Job 6

Chin (Mara Bible RV (BSI))

← Chapter 5 Jump to: Chapter 7 →

1Zawbâ ta a chhy ta:

2“Aw, ei ruchhôna he panuapa châ sala, Ei vâchhiena zydua he khopathliahpa châ sala ei tah kaw dia!

3Tilaipi sadi hlâta â hri via aw; Chavâta ei biezy a chahrâh kawpa a châ.

4Atotaotheipa châtaizy ei pôhpa liata y ta, Ei thlahpa ta ama châmaih doh ta, Khazohpa chichhihna ta eina siehnao.

5Alâ hrâhpa cha sibie a bâ nota a sâh beih ma? Viahchao tôhpa chhao sâh kô a bâ nota â aoh beih ma?

6Niedo pahâh leipa cha, Alôh leipa ta nie theipa a châ ma? Awhtih tisi chhao he, Khâpa pahâna ma a hnei?

7Chazy cha ei rao ta hria khoh vei; Kei châta niedo pasichhihpa a châ.

8“Aw, ei hiapa hmô thei aw sah la cha, Khazohpa ta ei hnabeiseihna hlao patloh sala,

9Na physao khoh sala, A ku hypa ta na chhawh pachhô ha sala ei tah kaw dia!

10Cha cha ei hnangâhna châ aw ta, Ei pasa kawpa chhao ta ei reithai aw, Pathaihpa bie ei paphasai leipa vâta.

11Khâpa thatlôna ma ei hnei tly, Ei hâ lymâ chy awpa cha? Ei chhâ nawpa khâpa châ ta ma, Ei palôh ei pasisa chy aw tly?

12Ei tha he alô tha ma a châ tly? Ei sapa he dawh ma a châ tly?

13Keimasasyh a bao thei khao va na, Sona ta eina puasai haw.

14“Viasa chô liata phana a palâsa leipa cha, Atotaotheipa china a heihsaipa a châ.

15Ei unawhzy cha vahtie hawhta a pahnieh tlâh leipa châ ei ta, Vâsua tihry hawhta a kuapa ama châ.

16Chavah kao dâhaw tlo ta pavyh khai ta, Dâhaw chhao hmô theipa châ khao leipa ta, Châhrasala dâhaw tlo cha zao ta, A kua heih tyhpa chavah hawh ama châ.

17Ama zao nahta lei ei ta, A lalôh nahta ama su tawhta ama pai ha tyh.

18Ama lâpi tleisaipa ta, Râhchawhpa lâ a khypa sôhpaliepazy cha ama leidia tyh.

19Temâ sôhpaliepazy ta ti tlua ei ta, Sebâ khitlyhpazy ta ti hmô awpa ama hnabeiseih.

20Amâ ngâpô tupa vâta, Maophyuhpa ta y ei ta, A su tlô ei ta, Hnabeidypa ta ama y.

21Khâ hmah châ khao veih ei chi; Chhiena ei tyhpa hmô ei chi ta, Nama chi kaw hih.

22‘Ei moh ta hmopiepa na taopa teh u,’ ei cha tah ei ma? ‘Nâmo sôh tawhta panaopapana na piepa teh u,’ ei cha tah hra ei ma?

23‘Khakhaipa ku tawhta na pachha teh u,’ ei cha tah rai ei ma? ‘Nôchhiepa ku tawhta na chatlai teh u,’ ei cha tah hra ei ma?

24“Na pachu u la, ei chalih aw, Ei tao pado leipa na pahnosa teh u.

25Biedopa cha a thatlô kaw mâh tâh! Nâmo chhoreina deikua he, Kheihawhpa chhoreina ma a châ tly?

26Hnabeidypa bie cha ziza hawhta pachâpa ta ma, Maochhiena bie ma nama tlua?

27Paw hnei leipazy hmo chhu awpa ta, Nuby a dao khoh thlâh ha ei chi ta, Sôh ta nama viasa a zuah khoh thlâh hapazy nama châ.

28“Tahmâ zawh a ngiah u la, Ei hmia na moh tua rai u, Hmiachhy ta haipa bie a reih awpa chi ei châ ma?

29Nama palôh a thla teh u; Hmo doleipa tao cheita khuh vy. Pachâ pathi tua u, Adoleina hnei cheita va na.

30Ei hmao liata adoleina a y ma? Ei pakah ta hmo pha leipa pahno thei vei ma?” tah ta.

← Chapter 5 Jump to: Chapter 7 →