Revelation 19

Edo ((E Baibol Ẹdo) Version 1996)

← Chapter 18 Jump to: Chapter 20 →

1Vbe iyeke ọnọna, I keghi họn emwi ne ọ ye vbe owogho emwa ni bun ẹsẹse vbe ẹrinmwi, ọ wẹẹ, “Urhomwẹ nọ ne Osanobua! Imiẹnfan, uyi kevbe ẹtin ọghe Osanobua mwa nọ.

2Ẹmwata ne uhunmwu ẹmwẹ ọre ibuohiẹn ọnrẹn khin. Rhunmwuda rẹn bu abe gbe ẹe nẹ ighẹ ebabotu nọkhua nii ne ọ ya alama oghẹ ọre mu agbọn rhia. Osanobua rria ẹre ikhi, rhunmwuda ne ọ na gbele avbe eguọmwadia ẹre.”

3Iran keghi vbe dọlegbe datu wẹ, “Urhomwẹ nọ ne Osanobua! Te ighogho ẹvbo nọkhua ne ọ giẹn uan ni khian gha ye odukhunmwu ẹdẹdẹmwẹdẹ!”

4Avbe ediọn enẹyanugie nii, kevbe avbe aranmwẹ oha enẹ ni ma wu ni keghi dele gbe otọ, iran keghi ye uhunmwu rhanmwẹ otọ ne Osanobua ne ọ tota ye uhunmwu ẹkete wẹ: “Isẹ ẹ! Urhomwẹ nọ ne Osanobua.”

5Urhu ọkpa keghi ke uwu ẹkete nii ladian wẹẹ, “Wa rho Osanobua mwa, wa ne eguọmwadia ẹre hia kevbe emwa hia, ni kpọlọ kevbe ni kanmwa, wa ni mu ohan rẹn!”

6I keghi họn emwi ne ọ ye vbe urhu emwa ni bun ẹsẹse ọ ye vbe uvanmwẹ okpamẹ ne ọ rhọ ke okuta ne ọ yo ku otọ, ọ ye vbe ne avan vannọ yan egbe. I keghi họn vbe iran khare wẹẹ, “Wa rho Osanobua! Rhunmwuda e Nọyaẹnmwa Osanobua ne Oghodua ọrọre Ọba!

7Wa gie ima gha ku, ne a gha ghọghọ, wa gie ima rho ukpọlọmwẹ ọnrẹn! Rhunmwuda ẹghẹ sẹ nẹ ne a ra na do ugie orọnmwẹ ọghe Oteghe Ohuan nii, ovbiọha vbe mu egbe ẹre ye otọ nẹ.

8A fan obọ ẹre nẹẹn nẹ, ne ọ ya ukpọn eto ovbiohuẹ ne ọ huanrẹn kevbe ne ọ fi wainwain haan.” (Ukpọn eto ovbiohuẹ ọrọre uyinmwẹ ẹmwata ọghe emwa Osanobua.)

9Odibosa nii keghi tama mwẹ wẹ, “Gbẹn ọnọna ye otọ: I ma kan iran ne a tie re ne ọ gha die eghọ ọghe irhiọha Oteghe Ohuan nii.” Odibosa nii keghi vbe rhie te ẹe wẹẹ, “Ẹmwata nọ, ke unu Osanobua tobọ ẹre rre ọre ọ na khin.”

10I keghi de fi iguẹ vbe akharha ẹre ne I ya uhunmwu rhanmwẹ otọ nẹẹn, sokpan rẹn keghi tama mwẹ wẹẹ, “Ghẹ danmwẹ ọẹn ghe, ọguọmwadia ne ihua ọre imẹ vbe khin, kevbe zẹ vbe etuẹn, iran ni ya obọ da ẹmwata ne Jesu rhie maa yi mwẹ. Ya uhunmwu rhanmwẹ otọ ne Osanobua.” Rhunmwuda, ẹmwata ne Jesu rhie maa, ọre ọ rhie ẹtin ne avbe akhasẹ.

11I keghi miẹn vbe ẹrinmwi kie ye otọ, ẹsin nọfua ọkpa kegha rrọọ, a kegha tie ọmwa ne ọ hin ẹnrẹn, Ọmwata kevbe Ne ọ ta uhunmwu ẹmwẹ. Ẹmwata ọre ọ ya bu ohiẹn kevbe ne ọ vbe ya khọn okuo ẹre.

12Aro ẹre keghi ye vbe ọgẹn erhẹn, ọ keghi viọ erhu ẹde ni bun rhuẹ ye uhunmwu ẹnrẹn. A keghi gbẹn eni ẹnrẹn yan rẹn, ọmwa ọvbehe ne ọ rẹn emwi ne a ya ẹe kha ẹ i rrọọ gberra irẹn tobọ ẹre.

13Esagiẹn keghi wa gba ẹwu ne ọ yọe. Eni ne a tie ẹre keghi re “Ẹmwẹ Osanobua.”

14Ivbiyokuo ẹrinmwi keghi lele ẹe, iran keghi hin ẹsin ni fua, ẹwu ne iran hia yọe keghi re ọghe eto ovbiohuẹ nọfua ne ọ huanrẹn.

15Umozo ne ọ mu ne ọ ra ya khọn uhunmwu ẹvbo hia mu otọ kegha ke unu ẹnrẹn ladian. Ọkpọ ematọn ọre ọ khian ya gha khaemwisẹ yan iran, ọ gha vbe balọ ayọn ne ọ rre uwu okọ izohu Osanobua ne Oghodua ladian.

16A keghi gbẹnnẹ avbe ẹmwẹ na ye ẹwu ne ọ yọe kevbe owẹ ọre wẹẹ, “Ọba avbe iran ne ọba kevbe Nọyan iran ni yaẹn emwa.”

17I keghi bẹghe odibosa ọkpa vbe ọ mudia ye owẹn. Ọ keghi davan tama avbe ahianmwẹ ni tin khian vbe aro iso wẹẹ, “Wa gha dee do si egbe koko ye eghọ nọkhua ọ ghe Osanobua.

18Wa larre ne uwa do rri efun egbe ọghe avbe ọba kevbe ekaokuo nekhua, ivbiyokuo, efun ẹsin kevbe emwa ni hin iran, efun emwa hia kevbe eviẹn kevbe eni yan egbe iran, kevbe ni kpọlọ kevbe ni kanmwa!”

19Mẹ keghi bẹghe aranmwẹ oha nii, kevbe avbe ọba agbọn kevbe ivbiyokuo iran, iran si egbe koko, ne iran gu ọmwa ne ọ hin ẹsin nii, ke ivbiyokuo ẹre gbinna.

20A keghi mu aranmwẹ oha nii oghunmwu ke ẹe kevbe akhasẹ ohoghe nii ne ọ winna iwinna ọyunnuan vbe odaro ẹre. (Ama ọyunnuan nii ọre ọ ya rẹrẹ iran re ighẹ iran ni vin ama aranmwẹ oha ni ye egbe, ne iran na vbe gha ye uhunmwu rhanmwẹ otọ ne amazẹ ọre.) Aranmwẹ oha nii ke ẹe kevbe akhasẹ ohoghe nii, a keghi munọ iran ke ẹmwẹ ne unu fi lo ku uwu odighi erhẹn ne ọ giẹn emwi ne ọ ye vbe ugbofi ladian.

21A keghi ya umozo gbele ivbiyokuo iran uan, nene umozo ne ọ ke unu ọmwa ne ọ hin ẹsin ladian, avbe ahianmwẹ keghi re vbe ikun iran vbene ẹtin iran sẹe.

← Chapter 18 Jump to: Chapter 20 →