Job 16

Chin (Mara Bible RV (BSI))

← Chapter 15 Jump to: Chapter 17 →

1Zawbâ ta a chhy ta:

2“Cha hawhpa hmo cha ei hluhpi ei thei haw, Nama zydua ta thlapalôhtuh pachâchhiechhihpa nama châ khai.

3Ziza biezy ta chhâna a hnei aw ma? Khâpa ta cha pareisa ta ma cha hawhta nâ chhy tly?

4Ei duahmo liana he nâmo y u la, Kei chhao nâmo hawhta ei rei thei thlâh ha hra mâh tâh; Biezy ta cha tla thlu aw ei na ta, Ei luh ei cha chahuah thlu thei thlâh ha hra ei mâh tâh.

5Châhrasala ei pakah ta tlao tha cha patlô aw ei na ta, Ei hmao hnapangâhna ta nama pasana tlao a pahua aw.

6“Ei reipa chhao ta, Ei pasana a hua via hlei leipa ta; Maoh ei ohpa chhao ta, Ei pasana na siesai hlei vei.

7Hy Khazohpa, ei tha pachha ha chi ta, Ei lailâhzy na pamua khai ha he zaw.

8Na pazaoh khai ha chi ta, Ei zaohna cha ei châna pahnokheituhpa châ ta; Ei chaohna ta na thyuhnao ta, Hmiadaisâ ta eina leih hih.

9Hiehâhpa ta Khazohpa ta na hriechheihpa ta na taola ta, A hâh na charieh chie ta, Ei khakhaipa ta eina mochakhi.

10Ama pakah na pakawh chiepa ta, Sâlâ kawpa ta ei baih na chabaih ei ta, A paraoh ei ta eina tei ei.

11Khazohpa ta moleipazy ku liata na hlâ ta, Hmoparaopazy ku liata eina thy.

12Thadâhpa ta y na ta, Ano ta eina pakeichheih khai haw; Ei rao ta na patupa ta na taikhy ta, Châka anuana châta na hmâh ta,

13A likathaipazy ta eina chadô ei. Ei lôpozy chado leipa ta patlawchheih ta, Ei hmôkhaw alei liata a leihtha.

14Raona nata raona a pathopa ta na parao ta, Pasaipha hawhta einâ râ thlu.

15Ei vo chô liata latho poh bieh na ta, Dohlei liata ei tha ei soh.

16Ei chana ta ei hmia saih khai ha ta, Ei mo vo liata thina nohpahli a y,

17Ei kuzy ta thachahra hmâh leipa ta, Ei thlahchhâna a pathaih thlâh hapa chhao ta.

18“Hy leilô y, ei thisaih khu leipa la, Ei chana ta apahâna su hmô khah sy.

19Tahmâ chhao he moh teh u, Nâ pahnokheituhpa cha avâ liata y ta, Ei châta a duahpa cha su sâhpa liata a y.

20Ei viasazy ta na zakhei ei ta, Ei mozy ta Khazohpa lâ mothlih ama pathla.

21Chyhsa hmia liata bie a duakheipa hawhta, Ano ta Khazohpa hmia liata chyhsapa he a duakhei se ei tah kaw dia!

22Kô chyhta a khô tawhta, Heih lei râh lâ sie aw na ta, Vaw kua khao aw va na.

← Chapter 15 Jump to: Chapter 17 →