Job 1

Chin (Mara Bible RV (BSI))

Jump to: Chapter 2 →

1Uzi râh liata chyhsa pakha, a moh Zawbâ ama tahpa y ta. Cha chyhsa cha seina hnei leipa, chyhsa dopa, Khazohpa a chipa nata moleina a heihsaipa chyhsa a châ.

2Sawchapawpa pasari nata sawchanô pathôh hnei ta.

3Mietaku 7,000, râraoseihpa 3,000, a rao pakypa viahchao tôhpa 500, alâ chanôpa 500 nata chakaotuhpa hluhpi chhao hnei ta, nochhi chyhsa hry liata chyhsa rônah chaipa a châ.

4A sawchapawzy cha, pakha o tawhta pakha o lâ a pasiepa ta, âmo daihti chyu liata kyhchhina tao tyh ei ta. Ama sietanô pathôhzy lâta chyhsa tuah ei ta, ama hnohta niedo awpa ta ama hrua tyh.

5Ama kyhchhina nohzy a pai nahta, Zawbâ cha a sawzy lâta chyhsa tuah ta, a pathaisa awpa ta a chho tyh ei. Ano chhao ta, “Ei sawzy ta moleina hmo taopa ta, ama palôh ta Khazohpa chô liata chhie ama vaw sa tlamaw thei,” tah ta, mydi kari ta thyu ta, a sawzy maluh kipa ta raopa hlânazy a hlâpa tyh ei. Cha hawhna chata Zawbâ cha tao tyh ta.

6Vâmozy Abeipa hmiakô liata amâ luahna noh liata, Sâtâ chhao ama hry liata a vaw luah hra ta.

7Abeipa ta Sâtâ hnohta, “Khataih tawhta a vypa ma na châ?” tah ta. Sâtâ ta Abeipa cha a chhy ta, “Alei chô liata vawh heih, a vy heih, khy heih, zu heih tahna tawhta â vypa ei châ,” tah ta.

8Abeipa ta Sâtâ hnohta, “Nâ chakaotuhpa Zawbâ thâtih na pachâ beih ma? Alei chô liata ano hawhpa rai y veih ei. Ano cha seina hnei leipa, chyhsa dopa, Khazohpa a chipa nata moleina a heihsaipa a châ,” tah ta.

9Sâtâ ta Abeipa cha a chhy ta, “Zawbâ ta a chhâpa y leipa ta Khazohpa cha a chi aw ma?

10Ano nata a olyu nata a hneipa zydua diahpai chhôh khâh chi ta na pabohsa hapa vâta châ vei ma? A ku raihria liata byhnâ pie chi ta, he râh liana heta a hneinazy a pôh lymâ.

11Châhrasala tahmâ na ku pazawh la, a hneipa zydua hria la, hmiachhy ta chhie a cha sapa aw,” tah ta.

12Abeipa ta Sâtâ hnohta, “Moh teh, a hneina zydua na ku liata a y. Ano chô liata deikua, na ku na pazawh awpa châ vei,” tah ta. Chatawhcha Sâtâ cha Abeipa hmiakô tawhta pua ha ta.

13Noh kha cha a sawchapawzy nata a sawchanôzy cha, ama uhthei chaipa o liata pati nie ei ta, kresawhti ama do hai nota,

14Zawbâ lâta zikyurâtuhpa pakha vaw tlo ta, Zawbâ hnohta, “Viahchao tôhpazy alei palie ei ta, ama kiapâh liata alâzy ama lao ama bâ hai nota,

15Sâbia mo ta vaw siehnao ei ta ama siekhei haw. Chakaotuhpazy cha zaozi ta thie ei ta, kei deita he thâtih cha chho awpa ta a vaw râpa ei châ,” tah ta.

16Bie a rei hai nota, chyhsa hropa vaw tlô ta, Zawbâ hnohta, “Avâ tawhta Khazohpa mei za tla ta, mietakuzy nata chakaotuhpazy kâ ta, a kâ patlô khai ha ei. Kei deita he thâtih cha chho awpa ta a vaw râpa ei châ,” tah ta.

17Bie a rei hai nota, chyhsa hropa vaw tlô heih ta, Zawbâ hnohta, “Kaldia mo ta py thôh lâta a pachhaih ei ta, râraoseihpazy patupa ta siekhei ei ta, chakaotuhpazy cha zaozi ta ama thie haw. Kei deita he thâtih cha chho awpa ta a vaw râpa ei châ,” tah ta.

18Bie a rei hai nota, chyhsa hropa vaw tlô ta, Zawbâ hnohta, “Na sawchapawzy nata na sawchanôzy cha, ama uhthei chaipa o liata pati nie ei ta, kresawhti ama do hai nota,

19moh teh, râhchawhpa lâ tawhta thlihpi ru ngaitapa vaw pathli ta, o cha ki palih liata vaw su ta, thyutliazy pao thlu ta, ama thi haw. Kei deita he thâtih cha chho awpa ta a vaw râpa ei châ,” tah ta.

20Chatawhcha Zawbâ cha thyu ta, a viahkao pasipa cha hrie ta, a luh a ngyu ta, alei liata pao ta, Khazohpa cha hetana heta â chhy:

21“Ei nô chhi tawhta Thluahruapa ta vaw pua na ta, Thluahruapa ta ei kua aw. Abeipa ta pie ta, Abeipa ta a la pakhua haw. Abeipa moh cha Reithaipa ta y mawh sy.”

22Cha hmo zydua liana chata, Zawbâ cha moleina rai tao leipa ta, bie do leipa ta Khazohpa reipachhie vei.

Jump to: Chapter 2 →