Job 42

Chin (Mara Bible RV (BSI))

← Chapter 41 Jump to:

1Chatawhcha Zawbâ ta Abeipa cha a chhy ta:

2“Ato na tao thei tahpa ei pahno, Nâ chhuah hapa cha khâpa hmah pakhâ theipa châ vei.

3‘Pahnona hnei leipa ta ei ryhraona a nyuthutuhpa cha, Ahy ma a châ tly?’ na tahpa hawh tlai ta, Ei novâh leipa biezy vaw reih na ta, Ei pahno leipa bie, kei châta noâhchhihpa biezy ei vaw reih ha tlai.

4‘Nathlie teh, Bie ei reih aw; Bie cha hiahri aw na ta, Nâ chhy mah y,’ tah chi ta.

5Nah ta cha thei ha na ta, Tahmâ deikua cha ei mo ta ei cha hmô haw.

6Chavâta keimasasyh ta thailei a pachâ na ta, Dohlei nata buchadoh liata a tyuhpa ta ei ro haw,” tah ta.

7Abeipa ta Zawbâ hnohta cha biezy cha a rei khai nahta, Abeipa ta Temani chyhsa Eliphâ hnohta, “Nâma nata na viasa panozy chô liata ei hie a hâh ngaita. Nâ chakaotuhpa Zawbâ hawhta ei thâtih â dopa ta reih veih ei chi.

8Chavâta tahmâ viahchao tôhpa po sari nata mietaku tôhpa pô sari a chhipa ta, nâ chakaotuhpa Zawbâ lâ vawh u la, nâmo châta raopa hlâna kei hlâ muh vy. Nâ chakaotuhpa Zawbâ ta a reipa hawhta, ei thâtih â dopa ta reih leipa ei chi ta, châhrasala nâ chakaotuhpa Zawbâ ta thlah cha chhâpa aw ei ta, a thlahchhâna cha a pyh awh na ta, nama hruna hawhta nama chô liata hmo tao aw va na,” tah ta.

9Chatanachata Temani chyhsa Eliphâ nata Suhi chyhsa Bildâ nata Nâmâ chyhsa Zôpha zy cha vawh ei ta, Abeipa ta bie a piepa hawhta kei tao ei ta, Abeipa ta Zawbâ thlahchhâna cha a pyh ta.

10Zawbâ cha a viasazy châta thlah a chhâ khai nahta, Abeipa ta Zawbâ cha a hneirôna vaohei heih ta. Abeipa ta Zawbâ cha kha hlâta a hneipa hlâta a lie no ta pie ta.

11A unawhpa nata a sietanô zydua nata kha hlâta a hmiapahnopa zydua ano lâ a vy ei ta, a o liata a hnohta pati dôh ei ta. Abeipa ta a chô liata hmo pha leipa a patlôsapa zydua vâta taokheipa ta a thlapalôh ei ta. Tâkâ nata ngôh kusadizy pie chyu ei ta.

12Abeipa ta Zawbâ cha, a daihti hmiatuapa hlâta a daihti hnôhlâ liata byhnâ thata pie via ta, mietaku 14,000, râraoseihpa 6,000, viahchao tôhpa bao 1,000 nata alâ panô 1,000 a hnei.

13Sawchapaw pasari nata sawchanô pathôh a hnei hra.

14A sawchanô uhtheipa moh cha Zemimâ bi ta, a panona Kezia bi ta, a pathôhna moh cha Kerehapu a châ.

15Cha râh zydua liata Zawbâ sawchanôzy hawhta chanô hmi phapa y veih ei. Ama paw ta ama rilâhpazy hry liata ryuto a rai hra ei.

16Cha hnôhlâ ta Zawbâ cha kô 140 hroh via ta, a sawchapawzy, a samohzy, a sahlâhzy, a sachhihzy hmô ta, a pathlazy chhâ palih taihta hmô ta.

17Chatanachata Zawbâ cha machâ karôna taih hroh ta, chhâ a palopa ta a thi.

← Chapter 41 Jump to: