2 Samuel 10

Ilonggo (Maayong Balita nga Biblia (2012))

← Chapter 9 Jump to: Chapter 11 →

1Sang ulihi, si Nahas nga hari sang mga Amonhon napatay, kag ang iya anak nga si Hanun amo ang naghari.

2Si Haring David nagsiling, “Pakitaan ko sing kaayo si Hanun, subong sang ginhimo sa akon sang iya amay nga si Nahas.” Gani si David nagpadala sing mga mensahero sa pagpakita sang iya pagbuylog sa kalisod ni Hanun. Sang pag-abot nila sa duta sang Amon,

3ang mga pangulo nga Amonhon nagsiling sa hari, “Nagahunahuna ka bala nga si David nagpadala sini nga mga tawo sa pagbuylog sa imo kalisod sa kadungganan sang imo amay? Indi! Ginpadala niya sila diri subong mga espiya sa pag-usisa sang siudad, agod ila ini maagaw sa aton!”

4Si Hanun nagpadakop sang mga mensahero ni David, kag ginpakiskisan ang pihak nga bahin sang ila bungot, gingutrab ang katunga sang ila bayu tubtob sa ila balikawang, kag iya sila ginpapauli.

5Sang pagkabati sini ni David, nagpadala sia sing mga tawo sa pagsugata sa ila, kay ang mga tawo nahuya sa pagkadto sa iya. Nagtugon sia nga magpabilin sila sa Jerico tubtob magtubo ang ila bungot, kag dayon magpauli.

6Nahibal-an sang mga Amonhon nga nanginkaaway na nila si David, gani nagsuhol sila sing 20,000 ka mga hangaway nga Serianhon halin sa Betrehob kag Soba, 12,000 ka mga tawo halin sa Tob, kag sa hari sang Maaca nga may 1,000 ka mga tinawo.

7Nabatian ini ni David kag ginpadala niya si Joab upod ang bug-os nga hangaway.

8Ang mga Amonhon naggwa kag naghanda sa pagpakig-away sa pwertahan pakadto sa Raba, ang kapital nga siudad, samtang ang mga Sirianhon, kag ang mga tawo halin sa Tob kag Maaca naghanda sa pagpakig-away sa kawayangan.

9Sang pagkakita ni Joab nga ang iya mga kaaway magasalakay sa atubangan kag sa likod, nagpili sia sang labing maayo nga mga soldado sang Israel kag ginpaatubang sila sa mga Sirianhon.

10Ang iban niya nga mga hangaway ginpadumalahan niya kay Abisai nga iya utod, nga nagpaatubang sa ila sa mga Amonhon.

11Si Joab nagsiling sa iya, “Kon makita mo nga ginalutos ako sang mga Sirianhon, mag-abot ka sa pagbulig sa akon, kag kon ang mga Amonhon magalutos sa imo kadtuan ko ikaw kag buligan.

12Magpakaisog ka! Magpakig-away kita sing tudotudo para sa aton mga tawo kag para sa mga siudad sang aton Dios, kag kabay nga himuon sang Ginoo ang iya ginahunahuna nga labing maayo!”

13Si Joab kag ang iya mga soldado nag-abanse sa pagsalakay, kag ang mga Sirianhon nagpalalagyo.

14Sang pagkakita sang mga Amonhon nga ang mga Sirianhon nagpalalagyo, nagpalagyo man sila kay Abisai kag nagbalik sa siudad. Dayon si Joab nag-untat sa iya pagpakig-away batok sa mga Amonhon kag nagpauli sa Jerusalem.

15Ang mga Sirianhon nakatalupangod nga nalutos sila sang mga Israelinhon, gani gintipon nila ang tanan nila nga mga hangaway.

16Si Haring Hadadezer nagpasugo sa mga Sirianhon nga yara sa sidlangan sang Suba sang Eufrates, kag nagkadto sila sa Elam sa pagpangulo ni Sobac nga pangulo sang mga hangaway ni Hadadezer sang Soba.

17Sang pagkabati sini ni David, gintipon niya ang mga hangaway sang Israel, gintabok ang Suba sang Jordan kag nagkadto sa Elam, sa diin ang mga Sirianhon naghanda sa pagpakig-away batok sa iya. Ang inaway nagsugod,

18kag ang mga Sirianhon ginlagas sang mga Israelinhon. Si David kag ang iya mga tinawo nagpatay sang 700 ka mga Sirianhon nga nagasakay sa ila karwahi, 40,000 ka mga hangaway nga nagasakay sa kabayo, kag napilasan nila si Sobac, ang pangulo sang ila mga kaaway nga napatay didto sa patag-awayan.

19Sang matalupangdan sang mga hari nga sakop ni Hadadezer nga nalutos na sila sang mga Israelinhon, nagpakighidait sila sa ila kag nanginsakop sang mga Israelinhon. Kag ang mga Sirianhon nahadlok na gid magbulig sa mga Amonhon.

← Chapter 9 Jump to: Chapter 11 →