Revelation 14

Edo ((E Baibol Ẹdo) Version 1996)

← Chapter 13 Jump to: Chapter 15 →

1Ugbẹn vbe I ghi tọn aro mu, I keghi ya bẹghe Oteghe Ohuan nii, ọ mudia yan uhunmwu Oke Zaiọn: Arhunmwu arriaisẹn enẹyan-ikiọkhọe (144,000) keghi mudia kẹe, a keghi gbẹn eni ẹnrẹn kevbe ọ ghe Erha ẹe ye ehia uharo.

2I keghi họn urhu ke ẹrinmwi rre, ọ ye vbe uvanmwẹ amẹ ẹzẹ nọkhua ne ọ ke uhunmwu okuta rhọ ku otọ, ọ ye vbe avan nukhunmwu nọ khuarha kugbe. Urhu ne I họẹn keghi ye vbe ọghe avbe akpata ne avbe ọkpakpata kpee.

3Arhunmwu arriaisẹn enẹyan-ikiọkhọe nii keghi mudia viọ aro da ẹkete kevbe avbe emwi ne a yi nii ma wu ni, kevbe avbe ediọn. Iran keghi so ihuan ọgbọn ne ọmwa rhọkpa i sẹtin ruẹ vbe ẹ i re iran ni ne a dẹwerriegbe nẹ ke uwu agbọn rre.

4Iran na keghi re avbe ikpia ni da egbe iran yi vbe ne ẹ i na mwẹ iruẹn, vbe ekpa ne iran ma na gu ikhuo ruemwi rhọkpa, iran ma rọnmwẹ ikhuo. Iran kegha lele Oteghe Ohuan nii la ehe ne ọ rhirhi la, a dẹ iran werriegbe nẹ ke uwu ẹbu emwa ne agbọn ladian, iran keghi re emwa ni ikaro ne a viọ gie Osanobua kevbe Oteghe Ohuan nii.

5Iran ma he te ohoghe ẹdẹ, te ọ gba ne iran fo.

6Ẹghẹ Nii ọre I na bẹghe odibosa ọkpa, ọ wa tin khian vbe odukhunmwu gba an, irẹn kevbe Iyẹn Ne ọ maa ọghe ẹdẹdẹmwẹdẹ, ne ọ ra na ma emwa ne agbọn, kevbe dọmwadẹ uhunmwu ẹvbo kevbe ẹwae, kevbe ẹvbo ne azẹ kevbe emwa.

7Ọ keghi ya urhu ne ọ la kha wẹẹ, “Wa gha mu ohan Osanobua, wa vbe gha rho ukpọlọmwẹ ọnrẹn! Rhunmwuda ẹghẹ sẹ nẹ ne ọ ra na do bu ohiẹn emwa ne agbọn. Rhunmwuda ọnii, wa ghughẹ rre ne uwa ya uhunmwu rhanmwẹ otọ vbe odaro Osanobua, ọmwa ne ọ yi ẹrinmwi kevbe agbọn kevbe okun kevbe avbe uhunmwu ẹzẹ hia.”

8Odibosa ogieva keghi lele ne okaro, ọ khare wẹ, “Ọ de guọghọ ua nẹ, Babilọn nọkhua de guọghọ ua nẹ, Ọ mu ayọn ne emwa, ọ si iran da ẹe ayọn ne ọ wo vbe egbe ọghe orriarria alama oghẹ ọre!”

9Odibosa ogieha keghi vbe lele ne ogieva, ọ kegha ya urhu ne ọ la da tu wẹẹ, “Ọmwa ne ọ rhirhi ya uhunmwu rhanmwẹ otọ ne aranmwẹ oha nii, ra ke amazẹ ọre, ọ na vbe gha mwẹ ama rẹn vbe uharo, ra vbe obọ ẹre.

