Job 2

Chin (Mara Bible RV (BSI))

← Chapter 1 Jump to: Chapter 3 →

1Vâmozy Abeipa hmiakô liata amâ luahna noh vaw tlôh heih ta, Sâtâ chhao âmo hry liata a hlaopa ta Abeipa hmiakô liata a vaw luah hra ta.

2Abeipa ta Sâtâ hnohta, “Khataih tawhta a vypa ma na châ?” tah ta. Sâtâ ta Abeipa cha a chhy ta, “Alei chô liata vawh heih, a vy heih, khy heih, zu heih tahna tawhta â vypa ei châ,” tah ta.

3Abeipa chata Sâtâ hnohta, “Nâ chakaotuhpa Zawbâ thâtih na pachâ beih ma? Alei chô liata ano hawhpa rai y veih ei. Ano cha seina hnei leipa, chyhsa dopa, Khazohpa a chipa nata moleina a heihsaipa a châ. A chhâpa y leipa ta ano cha pahleipadia awpa ta na pasyu chi ta, châhrasala â dona cha â ipa ta khâ a patu,” tah ta.

4Sâtâ ta Abeipa cha a chhy ta, “Vo vyuhpa ta vo! Chyhsa ta a hrona châta a hneina zydua a pie pasaih aw.

5Tahmâ na ku pazawh la, a rupa nata a sapa hria la, hmiachhy ta chhie a cha sapa aw,” tah ta.

6Abeipa ta Sâtâ hnohta, “Moh teh, ano cha na ku liata a y. A hrona deikua na pahlôh awpa a châ,” tah ta.

7Sâtâ cha Abeipa hmiakô tawhta pua ta, Zawbâ cha a pheipazah tawhta a laki taihta kheihluh ru ngaitapa pathlasa ta.

8Buchâh liata a tyuh ta, beihkaopa ta a hmah cha haokhy ta.

9A lapinô ta a hnohta, “Na ngâchhihna cha tahmâ taihta â ipa ta na patu lymâ aw ma? Khazohpa chô liata chhiesa la, thi thla ha bâ mah y,” tah ta.

10Zawbâ ta a lapinô hnohta, “Chanô hrupa bie rei ta dua na rei thlâh haw. Khazohpa tawhta hmo phapa hmô pi ta, hmo chhiepa chhao eima hmô hra awpa châ vei ma?” tah ta. He hmo zydua liana heta, Zawbâ chata a hmao ta moleina hmo rai reih vei.

11Zawbâ viasa pathôhzy ta Zawbâ chô liata hmo pha leipa a tla thlupa zydua cha ama thei nahta, Temani chyhsa Elipha, Suhi chyhsa Bildâ nata Nâmâ chyhsa Zôpha zy cha ama yna su chyu tawhta a vy ei ta. A pahrua ei ta, Zawbâ ama pasakheina palâsa ta thlapalôh awpa ta hmaohkha ta vaw tlô ei ta.

12Lâhla tawhta vaw hmô ei ta, a hmia chhao siah khao leipa ei ta. Aoh tlili ta cha ei ta, ama chysiazy hrie ei ta, avâ lâ buchâh pathluahpa ta ama luh chô liata hie ei ta.

13Noh sari nata zâ sari chhôh a hnohta alei liata a tyuh ei ta. A pasana a paru ngaitapa ama hmôpa vâta, bie chhao a chho thei veih ei.

← Chapter 1 Jump to: Chapter 3 →