Job 4

Chin (Mara Bible RV (BSI))

← Chapter 3 Jump to: Chapter 5 →

1Temani chyhsa Eliphâ ta a chhy ta:

2“Na hnohta bi kawh kha reih aw sah la, Na palôh a chhie aw tly ma? Chatahrasala ahy ma rei leipa ta a y thei aw?

3Moh tua, chyhsa hluhpi pachu ha chi ta, Ku chiehleipazy tha na patlô haw.

4Na biezy ta a hluahpazy pathyu ta, Pakhu thazeipazy tha na patlô tyh.

5Châhrasala tahmâ na chô lia vaw tlô ta, Palôh chhiepa ta na y; Cha hria ta, Ngiarohpa ta na y.

6Na Khazohpa china cha na ngâhna châ tyh vei ma? Na lâpi dopazy cha na hnabeiseihna châ tyh vei ma?

7“Pachâ tua, chyhsa dopa a leidia beih ma? Khataih liata ma mosiapa chhawh pathlahpa ta a y?

8Ei hmô ha ei, Paraona leipalie ta, Tymâna chi a tupazy cha, Chazy tlai cha ama hria tyh.

9Khazohpa hu ta leidia ei ta, A hiehâhna thlih ta a hmôsao ei.

10Chakeibarôhneipa a rôh hra sala, Chakeibarôhneipa hrâhpa ta ao papua hra sala, Chakeibarôhneipa thatlôpa hâhzy cha thliepa ta a y tyh.

11Chakeibarôhneipa thatlôpa cha sa y lei vâta thi ta, Chakeibarôhneipa panô tawzy pai patlapa ta ama y.

12“Arulâta ei hnohta bie vaw tlô ta, Ei nah ta bieparu a thei.

13Zâ saduthlienazy hry liata, Chyhsazy mokuh pahâpa ta amâ mô chhôh ta,

14China nata chalyuna na vaw tlô thlu ta, Ei ru zydua a chathosa khai haw.

15Thlahpa ta ei hmia na vaw chapia ta, Ei pôhhmi thata â loh.

16A duah thlâh ha ta, Châhrasala a pizie pahno thei va na. A nothlahpa ei hmia liata vaw y ta, Dâh karoh ha ta, Chatawhcha ao thei na ta:

17‘Thitheipa he Khazohpa hlâta a sia via thei aw ma? Chyhsapa he a taotuhpa hlâta a pathaih via thei aw ma?

18A chakaotuhpazy hmahta ngâ leipa sala, A vâlyuhchâpazy taopasipa ta a bai khiah ei ta cha,

19Beihlei o liata a pahrâpazy, Dohlei liata abôna lô a bôpazy, Tâbalâpa hawhta thie naopazy chhochhi cha, A ngâ lei pachai aw dia!

20My nata zâ likawh ta leidia ei ta, Ahy hmah pahno hmâ leipa ta, Chhâzaw ta ama leidia tyh.

21Ama poh o rizy chhiepa châ ta, Sona hnei leipa ta thi tyh veih ei ma?’” tah ta.

← Chapter 3 Jump to: Chapter 5 →