Acts 26

Bugis

← Chapter 25 Jump to: Chapter 27 →

1Nakkeda Agripa lao ri Paulus, “Ripalaloko mabbicara untu' bélai alému.” Nanakkani limanna Paulus nainappa mabbicara bélai aléna makkuwaéwé,

2“Iya Malebbié Datu Agripa! Maupe' senna'ka usedding weddikka bélai aléku ri yolona Datu passalenna iya maneng nateppuwangngékka tau Yahudié;

3lebbi-lebbipi nasaba manessai naisseng Datu ade'-ade'na sibawa masaala-masaalana tau Yahudié. Rimakkuwannanaro, uwéllauwi tennapodo Datu méngkalingai pappakatajakku sibawa sabbara'.

4Sininna tau Yahudié naisseng pékkugi atuwo-tuwokku mappammulai kalloloku. Naisseng mennang makkedaé sipongekku mancaji kallolo, tuwoka ri yelle'na bangsaku ri Yérusalém.

5Maittani mennang naissekka. Rékko maéloi mennang, naullé mennang mabbéré asabbiyang makkedaé mappammulai pammulanna tuwoka selaku tau Farisi sibawa turusiwi sininna peraturanna iya kaminang marejjingngé ri laleng agamata.

6Na makkekkuwangngé tettokka kuwaé untu' riadéléki nasaba mateppe'ka ri assijancingeng naébbué Allataala lao ri néné-nénéta.

7Iyatoro assijancingengngé namménasai iya seppulo duwa suku bangsa Israélié, angkanna massompa lao ri Allataala esso wenni. Na mala nasaba mateppe'ka ri assijancingengngéro, Datu Iya Malebbié, naripassalaka risining tau Yahudié.

8Magi saudara-saudara sining tau Yahudié dé' mulléi mateppe' makkedaé Allataala patuwoi paimeng tau maté?

9Riyolo mappallolongeng tokka makkedaé harusu'ka pogau'i sini-sininnaé untu' méwai Yésus iyaro polé ri Nazarét.

10Na mémeng iyanaro pura upogau' ri Yérusalém. Nasibawang sure' kuwasa polé ri kapala-kapala imangngé, maéga tau matinulu ri Allataala pura uputtama ri laleng tarungkué. Mala maccowé tokka situjuiwi makkedaé pakennaiwi mennang pahukkungeng maté.

11Maléwe' senna' usissa mennang risining bola assompangngé, passai mennang kuwammengngi nassakkarengngi aga natepperiyé. Makkuwamani pellana atikku lao ri mennang, angkanna laoka ri kota-kota laingngé untu' lellungngi mennang kuwaro.”

12“Na akkatta makkuwaéttonaro nautiwi sure' kuwasa polé ri kapala-kapala imangngé naulao ri Damsyik.

13Na wettukku ri tengnga laleng, kira-kira tangasso, Datu Iya Malebbié, uwitai cahayaé polé ri langié iya lebbi cakkaé naiya mata essoé. Iyaro cahayaé mattappai mattulilingika sibawa mattulilingiwi sining tau iya uwéwaé silaong joppa.

14Mabuwang manekki ri tanaé. Nainappa méngkalinga séuwa sadda makkeda lao ri iyya ri laleng basa Ibrani, ‘Saulus, Saulus! Magi mumatteru-teru mupa panrasa-rasa-Ka? Mupéneddingiwi matu peddié, rékko matteru mupo méwai pappimpin-Na iya mancajiyé Puwammu.’

15Nauwakkeda, ‘Niga Iko, Puwang?’ Nappébali Puwangngé, ‘Iyya'na Yésus iya mupanrasa-rasaé.

16Oto'no namutettong! Uwappaitangngi aléku ri iko sibawa akkatta untu' makkako mancaji pattumanik-Ku. Harusu'ko mabbirittangngi lao ri tau laingngé aga iya muwitaé iyaé essoéwé passalenna Iyya sibawa passalenna aga iya maéloé Ujéllorekko matti ri wettu mangoloé matu.

