Revelation 17

Edo ((E Baibol Ẹdo) Version 1996)

← Chapter 16 Jump to: Chapter 18 →

1Ọkpa vbe uwu avbe odibosa ihinrọn, ne egboghogbogho gha gue nii, keghi bu mwẹ gha dee do tama mwẹ wẹẹ, “Larre, ne I do rhie maa ruẹn vbene a ra ya rri ọre oya hẹ ighẹ ogiete ebabotu nii, ẹvbo nọkhua nii ne a bọ ye ọkpẹn avbe ẹzẹ ni bun.

2Avbe ọba agbọn hia gue nene ogiete ebabotu gbe alama oghẹ, emwa ne agbọn hia keghi khian ne ayọn rẹn ghi gbe vbe iran ghi da nẹ vbe uwu ayọn alama oghẹ ọre.”

3Orhiọn keghi hin yan mwẹ, odibosa ni keghi mu mwẹ gha rrie uwu ato. Evba ọre I na ya dẹghe okhuo ọkpa, ọ keghi tota yan aranmwẹ oha ne ọ baa ọkpa, ne a wa gbẹnnẹ eni dan gba ẹre aro gba ẹre iyeke, ọ keghi mwẹ uhunmwu ihinrọn kevbe igho igbe.

4Ukpọn ododo ne ọ baa rhanrhanrhan kevbe ne ọ baa rriẹrriẹ, ọre a ya mu ẹre egbe ighẹ nene okhuo, a keghi ye emwi itegbe ọghe igoru han nẹẹn, avbe okuta ighobioye kevbe ikpe ẹrọnmwọ. Ọ keghi mu ukpu igoru mwẹ obọ, ọ vuọn ne emwi awua kevbe ẹwia hia, avbe emwi ne ọ miẹn vbe alama oghẹ ọre.

5Iran keghi gbẹn eni ne ọ mwẹ emwi oro ne a yae kha ye ọre uharo wẹ, “Babilọn Nọkhua, iye ebabotu hia kevbe avbe emwi ni kẹkua hia vbe agbọn.”

6I keghi miẹn wẹ ayọn esagiẹn emwa Osanobua wa gbe okhuo na, kevbe esagiẹn avbe emwa ne a gbele ba ẹmwẹ iran mu uhunmwu kọ ẹmwẹ Jesu. Ugbẹn vbe i ghi bẹghe ẹre, ọ keghi yan mwẹ unu uan.

7Odibosa nii keghi tama mwẹ wẹẹ, “Vbe ọ zẹ ne ọna na yan ruẹn unu uan yi? I gha ta oro emwi ne a ye okhuo na kevbe aranmwẹ oha ne ọ mu ẹn khian kha, aranmwẹ oha nii ne ọ mwẹ uhunmwu ihinrọn kevbe igho igbe.

8Aranmwẹ oha ne u bẹghe nii, te ka gha rre agbọn yi, sokpan, banbanna nian, ẹ i ghi rrọọ ọvbehe, ọ wu nẹ, te ọ ghi ra ke uwu uvun ne ẹ i mwẹ otọ ladian na, ọ ghi ladian ne a ya fuẹn ọnrẹn uan. Emwa ni rre agbọn ne a ma he gbẹnnẹ eni ẹnrẹn ye ebe ẹfe emwa ni rrọọ, ni ma he wu vbe a te do suẹn agbọn, unu gha yan iran ẹsẹse vbe iran a miẹn aranmwẹ oha nii. Rhunmwuda, ọ te ka gha rre agbọn yi, sokpan, ẹ i ghi rre agbọn ọvbehe, sokpan ọ gha ye dọlegbe ya egbe ladian.

9“Ogie ẹwaẹn kevbe irẹnmwi nọkhua ọ re ọ na gualọ. Uhunmwu ihinrọn nii kegha re avbe oke ihinrọn, avbe oke ni ne okhuo ni tota yan. Ọba ihinrọn ọre iran vbe khin,

10isẹn vbọ, wulo nẹ, ọkpa ye rre ẹkete vbọ. Ọkpa ne ọ kere ma he rre, ọ gha rre, ovbi ẹghẹ kherhe ọre ọ ra ya.

11Aranmwẹ ohan nii ne ọ te ka rrọọ, ne ẹ i ghi re agbọn banbanna, ọba ne ogie erẹnrẹn ọre irẹn tobọ ẹre khin, ne ọ vbe re ọkpa vbe uwu ihinrọn ne okaro, te irẹn vbe khian ne a ya fuẹn ọnrẹn uan.

12“Igho igbe ne a u bẹghe, kegha re ọba igbe ni ma he suẹn gha rri ọba, sokpan, a gha rhie asẹ ne iran ne iran gu aranmwẹ oha nii rriọba la ẹgogo ọkpa.

13Emwi ọkpa ọre ọ rre iran igbe na ekhọe, iran keghi vbe rhie ẹtin kevbe asẹ iran ne aranmwẹ oha nii.

14Iran gha gu Oteghe Ohuan nii gbinna, sokpan Oteghe Ohuan nii ke ẹe kevbe emwa rẹn ne a tie re, kevbe ne a hannọ zẹ, iran ni ya ẹko ata lele ẹe khian, gha khọn iran muotọ, rhunmwuda rẹn ọrọre Nọyan eniyaẹnmwa kevbe Ọba iran ne ọba.”

15Odibosa nii keghi vbe tama mwẹ wẹẹ, “Amẹ ne u miẹn ne ebabotu ni tota yan kegha re ẹbu kevbe agbọn ẹvbo kevbe ẹvbo ne a zẹ.

16Igho igbe ne u dẹghe, kevbe aranmwẹ oha nii gha do gha khu iwu ebabotu nii, iran gha viọ emwi ne ọ mwẹ hia kpao, iran ghi sẹ ọe rae ye irhunmwirhuan. Iran gha rri efun egbe ẹre, iran gha ya erhẹn giẹn uan.

17Rhunmwuda Osanobua rhie ye iran ekhọe, ne iran gha ho ne iran ru vbene irẹn ho, ne iran gha ru emwi kugbe, ne iran vbe viọ ẹtin iran, ne aranmwẹ oha nii ya gha khaemwisẹ, rhinrin ẹmwẹ Osanobua te do sẹ.

18“Nene okhuo ne u dẹghe keghi re nene ẹvbo nọkhua ne ọ hin yan avbe ọba otọ agbọn na.”

← Chapter 16 Jump to: Chapter 18 →