2 Samuel 24

Ilonggo (Maayong Balita nga Biblia (2012))

← Chapter 23 Jump to:

1Sa isa sadto ka tion ang Ginoo naakig sa Israel, kag ginhimo niya si David nga manginkabangdanan sang pag-abot sang kalalat-an sa ila. Ang Ginoo nagsiling kay David, “Lakat ka kag isipa ang mga tawo sang Israel kag Juda.”

2Gani si David nagsugo kay Joab nga pangulo sang iya mga hangaway: “Lakat ka upod sa imo mga opisyales sa tanan nga mga tribo sang Israel, sa bug-os nga pungsod kag isipa ang mga tawo. Luyag ko mahibaluan kon daw ano sila kadamo.”

3Pero si Joab nagsabat sa hari, “Mahal nga Hari, kabay ang Ginoo nga imo Dios magpadamo sang mga tawo sang Israel sing 100 ka pilo sang sa ila kadamuon karon, kag kabay nga makakita ka pa sa iya paghimo sini, pero Mahal nga Hari, ngaa luyag mo gid himuon ini nga butang?”

4Pero ginpatuman sang hari ang iya sugo kay Joab kag sa iya mga opisyales; ginbayaan nila sia kag naglakat sila sa pag-isip sang mga tawo sang Israel.

5Nagtabok sila sa Suba sang Jordan kag nagpatindog sang ila nga tolda sa bagatnan sang Aroer, ang siudad sa tunga sang kapatagan sa kadutaan sang Gad. Halin didto nagpadayon sila sa aminhan sa Jazer,

6kag nagpadayon sila sa Galaad kag sa Kades, sa kadutaan sang mga Hethanon. Dayon nagkadto sila sa Dan, kag halin sa Dan naglibot sila pa nakatundan tubtob sa Sidon.

7Dayon nagkadto sila sa nabagatnan sa napamakuran nga siudad sang Tiro, kag sa tanan nga mga siudad sang mga Hevhanon kag mga Canaanhon, kag sang ulihi nagkadto sila sa Beerseba sa nabagatnan nga bahin sang Juda.

8Gani sa tapos ang siyam ka bulan kag baynte ka adlaw nagbalik sila sa Jerusalem, sa tapos malibot nila ang bug-os nga pungsod.

9Ginsugid nila sa hari ang bug-os nga kadamuon sang mga tawo nga sarang makapakig-away: 800,000 sa Israel kag 500,000 sa Juda.

10Pero sa tapos maisip ni David ang mga tawo, ginbasol sia sang iya konsensya kag nagsiling sia sa Ginoo, “Nakasala gid ako sing daku sa akon paghimo sini! Kon mahimo patawara ako. Binuang ang ginhimo ko.”

11Ang Ginoo nagsiling kay Gad nga propeta, ang palamangkutan ni David, “Lakat ka kag singgana si David nga ginapapili ko sia sa tatlo ka mga butang. Ang isa nga iya pagapilion amo ang akon pagahimuon.” Sang madason nga aga sang makabangon si David,

13ginkadtuan sia ni Gad kag ginsugiran sang ginsiling sang Ginoo kag ginpamangkot sia kon ano ang iya pilion: “Tatlo ka tuig nga gutom sa duta, ukon tatlo ka bulan nga pagpalagyo sa inyo mga kaaway, ukon tatlo ka adlaw nga peste sa imo duta.” Ginsingganan sia ni Gad, “Karon panghunahunai kag sugiri ako kon ano ang imo isabat nga dalhon ko sa Ginoo.”

14Si David nagsabat, “Nabutang ako sa ital-ital! Indi ako luyag nga ang mga tawo amo ang magsilot sa akon. Ang Ginoo lang pasiluta sa akon kay maluloy-on sia.”

15Gani ang Ginoo nagpadala sing peste sa Israel halin sa aga tubtob sa tion nga iya ginpat-od. Sa bug-os nga pungsod 70,000 ka mga Israelinhon ang nagkalamatay.

16Sang buot na laglagon sang anghel sang Ginoo ang Jerusalem, ang Ginoo nagbaylo sang iya hunahuna sa pagsilot sa mga tawo, kag ginsingganan niya ang anghel nga nagpamatay sa ila, “Untati na! Husto na ina!” Ang anghel yara sa lugar sang linasan ni Arauna nga Jebusnon.

17Nakita ni David ang anghel nga nagapamatay sang mga tawo kag nagsiling sia sa Ginoo, “Ako ang nakasala. Ako ang naghimo sing sayop. Ano bala ang nahimo sining makaluluoy nga mga tawo? Ako kag ang akon panimalay ang dapat silutan.”

18Sa amo nga adlaw si Gad nagkadto kay David kag nagsiling sa iya, “Lakat ka sa linasan ni Arauna kag magpatindog ka sing altar sa Ginoo.”

19Gintuman ni David ang sugo sang Ginoo kag naglakat sia suno sa ginsiling sa iya ni Gad.

20Si Arauna naglantaw sa ubos kag nakita niya ang hari kag ang iya mga opisyales nga nagataklad pakadto sa iya. Naghapa sia sa atubang ni David,

21kag nagpamangkot, “Mahal nga Hari! Ngaa nga yari ka?” Si David nagsabat, “Nagkari ako sa pagbakal sang imo linasan kag magpatindog sang altar para sa Ginoo, agod mag-untat ang peste.”

22Si Arauna nagsiling, “Imo lang ina, Mahal nga Hari, kag maghalad ka sa Ginoo sang bisan ano nga luyag mo. Yari ang mga baka nga imo idulot subong halad nga sinunog sa altar, kag yari man ang ila mga gota, ang mga tapi sa linasan para igatong.”

23Ini tanan ginhatag ni Arauna sa hari kag nagsiling sa iya, “Kabay nga batunon sang Ginoo nga imo Dios ang imo halad.”

24Pero ang hari nagsabat, “Indi mahimo! Bayaran ko ini! Indi ako magdulot sa Ginoo nga akon Dios sang mga halad nga wala ko mabayari.” Kag ginbakal niya ang linasan kag ang mga baka sing singkwenta ka bilog nga pilak.

25Dayon nagpatindog sia didto sing altar sa Ginoo kag naghalad sang mga halad nga sinunog kag mga halad sa paghiambit. Ginsabat sang Ginoo ang iya pangamuyo kag ang peste sa Israel nag-untat.

← Chapter 23 Jump to: