Revelation 6

Edo ((E Baibol Ẹdo) Version 1996)

← Chapter 5 Jump to: Chapter 7 →

1I keghi bẹghe oteghe ohuan nii vbe ọ rhan ne okaro vbe uwu ehe ne a na gbalọ ẹe ihinrọn nii, I keghi họn ọkpa vbe uwu emwi ne a yi ni ma wu enẹ nii, vbe ọ ya urhu ne ọ ye vbe ne avan nukhunmwu van kha wẹ, “Gha dee!”

2I ghi tọn aro mu, I keghi bẹghe ẹsin nọfua ọkpa. Ọmwa ne ọ hin ẹnrẹn, mu uhanbọ mwẹ, a keghi vbe mu erhu ẹde nẹẹn. Ọ keghi ladian zẹ vbe ọmwa ne ọ khọn miotọ nẹ, ọ ra vbe ya khọnmiotọ.

3Oteghe Ohuan keghi vbe rhan ehe ne a gbae ne ogieva, I keghi vbe họn emwi ne a yi ne ọ ma wu ne ọgieva ọ wẹẹ, “Gha dee!”

4Ẹsin ọvbehe keghi ladian, ọ na keghi baa. Ọmwa ne ọ hin ẹnrẹn, a keghi rhie ẹtin nẹẹn ne ọ ya si okuo ye agbọn, ne emwa ne agbọn gha gbele egbe iran uan, a keghi mu umozo nọkhua ye ọre obọ.

5Iyeke ọnii, Oteghe Ohuan keghi rhan ebe ne a gbae ne ogieha, I keghi vbe họn emwi ne a yi ne ọ ma wu ne ogieha, ọ wẹẹ, “Gha dee!” I ghi tọn aro mu, ya ghee ẹsin nekhui. Ọmwa ne ọ hin ẹnrẹn keghi viọ esike ne a ya mwa emwi eva mwẹ obọ.

6I keghi họn emwi ne ọ ye vbe urhu ọmwa, ọ kegha ke ehe ne avbe emwi ne a yi ni ma wu enẹ nii ye rre, ọ wẹẹ, “Ovbi ọduẹki ọka ọkpa ọre a gha ya gha ha ọmwa osa iwinna ẹdẹ hoho, obọ eha vbe uwu enẹ ovbi ọduẹki ọka irhuarhua, ọre a gha ya gha ha ọmwa osa iwinna ẹdẹ hoho. sokpan ghẹ rhia iran uan ighẹ avbe ofigbọn oliv kevbe wain.”

7Iyeke ọnii, Oteghe Ohuan nii keghi rhan emwi ne a gbae ne ogienẹ, I keghi họn vbe emwi ne a yi ne ọ ma wu ne ogienẹ wẹẹ, “Gha dee!”

8I ghi tọn aro mu, I keghi bẹghe ẹsin ne egbe ẹre fua banbanban. Iran kegha tie ọmwa ne ọ hin ẹnrẹn khian, “Uwu.” Ẹrinmwi erhẹn keghi wa gha lele ẹre usomwẹ owẹ khian. A keghi rhie asẹ ne iran yan obọ ọkpa vbe vbe a gha wa agbọn ye ihe enẹ, ne iran ya umozo kevbe ukhunmwu kevbe emianmwẹ, kevbe avbe aranmwẹ ni khọ ni rre otọ agbọn, gbele emwa.

9Iyeke ọnii, Oteghe Ohuan nii keghi rhan emwi ne a gbae nii. I ghi ya ghe ototọ ogiukpo, orhiọn emwa hia ne a he gbele ua rhunmwuda ighẹ iran kpe orhu ẹmwẹ Osanobua, iran keghi vbe gha re emwa ni mu aro ye ẹmwẹ osẹ ne iran sẹ.

10Iran keghi ye urhu ne ọ la datu wẹẹ: “Oghodua Nọyaẹnmwa, ne ọ huanrẹn kevbe ọmwa ẹmwata. Vbe ọ gha kpẹe sẹ hẹ yi u ke ya bu ohiẹn emwa ni rre agbọn, ne u vbe rri iran oya ye ne iran na gbele ima uan?”

11A keghi mu ẹwu ogbọnmwọkpa ne ọkpọkpa vbe uwu iran, a na wẹ ne iran he ye ya hẹwẹ nẹ, la ẹghẹ kherhe, rhinrin iran te do gba ighẹ avbe eguọmwadia ne ihua iran, kevbe etẹn iran ne a ra gbele ua zẹ vbene avbe gbele iran uan.

12I kevbe ya bẹghe vbe Oteghe Ohuan rhan emwi ne a gbae ne ogiehan. Igbohiotọ ọhanabe keghi wa gha rrọọ, owẹn keghi sie rua, ọ ye vbe ukpọn nekhui ne khuarakhuara, uki keghi wa fi werriẹ khian ne ọ baa fẹẹrẹ vbe esagiẹn.

13Avbe orhọnmwẹ kegha ke iso dele ku otọ vbe ọmọ ohọ ne ọ ma he vbo, ne ẹhoho ne ọ wo vbe egbe khuọnnọ kua.

14A keghi vbọlọ avbe oke nekhua, ke otọ ne amẹ lẹga hin ihe iran rre.

15Ẹkpo nii ọre iran ne avbe ọba agbọn, iran ni khaemwisẹ kevbe iran nekhua vbe ivbiyokuo, iran ne ekhaẹmwẹ, iran ni fe, kevbe emwa ọvbehe hia kevbe avbe eviẹn, kevbe iran ni yan egbe iran, iran hia kegha lẹ lao uwu uvun okuta ya gha lẹ re, kevbe ototọ avbe okuta nekhua.

16Iran kegha go tie avbe oke ni yo kevba avbe okuta nekhua wẹ, “De rhu ima ne u rhie ima lẹre hin aro ọmwa nii, ne ọ tota ye ẹkete, kevbe hin izohu oteghe Ohuan nii.

17Rhunmwuda ẹdẹ izohu iran nọkhua gbe nẹ, de ọmwa ne ọ gha sẹtin khẹ iran vbe igbinna?”

← Chapter 5 Jump to: Chapter 7 →