17Maéloka paleppe'ko polé ri bangsa Israélié sibawa bangsa-bangsa laingngé iya tenniyaé Yahudi. Maélo-Ka suroko lao ri mennang

18untu' pakkitai matanna, kuwammengngi nassu polé ri pettangngé nanauttama ri laleng cakkaé; kuwammengngi naleppe polé ri pangarunna Ibillisi'é, narikuwasai ri Allataala. Na ri laleng mateppe'na ri Iyya, riyaddampengengngi matu dosa-dosana sibawa mancajiwi matu mennang anggotana umma'na Allataala iya ripilé.’ ”

19“Rimakkuwannanaro, Datu Agripa, tuli makkuragaka turusiwi pakkitang iya puraé utarima polé ri Allataalaro.

20Terus terakka powadangngi sining tauwé makkedaé harusu'i mennang toba' polé ri dosa-dosana sibawa mabbéréyangngi aléna lao ri Allataala enrengngé mappaitangngi ri laleng atuwo-tuwonna mennang makkedaé toba'ni mennang polé ri dosa-dosana. Upowadangngi iyaro gau'é bunge'-bunge'na ri Damsyik, nainappa ri Yérusalém sibawa sininna Yudéa sibawa ri yelle'na tau tenniyaé Yahudi.

21Nasaba iyanaro nanatikkekka sining tau Yahudié ri Bolana Puwangngé sibawa makkuragana mpunoka.

22Iyakiya lettu iya essoéwé nalinrungika Allataala, angkakku weddikka tettong kuwaé mabbéréyangngi asabbiyakku lao ri sininna tauwé – battowa iyaré'ga baiccu. Aga iya upowadaéwé dé' nasilaingeng naiya puraé naboto nabi-nabié sibawa Musa;

23iyanaritu makkedaé Arung Pappassalama' iya najjanciyangngé Allataalaro harusu'i manrasa-rasa, sibawa mancajiwi tau bunge' tuwo paimeng polé ri amaténgngé; kuwammengngi nallalengi iyaro naulléi mabbéré tajang – iyanaritu asalamakeng – muwi lao risining tau Yahudié muwi lao risining tau tenniyaé Yahudi.”

24Ri wettu mabbicarana Paulus bélai aléna, gorani Féstus, “Jangennoga Paulus! Pangissengemmu iyaro maégaé pajangekko!”

25Iyakiya mappébaliwi Paulus, “Dé' ujangeng, Iya Malebbié. Ada-ada iya upowadaéro tongeng sibawa massu polé ri pikkirang madécéngngé.

26Aléna Datu Agripa naisseng madécéng gau'-gau'éro. Iyanaro saba'na naubarani mabbicara ri yolona Datu sibawa terus terang. Mateppe'ka dé' séddi polé ri gau'-gau'éro iya dé'é naissengngi Datu, saba' iya manennaro dé' nakajajiyang risining onrong iya tassubbué.

27Iya Malebbié Datu Agripa, mateppe'ga Datu aga napowada nabi-nabié? Uwaseng mateppe' Datu!”

28Nainappa makkeda Agripa lao ri Paulus, “Muwasengngiga magampang pancajika tau Kristéng ri laleng wettu dé'é namaitta?”

29Nappébali Paulus, “Ri laleng wettu dé'é namaitta iyaré'ga ri laleng wettu maittaé, massempajakka lao ri Allataala kuwammengngi na Datu sibawa sininna Bapa'-bapa' iya méngkalingaékka essoéwé weddingngi mancaji pada-pada iyya – sangadinna iyaé balenggué!”

30Paccappurenna Datu Arungngé, Gubernur-é Berniké, enrengngé sininna laingngé tettonni.

31Engkanana ri saliweng, makkedani mennang séddié lao ri laingngé, “Iyaé tauwé dé'gaga aga-aga napogau' iya sitinajaé rihukkung sibawa pahukkungeng maté iyaré'ga ritarungku.”

32Nakkeda Agripa lao ri Féstus, “Iyaé tauwé weddinni rileppessang, akkalarapanna dé' natuntu'i parakarana riadéléki ri pengadilanna Kaisar.”

← Chapter 25 Jump to: Chapter 27 →