2 Samuel 12

Ilonggo (Maayong Balita nga Biblia (2012))

← Chapter 11 Jump to: Chapter 13 →

1Ginpadala sang Ginoo si Natan nga propeta kay David. Si Natan nagkadto sa iya kag nagsiling, “May duha ka mga tawo nga nag-estar sa isa ka banwa, ang isa manggaranon kag ang isa imol.

2Ang manggaranon may madamo nga mga baka kag mga karnero,

3samtang ang imol may isa lang ka kordero nga iya ginbakal. Ginsagod niya ini kag nagdaku sa iya balay upod sa iya mga kabataan. Iya ini ginapakaon sang iya kaugalingon nga pagkaon, ginapainom sa iya kaugalingon nga kupa, kag iya ini ginasabaksabak. Para sa iya ang kordero daw pareho sang bata niya nga babayi.

4Sang isa ka adlaw, may bisita nga nag-abot sa balay sang manggaranon. Ang manggaranon nga tawo indi luyag mag-ihaw sang isa sang iya kaugalingon nga mga sapat agod ipakaon sa iya bisita; sa baylo, ginkuha niya ang kordero sang imol nga tawo kag ginluto ini para sa iya bisita.”

5Si David naakig gid sa tawo nga manggaranon kag nagsiling, “Ginasumpa ko sa buhi nga Ginoo nga ang tawo nga naghimo sina dapat patyon!

6Dapat sia magbayad sing apat ka pilo sang iya ginkuha, tungod sining iya ginhimo nga wala sing patugsiling.”

7Si Natan nagsiling kay David, “Ikaw ina nga tawo. Kag amo ini ang ginasiling sang Ginoo ang Dios sang Israel: ‘Ginhimo ko ikaw nga hari sang Israel kag ginluwas ko ikaw kay Saul.

8Ginhatag ko sa imo ang iya ginharian kag ang iya mga asawa; ginhimo ko ikaw nga hari sa Israel kag sa Juda. Kon kulang pa ini kuntani ginhatagan ko ikaw sing pilo.

9Ngaa bala ginlapas mo ang akon mga sugo? Ngaa ginhimo mo ining malaut nga butang? Ginpapatay mo si Urias sa inaway, ginpapatay mo sia sa mga Amonhon, dayon ginkuha mo ang iya asawa!

10Karon sa tagsa ka kaliwatan, ang iban sang imo mga kaliwat mapatay sa magkasiligni nga kamatayon, tungod kay wala mo ako gintuman kag ginkuha mo ang asawa ni Urias.

11Ginasumpa ko sa imo nga ang isa ka katapo sang imo panimalay magagamo sa imo. Makita mo ini kon kuhaon ko ang imo mga asawa kag ihatag sila sa isa ka tawo, kag magapakighilawas sia sa ila sing hayag.

12Nagpakasala ka sing tago, pero himuon ko nga matabo ini sing hayag, agod nga makita sang bug-os nga Israel.’”

13Si David nagsiling, “Nakasala ako batok sa Ginoo.” Nagsabat si Natan, “Ang Ginoo nagapatawad sa imo, indi ikaw mapatay.

14Pero tungod kay ginlalis mo ang Ginoo sa imo paghimo sini, ang imo anak mapatay.”

15Dayon si Natan nagpauli. Ang Ginoo nagpamasakit sang bata nga ginbun-ag sang asawa ni Urias kay David.

16Si David nagpangamuyo sa Dios nga ang bata magaayo. Wala sia magkaon bisan ano kag sa kada gab-i nagasulod sia sa iya kwarto kag maghapaon sa salog.

17Ang iya mga opisyales sa korte nagkadto sa iya sa pagtinguha nga magbangon sia, pero indi gid sia kag wala sia magkaon sing bisan ano upod sa ila.

18Sa tapos ang isa ka simana ang bata napatay, kag ang mga opisyales ni David nahadlok magsugid sa iya sang balita. Nagsiling sila, “Sang buhi pa ang bata, si David indi magsabat sa aton kon maghambal kita sa iya. Ano karon ang aton pagsugid sa iya nga ang bata napatay? Basi malain ang himuon niya sa iya kaugalingon!”

19Sang matalupangdan ni David nga nagahinutikay sila, nahangpan niya nga ang bata patay na. Gani nagpamangkot sia, “Patay na bala ang bata?” Nagsabat sila, “Huo, patay na sia.”

20Si David nagbangon kag nagpaligo, nanghusay sang iya buhok kag nag-ilis sang iya bayu. Dayon nagkadto sia sa balay sang Ginoo kag nagsimba. Sang pagbalik niya sa palasyo nagpangayo sia sing pagkaon kag iya ginkaon ang ginhatag sa iya.

21Ang mga opisyales nagsiling sa iya, “Natingala kami nga sang buhi pa ang bata nagahibi ka kag indi magkaon, pero sang pagkapatay sang bata, nagbangon ka kag nagkaon!”

22Si David nagsabat, “Huo, nagpuasa ako kag naghibi sang buhi pa sia. Naghunahuna ako nga ayhan ang Ginoo magkaluoy sa akon kag tugotan niya nga mabuhi ang bata.

23Pero karon nga patay na sia, ngaa bala mapuasa pa ako? Sarang ko pa bala mapabalik ang kabuhi sang bata? Sa pila ka adlaw maapas ako sa iya, pero indi na sia makabalik sa akon.”

24Dayon ginlipay ni David ang iya asawa nga si Batseba. Nagpakighirop sia sa iya, kag nagbata sia sing lalaki, nga ginhingalanan ni David kay Solomon. Ginhigugma sang Ginoo ang bata,

25kag nagsugo kay Natan nga propeta nga hingalanan ang bata kay Jedidia tungod kay ang Ginoo naghigugma sa iya.

26Sa pihak nga bahin, si Joab nagpadayon sa pagsalakay sang Raba, ang siudad nga kapital sang Amon, kag buot na niya agawon ini.

27Nagpadala sia sing mga tawo sa pagsugid kay David: “Sinalakay ko ang Raba kag gin-agaw ko ang ila ginakuhaan sing tubig.

28Karon tipuna ang nabilin mo nga mga hangaway, salakaya ang siudad kag ikaw gid ang mag-agaw sini, kay indi ako luyag nga ako ang mabantugan sa pag-agaw sini.”

29Gani si David nagtipon sang iya mga hangaway kag nagkadto sa Raba. Dayon ginsalakay kag gin-agaw niya ini.

30Ang diosdios sang mga Amonhon nga si Moloc may korona nga bulawan nga nagabug-at sang trayntay kwatro ka kilo kag may malahalon ini nga bato. Ginkuha ni David ang malahalon nga bato kag ginbutang sa iya korona. Madamo man ang iya ginpanguha nga mga pagkabutang sa siudad.

31Gindala niya ang mga pumoluyo kag ginhimo nga manuglagari, manughimo sang salsalon nga mga sadol, kag mga wasay, kag ginpahimo sang mga tisa. Amo man ang iya ginhimo sa tanan nga mga pumoluyo sang iban nga mga kabanwahanan sang Amon. Dayon sia kag ang iya mga tinawo nagbalik sa Jerusalem.

← Chapter 11 Jump to: Chapter 13 →