Job 20

Chin (Mara Bible RV (BSI))

← Chapter 19 Jump to: Chapter 21 →

1Nâmâ chyhsa Zôpha ta a chhy ta:

2“Ei nôpona palôh ta châ chhy awpa ta einâ hnaw, Thata patypamâpa ei châpa vâta.

3Ei nohzao nawpa maochhiena bie thei na ta, A chhy awpa ta ei novâhna thlahpa ta ei palôh eina pahra.

4He hawhpa hmo he hlâno tawhta y ta, Alei liata chyhsapa y rakha tawhta y ha ta;

5Hmoparaopa thaphana cha chyuta ta, Khazoh a pahno leipa alyna cha buakha deita a châ tahpa pahno beih va chi ma?

6A rônahna ta avâzy daipa ta, A luh ta meihdo tlô hra sala,

7Ano ie hawhta chhâzaw ta leidia aw ta, A vaw hmô hapazy ta, ‘Khataih lia a y haw?’ ama tah aw.

8Mâ hawhta a zaw aw ta, Hmôpa châ khao leipa aw ta, Zâ aluahna hawhta chadai paipa a châ aw.

9Ano a hmô tyhpa mo ta hmô khao leipa aw ta, A yna su ta ano cha moh khao aw vei.

10A sawzy ta sipasapazy khokheina tlua aw ei ta, Ano ku ta a sôh a papai aw.

11A ruzy cha thyutlia thatlôna ta bie ta, Châhrasala a hnohta dohlei liata â zia aw.

12“Moleina cha a pakah liata thlôh kaw ta, Chavâta a palei ry liata nyu ta,

13Pathlie awpa pasaih leipa ta, A pakah chhôh liata khâchâ paô hra sala,

14A py liata pati a ypa cha a vaw nano ta, A chhôh liata chyuphao châmaih lâta â lie haw.

15Hneirôna a palâpazy cha pali lilaw heih ta, Khazohpa ta a py tawhta a thy pathlah khai ha tyh.

16Chyuphao châmaih sy aw ta, Vâzi pakah ta a thie aw.

17Vahtiezy hmô leipa aw ta, Kheihti nata sâhpiti lona chavahzy hmô hra aw vei.

18A hriapasana thei nie leipa ta pakua aw ta, A sôhpaliena athôhna liata lôhrâtlôpa ta y aw vei,

19Dyhchhiepa tlybaipa ta siesai ta, A sa leipa o a chhupa vâta.

20“A pavyhpi aohraohpa ta palôtlâh â paoh beih leipa vâta, A aohkhopa cha pahlôh leipa ta a nie khai lymâ tyh.

21A nie khai tawhta laibâhpa rai y khao tyh leipa ta, Chavâta a hneinazy a daih parei aw vei.

22Â tivy chaina daihti liata nôpona a tyh aw ta, Dyhchhiepa to ta ama ku ama hy thlu aw.

23Py biepa nata lôhrâtlôpa ta a y nota, Khazohpa ta a pathiiana a chô liata vaw tuah aw ta, A hriena chaihhrai ta avâ hawhta a sua thlu aw

24Thua chaihrai â râsaipa chhao ta, Dawh libaw ta a ka pahlie aw.

25Libaw cha a pôhpa tawhta phiapa châ ta, Libaw hmao pathliepa a hmôkhaw tawhta vaw pua ta, China ta a chô liata a tla thlu.

26A ryusôhpazy chô liata zoh kaluhna a chhoh thlu aw ta, Zie leipa mei ta ano cha palâ aw ta, A poh o liata pahlôhpa zydua a kâ khai aw.

27Avâzy ta a thaileichâna phuah aw ei ta, Alei ta ano cha a thyuhnao aw.

28Tisaih ta a o ly aw ta, Khazohpa pathiiana no liata a phaoh pathlah ha aw.

29Cha cha chyhsa moleipa châta Khazohpa tawhta a tovyuh châ ta, A ryuto châta Khazohpa raopa a châ,” tah ta.

← Chapter 19 Jump to: Chapter 21 →