2 Samuel 21

Ilonggo (Maayong Balita nga Biblia (2012))

← Chapter 20 Jump to: Chapter 22 →

1Sang panahon nga si David ang hari, may daku nga gutom sa sulod sang tatlo ka tuig. Gani si David nagpamangkot sa Ginoo nahanungod sini, kag ang Ginoo nagsiling, “Si Saul kag ang iya panimalay nakasala tungod sang iya pagpamatay sang mga pumoluyo sang Gabaon.” (

2Ang mga pumoluyo sang Gabaon indi mga Israelinhon kundi sila isa ka diutay nga grupo sang mga Amornon sa diin ang mga Israelinhon nagsaad sa pag-apin sa ila, pero si Saul nagtinguha sa pagpamatay sa ila tungod sang iya kabalaka para sa mga pumoluyo sang Israel kag Juda.)

3Gani ginpatawag ni David ang mga pumoluyo sang Gabaon kag ginsingganan sila, “Ano ang akon sarang mahimo sa inyo? Luyag ko bayaran ang sala nga nahimo sa inyo, agod nga inyo mabendisyunan ang mga tawo sang Ginoo.”

4Nagsabat sila, “Ang amon inaway batok kay Saul kag sa iya panimalay indi mahusay paagi sa pilak ukon bulawan, kag wala man kami tuyo sa pagpatay sang bisan isa ka Israelinhon.” Si David nagpamangkot, “Ano karon ang luyag ninyo nga himuon ko para sa inyo?”

5Nagsabat sila, “Si Saul luyag magpapas sa amon agod nga wala sing isa sa amon nga mabilin bisan diin sa Israel.

6Gani itugyan sa amon ang pito ka mga lalaki nga kaliwat niya kag amon sila bitayon sa atubang sang Ginoo sa Gebeat, ang banwa ni Saul nga pinili nga hari sang Ginoo.” Ang hari nagsabat, “Itugyan ko sila sa inyo.”

7Pero tungod sang ila ginsumpaan ni Jonatan sa atubang sang Ginoo, ginluwas ni David si Mefiboset ang anak nga lalaki ni Jonatan kag apo ni Saul.

8Pero ginkuha niya si Armoni kag si Mefiboset, ang duha ka mga anak nga lalaki ni Rizpa, nga anak nga babayi ni Aya nga natawo kay Saul, kag ginkuha man niya ang lima ka mga anak nga lalaki ni Merab, nga anak nga babayi ni Saul nga ang ila amay amo si Adriel, anak ni Barsilai nga taga-Mehola.

9Gintugyan sila ni David sa mga tawo sang Gabaon nga nagbitay sa ila sa bukid sa atubang sang Ginoo, kag sila tanan nga pito napatay sing tingob. Ginpamatay sila sa tion nga nagasugod na ang pag-ani sang sebada.

10Dayon si Rizpa nga babayi ni Saul nga anak ni Aya, nagkuha sing sako kag ginhimo niya ini nga pasilungan sa daku nga bato, sa diin didto ang mga bangkay kag nagpabilin sia didto halin sang pagsugod sang ani tubtob nag-abot ang ulan. Ginbantayan niya ang mga bangkay sa adlaw kag sa gab-i, agod indi ini pagkaunon sang mga pispis kag mga sapat sa talon.

11Sang pagkabati ni David sang ginhimo ni Rizpa,

12naglakat si David kag ginpakuha niya ang mga tul-an ni Saul kag sang iya anak nga si Jonatan sa mga tawo sang Jabes sa Galaad nga amo ang nagkawat sini sa plasa sang Bet-san sa diin ang mga Filistinhon nagbitay sang mga tawo sadto nga adlaw nga ginpatay si Saul sa Bukid sang Gilboa.

13Ginkuha ni David ang mga tul-an ni Saul kag ni Jonatan kag gintipon man ang mga tul-an sang pito ka mga tawo nga ginbitay.

14Dayon ginlubong nila ang mga tul-an ni Saul kag ni Jonatan sa lulobngan sang amay ni Saul nga si Kis sa Zela, sa kadutaan sang Benjamin. Ang tanan nga ginsugo sang hari natuman, kag sa tapos sadto ang Dios nagsabat sang ila mga pangamuyo tungod sa ila pungsod.

15May isa pa gid ka inaway sa tunga sang mga Filistinhon kag Israel. Si David kag ang iya mga tinawo naglakat kag nagpakig-away sa mga Filistinhon. Sa tion sang inaway, si David ginlapyo.

16Ang isa ka higante nga ginahingalanan kay Isbibenob nga ang iya bangkaw nga bronsi nagabug-at sing mga apat ka kilo, kag sia nagataklos sing bag-o nga espada, naghunahuna nga mapatay niya si David.

17Pero si Abisai nga ang iya iloy amo si Seruya nag-abot sa pagbulig kay David, ginsalakay niya ang higante kag ginpatay. Dayon ang mga tinawo ni David nagpasumpa sa iya nga indi na gid sia mag-upod liwat sa ila sa inaway kag nagsiling sila, “Ikaw ang paglaom sang Israel, kag indi kami luyag nga madula ikaw sa amon.”

18Sa tapos sini, may inaway liwat batok sa mga Filistinhon sa Gob. Si Sibecai nga taga-Husa nagpatay sang isa ka higante nga ginahingalanan kay Sap.

19May isa pa gid ka inaway batok sa Filistinhon sa Gob, kag si Elhanan nga anak ni Jair nga taga-Betlehem, nagpatay kay Goliat nga taga-Gat nga ang punta sang iya sini bangkaw subong kadamol sang balayan sang tiral.

20Dayon may isa pa gid ka inaway sa Gat sa diin may isa pa gid ka higante nga maluyagon sa pag-away. May anom sia ka mga tudlo sa kada kamot kag sa kada tiil.

21Ginhangkat niya ang mga Israelinhon, kag ginpatay sia ni Jonatan nga anak sang utod ni David nga si Sama.

22Ini amo ang apat ka mga kaliwat sang mga higante sang Gat, kag ginpamatay sila ni David kag sang iya mga tinawo.

← Chapter 20 Jump to: Chapter 22 →