Job 27

Chin (Mara Bible RV (BSI))

← Chapter 26 Jump to: Chapter 28 →

1Zawbâ ta a biereipa cha a duakheipa ta reih heih ta:

2“Ei pikhei adona nâ lapatuhpa Khazohpa hrona reipa ta reih na ta, Ei hro pachâ a parôhsapa Atotaotheipa hrona reipa ta ei reih.

3Keima liata ei hu y chy ta, Ei hnapasu liata Khazohpa thlahpa a y chhôh cha,

4Ei hmao ta biedoleipa reih leipa aw ta, Ei paleih ta dôveina bie reih aw vei.

5Thai ei cha pachâ thei nawpa ei â hla ngaita, Ei thina taihta ei dona a pasiesai aw va na.

6Ei siana khâchâ patu aw na ta, Pathlie beih aw va na; Ei noh hmâ hapazy vâta, Ei palôh ta na maochhie vei.

7“Ei chariahpa cha moleipa hawh châ sala, Nâ thyuhnaopa cha sialeipa hawh châ mawh sy.

8Khazohpa ta ano a pachâ leipa chhawh pathlah ta, A hrona a la tita, A châta khâpa hnabeiseihna ma a y?

9A chô liata atymâna a vaw tlô tita, Khazohpa ta a awna a thei aw ma?

10Atotaotheipa liata â ly aw ma? Khazohpa cha khatino rai ta a pado aw ma?

11Khazohpa hmotaotheina kyh cha pachu aw ei na ta, Atotaotheipa liata a ypa phih aw va na.

12Moh teh u, cha hmo cha nâmo tlai ta hmô ei chi ta, Kheihtazie ta ma hraoleipa nama châ khai thlâh ha tly?

13“Moleipa ta Khazohpa liata a tovyuh awpa cha he he châ ta, Tlybaituhpazy ta Atotaotheipa tawhta ama ryuto awpa cha he he a châ:

14A sawzy ama pôhpa chhao ta, Zaozi châta châ aw ei ta, A pathlazy ta nie khi hnei aw veih ei.

15A thisaipazy cha potlana ta pabu aw ei ta, A nôhmeizy chaphôhtu aw veih ei.

16Dohlei hawhta tâkâ pachopa ta, Beihlei hawhta chysia pathlu hra sala,

17Chysia a pathlupazy cha mosiapa ta a tobi aw ta, Thaichâpazy ta a tâkâ cha amâ rai aw.

18A o sapa cha chiariapa bu lyu ta, Vaituhpa riebu sapa hawh a châ.

19Hneirôpa ta a zia tyh ta, Châhrasala cha hawhta châ khao aw vei; A mo padeih ta, A hneirôna a lei haw.

20Chichhihna ta tisaih hawhta tlô thlu ta, Khisô ta zâ ta a siekhei haw.

21Nochhi thlih ta phaopa ta lei ta, A su tawhta a chanaoh pathlah haw.

22Khazohpa ta zawngiah leipa ta ano cha chanaoh ta, A hmotaotheina tawhta rawrôhpa ta â râ.

23A ku chabaih chie ta, A su tawhta a hmao a tô chie.”

← Chapter 26 Jump to: Chapter 28 →