2 Samuel 6

Ilonggo (Maayong Balita nga Biblia (2012))

← Chapter 5 Jump to: Chapter 7 →

1Sa liwat ginpatawag sing tingob ni David ang labing maayo nga mga soldado sang Israel nga ang ila kadamuon 30,000 ka mga tawo,

2kag gindala sila sa Baala sa Juda, agod makuha halin didto ang Kaban sang Kasugtanan sang Dios, nga may ngalan sang Ginoo sang mga hangaway, nga ang iya trono yara sa ibabaw sang mga kerubin.

3Ginkuha nila ini halin sa balay ni Abinadab nga didto sa bakulod kag ginkarga sa bag-o nga karo. Si Uza kag si Ahio nga mga anak ni Abinadab ang nagadala sang karo,

4kag si Ahio amo ang nagauna.

5Si David kag ang tanan nga mga Israelinhon nagasinaot kag nagakinanta sa bug-os nila nga kusog sa pagpasidungog sa Ginoo. Nagatinukar sila sang mga arpa, mga lira, mga bombo, mga kastanitas kag mga platilyos.

6Sang pag-abot nila sa linasan ni Nacon, ang mga baka natumba, kag si Uza nagdawhat kag nagpugong sang Kaban sang Kasugtanan.

7Ang Ginoo naakig kay Uza kag sa gilayon ginpatay sia tungod sang iya pagkadi-matinahuron. Gani napatay sia didto sa tupad sang Kaban sang Kasugtanan.

8Si David nainit gid kay ang Ginoo nagsilot kay Uza sa iya kaakig, gani ina nga lugar gintawag nga Perez-uza tubtob sini nga adlaw.

9Dayon si David nagkahadlok sa Ginoo kag nagsiling, “Ano na lang karon ang pagdala ko sang Kaban sang Kasugtanan?”

10Gani nagpamat-od sia nga indi na lang niya pagdalhon ang Kaban sang Kasugtanan sa Jerusalem, sa baylo ginpaliko niya ini kag gindala sa balay ni Obed-edom nga nagikan sa siudad sang Gat.

11Nagpabilin ini didto sa sulod sing tatlo ka bulan, kag ang Ginoo nagbendisyon kay Obed-edom kag sang iya mga panimalay.

12Nabatian ni Haring David nga tungod sang Kaban sang Kasugtanan, ang Ginoo nagpauswag sang panimalay ni Obed-edom kag sang tanan niya nga mga pagkabutang, gani ginkuha niya ini sa balay ni Obed-edom kag gindala sa Jerusalem nga may daku nga pagkinalipay.

13Sang makalakat sing anom ka tikang ang mga tawo nga nagadala sang Kaban sang Kasugtanan, ginpadulog sila ni David samtang naghalad sia sa Ginoo sang isa ka baka nga toro kag isa ka pinatambok nga tinday sang baka.

14Si David nga nagatampi lamang sing panapton nga lino sa iya hawak, nagsaot sa bug-os niya nga kusog sa pagdayaw sa Ginoo.

15Gani sia kag ang tanan nga mga Israelinhon nagdala sang Kaban sang Kasugtanan tubtob sa Jerusalem nga nagahinugyaw kag nagapatunog sang mga trumpeta.

16Sang ginadala pasulod sa siudad ang Kaban, si Mikal nga anak ni Saul nagtamwa sa bintana kag nakita niya si Haring David nga nagatumbo kag nagasaot sa pagdayaw sa Ginoo kag nagtamay sia kay David.

17Gindala nila ang Kaban kag ginbutang ini sa tolda nga gin-aman ni David. Dayon nagdulot si David sing mga halad nga sinunog kag mga halad sa paghiambit sa Ginoo.

18Sa tapos sia makadulot sang mga halad nga sinunog kag mga halad sa paghiambit, ginbendisyunan niya ang mga tawo sa ngalan sang Ginoo sang mga hangaway.

19Dayon ginhatagan niya ang tagsa ka lalaki kag babayi sang isa ka bilog nga tinapay, isa ka gulot nga karne nga sinugba, kag mga pasas. Dayon ang tagsatagsa nagpauli.

20Sang pagpauli ni David sa pagbendisyon sang iya panimalay, si Mikal naggwa sa pagsugata sa iya kag nagsiling, “Ang hari sang Israel nabantugan sini nga adlaw! Ginpakita niya ang iya kaugalingon nga hublas subong sang isa ka buang nga ginatan-aw sang mga babayi nga suloguon sang iya mga opisyales!”

21Si David nagsabat, “Nagsaot ako sa pagdayaw sa Ginoo, nga nagpili sa akon sa baylo sang imo amay kag sang iya panimalay, sa paghimo sa akon nga pangulo sang iya mga tawo nga Israelinhon. Magapadayon ako sa pagsaot sa pagdayaw sa Ginoo,

22kag pakahuy-an pa gid nakon ang akon kaugalingon sing labi pa. Ayhan magahunahuna ka nga wala ako sing pulos, pero yadtong mga babayi magataha pa gid sa akon!”

23Si Mikal nga anak ni Saul wala gid makapamata.

← Chapter 5 Jump to: Chapter 7 →