Job 30

Chin (Mara Bible RV (BSI))

← Chapter 29 Jump to: Chapter 31 →

1“Tahmâ deikua cha, Kei hlâta seihnai viapazy ta na pahneisao ei ta; Ei sahroh vaituhpa izy hry liata pahlao awpa ei khoh leipa Ama pawzy khata eina pahneisao bâ ei.

2Chyhsa thachhâ hapazy tlai cha, Ama ku thatlôna tawhta khâpa athôhna ma ei hmô aw tly?

3Phahlapa nata nodipa ta zaoh ei ta, Râraohpa nata roryhrapa chhaohlei zy zâ ta patei ei ta;

4Thobuh hnazy nata âhnalasi iahpazy lyupa ta, Ophi thari taihta ama nie.

5Chyhsapa akaona tawhta papuapa châ ei ta, Parutuhpa hawhta ama awsao laih.

6Chavah kao hipazy liata pahrâ ei ta, Leikhaoh nata lôkhaohzy liata ama pahrâ.

7Thobuhzy hry liata sâh ei ta, Thlahbei ry liata amâ pahmaoh.

8Hmo a pahno thai leipa, dyutlai leipa sawzy châ ei ta, Râh tawhta papuapa ama châ.

9“Tahmâ deikua cha hla ama sa chakiapa châ na ta, Ama saiso bie lâta ei pua haw.

10Na pasipa ta nâ pasiesai ei ta, Kâchhie leipa ta ama pachih eina pachhao chie ei.

11Khazohpa ta ei libaw ri pathlâ ta eina panawh hapa vâta, Ei hmiakô liata asohsina hnei khao veih ei.

12Ei chachâh lâta chyhsa chhiepazy thyu ei ta, Keihzai na phi ei ta, Ama paraona hrozie chhiepa ta eina hro thlu ei.

13Ei lâpi parao ei ta, Ei chhie nawpa ta na tei ei ta, Bao a ngiah veih ei.

14Apyupa liata ti puapa hawhta vaw pua ei ta, Vahpi ti hawhta raokeina hry liata amâ vaw chakhao.

15Chichhihnazy ta nâ palie thlu ei ta, Ei zachhihna cha thlih hawhta phaopa ta y ta, Ei nohlaona chhao meihdo hawhta a pai haw.

16“Tahmâ ei hrona patlai thlupa ta y na ta, Rietheina nohzy ta eina vi.

17Zâ ta ei ruzy ta na chaih ta, Ei pasana cha achalihna rai hnei vei.

18Ei chysia dâhdei chhao phiapahripa ta a thla na ta, Ei viahkao rao cha ei chai â su ha bâ.

19Khazohpa ta chiatlao liata na thy ta, Dohlei nata buchâh hawh dei ei châ bâ.

20Hy Khazohpa, cha aw na ta, nâ chhy khoh leipa chi ta, A duah na ta, tlâ eina moh chi.

21Ei chô liata nôchhiepa ta y chi ta, Na ku thatlôna ta eina taola chi.

22Thlih lâ na chalopa ta a chô lia na pakiasa chi ta, Thlihpipa ta phao pahaipa ta eina so chi.

23Thina lâ einâ chhi aw chi tahpa pahno na ta, Ahropa zydua châta raopa o lâ einâ chhi aw chi tahpa ei pahno.

24“Chatahrasala raona ta a vao hapa chyhsa cha, A ku kaw chaluah aw ta; Chhiena â tyhna liata bao awpa ta, Awh thlyu aw vei ma?

25Chhiena noh â tyhpa chakhei tyh va na ma? Phahlapa châta ei palôh pasa kaw tyh vei ma?

26Châhrasala hmo phapa ei hnabeiseih nota, Hmo chhiepa vaw tlô ta; Khaihna ei hâ nota, Zohna tlao a vaw tlô.

27A chalih beih leipa ta ei chhôh a tlao ta, Pasataona nohzy ta eina vaw dy.

28Noh khaihpa y leina zohna liata charei na ta, Ahmaohna liata a duah na ta, baona ei hia tyh.

29Savaizy unawhpa châ na ta, Vawpôzy viasa ei châ.

30Ei vo vaw vyhpa ta ky ta, Ei ruzy palopa ta eina kâ.

31Ei totâ pyu cha mâchhiesana pyu lâta a lie ta, Ei ramo pyu cha chana pyu lâta â lie haw.”

← Chapter 29 Jump to: Chapter 31 →