10Rẹn tobọ ẹre gha vbe wọn vbe uwu ayọn Osanobua, ayọn izohu ẹre ne ọ wa yan hihiẹ ye ukpu izohu ẹre. Iran hia ni ru ọnii, a gha rri iran oya vbe uwu erhẹn kevbe ugbofi vbe odaro avbe odibosa ni huanrẹn kevbe Oteghe Ohuan.

11Ighogho erhẹn ne ọ rri iran oya ni kegha la ghe odukhunmwu ẹdẹ kevbe ẹdẹdẹmwẹdẹ, asọn kevbe avan, a i vbe rhie egbe rọkhọmwẹ ne iran, ighẹ iran ni ya uhunmwu rhanmwẹ otọ ne aranmwẹ oha nii, ke ẹe kevbe amazẹ ọre, kevbe iran ni rhan obọ miẹn ama ọghe eni ẹnrẹn.”

12I ziengbe ọre ọna nọ rẹn vbe obọ emwa Osanobua, iran ni lele uhi Osanobua ru emwi, ne iran na rhie gbe mu Jesu.

13Iyeke ọnii, I keghi họn urhu ọkpa ke ẹrinmwi rre wẹ, “Gbẹn emwi na ye otọ. Ọ maa ne iran ni wulo nẹ, iran ni gha wulo vbe uwu iwinna Nọyaẹnmwa ke eban kpao!” Orhiọn nii keghi wanniẹn wẹ, “Erriọ zẹẹ wa nọ. Iran gha ghọghọ ye ne iran na kẹtin vbe uwu iwinna ne ọ wo vbe egbe, rhunmwuda ere iwinna ne iran winnaẹn ọre iran rhie mwẹ obọ.”

14Ugbẹn vbe I ghi tọn aro mu, I keghi ya bẹghe okuku nọfua ọkpa, emwi ọkpa keghi tota yan okuku nii, ọ ye vbe ọmwa. Ẹdẹ igoru kegha rre ọre uhunmwu, ọ keghi rhie abẹkpẹn ne ọ mu mwẹ obọ.

15Odibosa ọvbehe keghi ke uwu Ọgua Osa ladian, ọ keghi ya urhu ne ọ la datu tama odibosa ne ọ tota yan okuku ni wẹẹ, “Ye abẹkpẹn ruẹn gha rhọ emwiorhọ, rhunmwuda ẹghẹ ne ọ kei yi, ne a ya rhọ emwiorhọ sẹ nẹ.”

16Rẹn ne ọ tota yan okuku nii keghi fieghe abẹkpẹn ghe agbọn, a keghi rhọ emwiorhọ ọghe agbọn.

17I keghi vbe bẹghe odibosa ọvbehe, ọ vbe ke uwu Ọgua Osa ladian vbe ẹrinmwi, rẹn keghi vbe mwẹ abẹkpẹn ne ọ mu.

18Odibosa ọvbehe ne ọ gbe aro ghe erhẹn, keghi vbe ke uwu Ogiukpo ladian, ọ keghi van rhanrhan-an-rhan tama odibosa ne ọ mwẹ abẹkpẹn ne ọ mu ni wẹẹ, “Ye abẹkpẹn ruẹn giagia ọmọ azara ni rre ugbo azara ni rre agbọn hin rre ighẹ ehia vboo nẹ.”

19Rhunmwuda ọnii, odibosa keghi fieghe abẹkpẹn ọnrẹn ghe agbọn, ọ keghi giagia ọmọ azara hin avbe azara rre, ọ ke viọ ehia ku uwu okọ ne a na ru ẹdin oghẹ izohu Osanobua.

20A keghi minọ avbe ọmọ azara nii vbe uwu okọ nii, ne ọ rre vbe a gha la hin ore ẹvbo rre nẹ, esagiẹn kegha lẹ ke uwu okọ nii ladian, ehe ne ọ lẹ orogho la kegha re omwa ibiriki uri, ne udinmwimwẹ ọnrẹn vbe re omwa ibata isẹn.

← Chapter 13 Jump to: Chapter 15 →