2 Samuel 16

Ilonggo (Maayong Balita nga Biblia (2012))

← Chapter 15 Jump to: Chapter 17 →

1Sang si David nakalampuwas sing diutay sa putokputokan sang bakulod, sa hinali ginsugata sia ni Siba, ang suloguon ni Mefiboset, nga may duha ka mga asno nga nakargahan sang 200 ka bilog nga tinapay, 100 ka pungpong nga ubas, 100 ka pungpong nga luto nga mga prutas kag isa ka panit nga sulodlan nga puno sang bino.

2Si Haring David nagpamangkot sa iya, “Anhon mo ini tanan?” Nagsabat si Siba, “Ang mga asno para sakyan sang panimalay sang hari, ang mga tinapay kag ang mga prutas para kaunon sang imo mga tinawo, kag ang bino imnon nila kon kapuyon sila sa desierto.”

3Ang hari nagpamangkot sa iya, “Diin bala si Mefiboset ang apo sang imo agalon nga si Saul?” Nagsabat si Siba, “Yadto sia sa Jerusalem tungod kay nagpati sia nga iuli sang mga Israelinhon sa iya ang ginharian sang iya lolo nga si Saul.”

4Ang hari nagsiling kay Siba, “Imo na lang ang tanan nga pagkabutang ni Mefiboset.” Si Siba nagsabat, “Alagad mo ako kag kabay nga malipay ka sa akon sa tanan nga tion, Mahal nga Hari!”

5Sang pag-abot ni Haring David sa Bahurim, ang isa sang mga pariente ni Saul nga si Simei nga anak ni Gera, naggwa sa pagsugata sa iya nga nagabuyayaw kay David samtang nagapakadto sia.

6Ginhaboy ni Simei sing mga bato si David kag ang iya mga opisyales, bisan nga ginalibutan si David sang iya mga tinawo kag mga gwardya.

7Si Simei nagpakamalaut sa iya kag nagsiling, “Palayo ka! Palayo ka! Manugpatay kag kriminal!

8Gin-agaw mo ang ginharian ni Saul, kag ang Ginoo nagasilot sang imo pagpamatay sing madamo nga katapo sang panimalay ni Saul. Karon, ang Ginoo naghatag sang ginharian sa imo anak nga si Absalom. Amo na ini ang imo katapusan, ikaw nga manugpatay!”

9Si Abisai nga ang iya iloy amo si Seruya nagsiling sa hari, “Mahal nga Hari, ngaa bala ginpabay-an mo ining sapat sa pagbuyayaw sa imo? Pakadtua ako didto kay utdan ko sia sing ulo!”

10Ang hari nagsiling kay Abisai kag sa iya utod nga si Joab, “Wala ka sing labot. Kon ginapakamalaut niya ako tungod kay ginsugo sia sang Ginoo, sin-o bala ang may kinamatarong sa pagpamangkot kon ngaa ginhimo niya ini?”

11Si David nagsiling kay Abisai kag sa tanan niya nga mga opisyales, “Bisan ang akon kaugalingon nga anak nagtinguha sa pagpatay sa akon, gani indi kamo matingala sa ginahimo sining Benjaminhon! Pabay-i lang sia sa pagpakamalaut sa akon kay ang Ginoo nagsugo sa iya.

12Ayhan ang Ginoo nakakita sang akon kalisod kag hatagan niya ako sing kaayuhan sa baylo sang pagpakamalaut.”

13Gani si David kag ang iya mga tinawo nagpadayon sa paglakat. Si Simei nagsunod nga nagalakat sa kilid sang bakulod, nga nagapakamalaut kag nagahaboy sang mga bato kag mga puga sa ila samtang nagalakat sia.

14Ang hari kag ang iya tanan nga mga tinawo kinapoy gid sang pag-abot nila sa Jordan kag nagpahuway sila didto.

15Si Absalom kag ang tanan nga mga Israelinhon nga kaupod niya nagsulod sa Jerusalem, kag si Ahitofel nag-upod sa ila.

16Sang masugata ni Husai nga salaligan ni David si Absalom, nagsinggit sia, “Mabuhay ang hari! Mabuhay ang hari!”

17Si Absalom nagpamangkot sa iya, “Amo bala inang imo pag-unong sa imo abyan? Ngaa wala ka mag-upod sa iya?”

18Si Husai nagsabat, “Ano ang akon pag-upod? Nagaupod lamang ako sa ginpili sang Ginoo, sa sining mga tawo, kag sa tanan nga mga Israelinhon. Magaupod ako sa imo.

19Kon sa bagay, sin-o bala ang dapat ko alagaron, kundi ang anak sang akon agalon? Subong sang akon pag-alagad sa imo amay, magaalagad man ako sa imo.”

20Dayon si Absalom nagliso kay Ahitofel kag nagsiling, “Karon kay yari na kita, ano bala ang imo dapat ilaygay? Ano ang aton himuon?”

21Nagsabat si Ahitofel, “Lakat ka, kag magpakighilawas sa mga babayi sang imo amay nga iya ginbilin sa pag-atipan sang palasyo. Dayon ang tagsatagsa sa Israel makabati nga ginhimo mo ang imo kaugalingon nga kaaway sang imo amay, kag ang imo mga sumolunod magaisog pa gid.”

22Gani nagpatindog sila sing tolda sa atop sang palasyo para kay Absalom kag sa atubang sang tanan si Absalom nagpakighilawas sa mga babayi sang iya amay.

23Ang mga laygay ni Ahitofel sa sadto nga mga inadlaw ginasunod subong nga amo gid ang pulong sang Dios. Si David kag si Absalom nagsunod sini.

← Chapter 15 Jump to: Chapter 17 →