Job 18

Chin (Mara Bible RV (BSI))

← Chapter 17 Jump to: Chapter 19 →

1Suhi chyhsa Bildâ ta a chhy ta:

2“Khachâ ma biethâh na tlua chy aw? Pachâ ha tua la, cha khai tawhta eima reih aw.

3Khazia sahroh hawhta miah pachâ chi ta, Na mohmô liata ahrupa ta miah na rao?

4Hiehâhpa ta nâmasasyh a chaphiepa chi cha, Nâma châta alei siesaipa a châ aw ma? Lôpanô a su tawhta pasiepa a châ aw ma?

5“A châ na, moleipa khaihna cha pachhaipa châ aw ta, A meipaleih chhao khaih aw vei.

6Ano poh o liata cha khaihna chhao zoh aw ta, A luh chô liata meiôh pachhaipa a châ aw.

7A lâsie chahrapa cha thapachhâpa châ aw ta, A ryhraona ta ano cha a thy pathlah aw.

8Ano phei tlai ta sao lâ a chhi aw ta, Khoheih khaoh chô liata a sie aw.

9Sari ta a phei ngavâhmaothy pa-ao aw ta, Khoheih ta ano cha a patu aw.

10Alei liata heihbaw pakaw khâhpa châ aw ta, Lâpi liata sari chôkhâhpa a châ aw.

11Chichhihna ta su to liata pachisa aw ta, A chadai aw ta a parâsa aw.

12A thatlôna panao aw ta, A papao awpa chhiena cha a mâ chiehpa ta a y.

13Chhiena ta a vozy nie aw ta, Thina sawchapaw uhtheipa ta a kupheizy a nie khai aw.

14Â pahniehna poh o tawhta phiapa châ aw ta, Chichhihpa beizy lâ a chhipa a châ aw.

15A chyhsa a châ leipazy a poh o liata pahrâ aw ei ta, A pahrâna liata kaih hiepa a châ aw.

16A ry lâta a thari raoh aw ta, A chô lâta a chiahzy a uah aw.

17Ano atheithlâhna alei tawhta lei aw ta, Lâpi liata a moh y aw vei.

18Khaihna tawhta zohna lâ topa châ aw ta, Khizaw tawhta a chadaipa a châ aw.

19A phopi hry liata chipathla tlyma sawteih nawhteih tlyma hnei leipa aw ta, A pahrâ tyhna liata a hrohpa y aw veih ei.

20Notla chyhsazy ta a vâchhiena cha noâh tah aw ei ta, China ta nochhi chyhsazy a tla thlu aw ei.

21Moleipazy pahrâna cha, cha hawhta châ aw ta, Khazohpa a pahno leipazy pahrâna su chhao, cha hawhta a châ aw,” tah ta.

← Chapter 17 Jump to: Chapter 19 →