẹ ni rre ebe ne ru emwi ya uhunmwu rhanmwẹ otọ ne Osanobua!”

10Ọ keghi vbe tama mwẹ wẹẹ, “Ghẹ rhie ẹmwẹ akhasẹ ni rre ebe na lẹ re zẹ vbe ẹmwẹ oro, rhunmwuda ẹghẹ ne emwi na hia gha ya sunu sẹ otọ fo nẹ.

11Ọmwa ne ọ re ọmwa dan, we ẹre wa gha ru ọmwa dan khian, ne ọ re agbiruẹn, we ne ọ wa gha re agbiruẹn khian, ọmwa ne ọ re ọmwa esi, we ne ọ wa gha ru emwi esi khian, ọmwa ne ọ re ne ọ huanrẹn, wẹ ne ọ wa vbe gha re ne ọ huanrẹn khian.”

12Jesu wẹẹ, “Danmwehọ, I dee ẹgiẹgiẹ! I gha viọ emwi ne I ya san ẹse rre ne I viọ ne dọmwadẹ ọghọe vbene iwinna rẹn khare.

13Mẹ ọrọre Alfa Kevbe Omega, okaro kevbe okiekie, omuhẹn kevbe ufomwẹ.”

14Ọ maa ne iran ni họ ẹmwẹ iran huan sẹrriọ ne iran ghi na mwẹ ẹtin, ne iran gha ya re vbe ọmọ ne erhan ẹfe ni mọẹn, kevbe ne iran vbe la onurho la ẹvbo nii.

15Sokpan, iyeke ẹvbo nii, ọrọre ọghe avbe ni rhiaraa, iran ni ru ebo edunna, iran ni gbe alama oghẹ, avbe izigha, iran ni ga ẹbọ, iran ni ta ohoghe, vbe ẹmwẹ ne a guan kevbe emwi ne a ru.

16“Mẹ ne Jesu ọre ọ gie odibo mwẹ ne ọ ya ta ẹmwẹ na ma uwa vbe esọsi. Mẹ ne ovbi uniẹn Devid nọ, Orhọnmwẹ owiẹ ne ọ baa siẹẹn.”

17Orhiọn kevbe Ọha khare wẹ, “Gha dee!” Ọmwa ne ọ rhirhi họn ẹmwẹ na, ẹ i mwẹ ọ ma kha wẹ, “Gha dee!” Ọmwaikọmwa ne ohanmwẹ amẹ gbe gha dee, do rhie amẹ ẹfe na vbe ọghe ọhẹ, ọmwa ne ọ rhirhi khọn.

18Mẹ ne Jọn wa mobọ tama emwa hia ni họn ẹmwẹ akhasẹ ni rre ebe na, a deghẹ ọmwaikọmwa fian yọ, Nọyaẹnmwa gha vbe ya avbe egboghogbogho ne a guan kaẹn vbe ebe na do ye oya ne a gha rri ọre re.

19A deghẹ ọmwaikọmwa vbe fian hin rre vbe ebe na, Nọyaẹnmwa gha miẹn ẹre ne ọ te sẹ ọre obọ vbe ọmọ erhan ẹfe nii, kevbe ne ọ te re ọghọe vbe Ẹvbo Ne Ọ Huanrẹn nii, ne a ta ẹmwẹ ọnrẹn ye ebe na.

20Ọmwa ne ọ sẹ osẹe ye emwi na hia khare wẹ, “Erriọ wa nọ zẹẹ, I dee banbanna!” Erriọ ogha ye. Gha dee Nọyaẹnmwa Jesu!

21Te ẹsọhẹ Nọyaẹnmwa Jesu gha gu emwa hia gha rrọọ. Isẹ.

← Chapter 21 Jump to: