2 Samuel 13

Ilonggo (Maayong Balita nga Biblia (2012))

← Chapter 12 Jump to: Chapter 14 →

1Si Absalom nga anak ni David may matahom nga utod nga babayi nga ginahingalanan kay Tamar. Ang isa sang mga anak nga lalaki ni David nga si Amnon naluyag kay Tamar.

2Sa daku niya nga paghigugma nagmasakit sia. Naghunahuna sia nga daw indi mahimo nga maangkon niya si Tamar kay birhen sia kag tungod sini gindumilian sia sa pagpakig-impon sa mga lalaki.

3Pero may abyan sia nga tama ka tuso nga ginahingalanan kay Jonadab, anak sang utod ni David nga si Sama.

4Si Jonadab nagsiling kay Amnon, “Anak ikaw sang hari, pero kada adlaw makita ko ikaw nga nagapangasubo. Ano bala ang kabangdanan?” Nagsabat sia, “Naluyag gid ako kay Tamar, ang utod sang akon utod sa amay nga si Absalom.”

5Si Jonadab nagsiling sa iya, “Maghigda ka kag magpamulomasakit. Kon ang imo amay magduaw sa imo, singgana sia, ‘Kon mahimo pakadtua ang akon utod nga si Tamar kag sia ang magpakaon sa akon. Luyag ko nga diri sia magluto sing pagkaon agod makita ko sia, kag dayon sia gid ang maghungit sa akon.’”

6Gani naghigda si Amnon kag nagpamulomasakit. Si Haring David nagduaw sa iya, kag si Amnon nagsiling sa iya, “Kon mahimo pakadtua diri si Tamar kag magluto sing tinapay sa diin makita ko sia, kag sia gid ang maghungit sa akon.”

7Gani si David nagpahibalo kay Tamar sa palasyo: “Kadtoi si Amnon sa iya balay kag lutoi sia sing pagkaon.”

8Nagkadto si Tamar didto kag nakita niya si Amnon nga nagahigda sa katre. Nagkuha sia sing harina, ginlamas ini, kag naghimo sing pila ka bilog nga tinapay sa diin makita sia ni Amnon. Dayon nagluto sia sing pila ka bilog nga tinapay,

9kag ginbak-it niya ini sa kalaha kag ginpakaon kay Amnon, pero indi sia magkaon. Nagsiling sia, “Pagwaa sila tanan” kag tanan sila naggwa.

10Dayon nagsiling sia sa iya, “Dalha diri ang tinapay sa akon higdaan kag hungita ako.” Gindala niya ang tinapay kay Amnon.

11Samtang ginahungit niya si Amnon, ginhakos sia ni Amnon kag nagsiling, “Dali, hulid ka sa akon!”

12Nagsiling si Tamar, “Indi, indi ako paglugosa! Makahuloya ini! Indi ka maghimo sining malaw-ay nga butang!

13Ano nga guya ang akon ipakita sa mga tawo? Kag ikaw, mahuy-an gid sa Israel. Kon mahimo hambala ang hari, kag siguro gid nga ihatag niya ako sa imo.”

14Pero indi si Amnon magpamati sa iya, kag tungod kay mas makusog sia sang sa iya, ginlugos niya sia.

15Sa tapos sini si Amnon nainit gid sa iya, ang iya kaakig karon sobra pa sa iya gugma sang una, kag gintabog niya si Tamar.

16Nagsiling si Tamar sa iya, “Indi mahimo! Ang imo pagtabog sa akon mas daku pa nga sala sang sa imo ginhimo sa akon!” Pero si Amnon indi magpamati sa iya,

17gintawag niya ang iya suloguon kag nagsiling, “Ipahilayo ini nga babayi sa akon! Pagwaa sia kag siraduhi ang pwertahan!”

18Ang suloguon nagpagwa kay Tamar kag ginsirahan niya ang pwertahan. Si Tamar nagabayo sing malaba nga may mga pako nga malaba, ang bayu nga ginasuksok sang mga prinsesa nga wala pa sing bana sa sadto nga mga panahon.

19Ginsabwagan niya sing abo ang iya ulo, gingisi ang iya malaba nga bayu, kag gintabunan niya ang iya guya sang iya mga kamot kag naglakat nga nagahibi.

20Ang iya utod nga si Absalom nagpamangkot sa iya, “May malain bala nga ginhimo si Amnon sa imo? Indi pag-ipanugid ini, Tamar. Kon sa bagay imo sia utod sa amay. Indi ka lang magpangasubo.” Gani si Tamar nag-estar nga masinulob-on kag isahanon sa balay ni Absalom.

21Sang mabatian ni David ang nahanabo, nagpagot sia sa kaakig.

22Gindumtan gid ni Absalom si Amnon tungod kay ginlugos niya ang iya utod nga si Tamar, kag wala na gid sia magpakighambal kay Amnon.

23Sang makaligad ang duha ka tuig si Absalom nagpagunting sang bulbol sang iya mga karnero sa Baal-Hasor malapit sa banwa sang Efraim, kag gin-agda niya ang tanan nga mga anak nga lalaki sang hari sa pagkadto didto.

24Nagkadto sia sa kay Haring David kag nagsiling, “Mahal nga Hari, nagapagunting ako sang bulbol sang akon mga karnero. Makadto ka bala upod ang imo mga opisyales?”

25Ang hari nagsabat, “Indi na lang, anak ko, mabudlayan pa ikaw kon tanan kami makadto didto.” Nagpamilit gid si Absalom, pero ang hari indi gid magpasugot kag ginpalakat sia.

26Pero si Absalom nagsiling, “Ti, kon amo ina, pakadtua bisan si Amnon na lang nga akon utod.” Ang hari nagpamangkot, “Ngaa bala pakadtuon mo gid sia?”

27Pero si Absalom nagpamilit gid tubtob nga si David nagpasugot nga pakadtuon si Amnon kag ang tanan niya nga mga anak nga lalaki upod kay Absalom. Si Absalom nag-aman sing sinalosalo nga nagakabagay sa hari,

28kag ginsingganan niya ang iya mga suloguon: “Bantayi ninyo nga kon hubog na si Amnon, masinyas ako sa inyo kag patyon ninyo sia. Indi kamo magkahadlok kay ako ang manabat sini. Magpakaisog kamo kag indi magduhaduha!”

29Gani gintuman sang mga suloguon ang sugo ni Absalom kag ginpatay nila si Amnon. Dayon ang iban nga mga anak nga lalaki ni David nagsakay sa ila mga mula kag nagpalalagyo.

30Sang yara pa sila sa dalanon pakadto sa Jerusalem, nakabaton si David sing balita: “Ginpatay ni Absalom ang tanan mo nga mga anak nga lalaki kag wala gid sing nabilin sa ila!”

31Ang hari nagtindog, naggisi sang iya bayu sa pagpangalisod kag naghapa sa duta. Ang iya mga suloguon nga yadto didto naggisi man sang ila mga bayu.

32Pero si Jonadab nga anak sang utod ni David nga si Sama nagsiling, “Mahal nga Hari, wala nila mapatay ang tanan mo nga mga anak, kundi si Amnon lang. Kay si Absalom nagpamat-od na sa paghimo sini halin pa sa paglugos ni Amnon sang iya utod nga si Tamar.

33Gani indi ka magpati sang balita nga ang tanan nimo nga mga anak nagkalamatay, kay si Amnon lang ang napatay.”

34Sa pihak nga bahin si Absalom nagpalagyo. Sa amo man nga tion, ang soldado nga nagabantay nakakita sang madamo nga mga tawo nga nagapadulhog sa bakulod sa dalanon halin sa Horonaim. Nagkadto sia sa hari kag nagsugid sang iya nakita.

35Nagsiling si Jonadab kay David, “Mga anak mo ina nga nagapakadto, subong sang akon ginsiling.”

36Sa tapos sia makasiling sini, ang mga anak nga lalaki ni David nagsulod, naghinibi sila kag si David kag ang iya mga opisyales naghilibion man sing tama gid.

37Si Absalom nagpalagyo kag nagdangop sa hari sang Gesur nga si Talmai nga anak ni Amihud, kag nagpabilin sia didto sing tatlo ka tuig. Si David naglalaw sing malawig tungod sang iya anak nga si Amnon,

39pero sang maumpawan sia sa iya kasubo tungod sang pagkapatay ni Amnon, ginhidlaw gid sia kay Absalom.

← Chapter 12 Jump to: Chapter 14 →