2 Samuel 18

Ilonggo (Maayong Balita nga Biblia (2012))

← Chapter 17 Jump to: Chapter 19 →

1Gindala ni David ang tanan niya nga mga tinawo, kag ginpartida niya sila sa grupo nga tag-1,000 kag tag-100 ka mga tawo, kag ginpadumalahan sila sa mga opisyales.

2Dayon ginpadala niya sila sa tatlo ka mga grupo: ang isa ka grupo ginapangulohan ni Joab, ang isa sang iya utod nga si Abisai, kag ang isa ni Itai nga taga-Gat. Ang hari nagsiling sa iya mga tinawo, “Maupod ako sa inyo.”

3Nagsabat sila, “Indi ka mag-upod sa amon. Wala kaso sa mga kaaway kon ang iban sa amon magpalalagyo, ukon bisan ang katunga sa amon magkalamatay, pero ikaw timbang sang 10,000 sa amon. Mas maayo pa nga magpabilin ka lang diri sa siudad kag padalhan mo kami sing bulig.”

4Nagsabat ang hari, “Himuon ko ang ginahunahuna ninyo nga labing maayo.” Dayon nagtindog sia sa kilid sang pwerta, samtang ang grupo sang iya mga tawo nga linibo kag ginatos nagaagi.

5Ginmanduan niya si Joab, si Abisai kag si Itai: “Tungod lamang sa akon, indi ninyo pag-anha ang pamatan-on nga si Absalom.” Ang tanan nga mga hangaway nakabati sang mando ni David sa iya mga opisyales.

6Ang mga hangaway ni David naglakat sa patag-awayan batok sa mga Israelinhon, kag nag-inaway sila sa Kagulangan sang Efraim.

7Ang mga Israelinhon ginlutos sang mga tinawo ni David, daku ini nga pagkalutos sa bagay nga 20,000 ka mga tawo ang nagkalamatay sadto nga adlaw.

8Ang inaway naglambot sa kawayangan kag madamo pa nga mga tawo ang nagkalamatay sa kagulangan sang sa ginpamatay sa inaway.

9Sa hinali nasugata ni Absalom ang pila ka mga tinawo ni David. Si Absalom nagasakay sa isa ka mula kag samtang nagaagi sia sa idalom sang magapa nga kahoy nga terebinto, ang iya ulo nakasangit sa mga sanga sini. Ang mula nagpadayon sa pagdalagan kag si Absalom nabilin nga nagakabit.

10Ang isa sang mga tinawo ni David nakakita sa iya kag ginsugid ini kay Joab, “Nakita ko si Absalom nga nagakabit sa sanga sang kahoy nga terebinto!”

11Si Joab nagsabat, “Nakita mo gali sia? Ngaa nga wala mo sia gilayon pagpatya? Kuntani ako gid ang magahatag sa imo sing napulo ka bilog nga pilak kag paha.”

12Pero ang tawo nagsabat, “Bisan hatagan mo ako sing 1,000 ka bilog nga pilak, indi ako maghalit sa anak sang hari. Tanan kita nakabati sang mando sang hari sa imo, kay Abisai, kag kay Itai nga nagsiling, ‘Tungod lamang sa akon, indi ninyo pag-anha ang pamatan-on nga si Absalom.’

13Pero kon ako naglapas sa hari kag ginpatay si Absalom, makahibalo ang hari nahanungod sini kay nahibaluan niya ang tanan kag indi mo ako pag-apinan.”

14Nagsiling si Joab, “Ginauyangan ko lang ang akon tion sa imo.” Nagkuha sia sing tatlo ka bangkaw kag ginbuno ini sa dughan ni Absalom samtang buhi pa sia nga nagakabit sa kahoy nga terebinto.

15Dayon ang napulo ka mga soldado ni Joab nagpalapit kay Absalom kag ginpatay sia.

16Ginpatunog ni Joab ang trumpeta sa pagpauntat sang inaway, kag ang mga soldado nagbalik halin sa ila paglagas sa mga Israelinhon.

17Ginkuha nila ang bangkay ni Absalom kag ginhulog sa madalom nga buho sa kagulangan, kag gintabunan ini sing daku nga tinumpok nga mga bato. Ang tanan nga mga Israelinhon nagpalalagyo pauli, ang tagsa ka tawo sa iya kaugalingon nga balay.

18Sang buhi pa si Absalom nagpatindog sia sang monumento para sa iya kaugalingon sa Kapatagan sang Hari, tungod kay wala sia sing bata nga lalaki sa pagpadayon sang iya ngalan. Gani, ginhingalanan niya ini para sa iya kaugalingon, kag tubtob sini nga adlaw ginatawag ini nga Monumento ni Absalom.

19Dayon si Ahimaaz nga anak ni Sadoc nagsiling kay Joab, “Makadto ako sa hari kag sugiran ko sia sang maayong balita nga ang Ginoo nagluwas sa iya sa iya mga kaaway.”

20Si Joab nagsabat, “Indi, kay sini nga adlaw wala ka sing isugid nga maayong balita. Sa iban nga adlaw sarang mo ina mahimo, pero indi sini nga adlaw, kay napatay ang anak sang hari.”

21Dayon nagsiling sia sa iya ulipon nga Etiopiahanon, “Lakat ka kag sugiri ang hari sang imo nakita.” Ang ulipon nagsaludo kag nagdalagan.

22Si Ahimaaz nagpamilit nga nagsiling, “Bisan ano ang matabo malakat ako, kon mahimo dalhon ko man ang balita.” Si Joab nagpamangkot, “Ngaa bala luyag mo gid ini himuon, anak ko? Wala ka man sing makuha nga premyo.”

23Si Ahimaaz nagsiling liwat, “Bisan ano ang matabo malakat gid ako.” Si Joab nagsiling, “Sigi lakat.” Gani nagdalagan si Ahimaaz nga nagaagi sa Kapatagan sang Jordan kag naunahan niya ang Etiopiahanon.

24Si David nagapungko sa tunga sang duha ka mga pwerta sang siudad. Ang gwardya nga nagabantay nagsaka sa ibabaw sang pader kag nagtindog sa atop sang pwerta; sang paglantaw niya nakita niya ang isa ka tawo nga nagadalagan.

25Nagpanawag sia kag ginsugiran niya ang hari, kag ang hari nagsiling, “Kon isa lang sia, may dala sia nga maayo nga balita.” Ang tawo nga nagadalagan nagapalapit.

26Dayon ang gwardya nakakita pa gid sang isa ka tawo nga nagadalagan nga isa lang, kag nagpanawag sia sa nagabantay sang pwerta, “Lantawa, may isa pa ka tawo nga nagadalagan!” Ang hari nagsabat, “Ina sia may dala man nga maayo nga balita.”

27Ang gwardya nagsiling, “Sa panan-aw ko inang nahauna nga tawo daw si Ahimaaz kon magdalagan.” Ang hari nagsiling, “Maayo sia nga tawo, kag may dala sia nga maayo nga balita.”

28Si Ahimaaz nagtamyaw sa hari, naghapa sa atubang niya kag nagsiling, “Dayawon ang Ginoo nga imo Dios, nga nagpadaog sa imo batok sa mga tawo nga nagrebelde batok sa imo, Mahal nga Hari.”

29Ang hari nagpamangkot, “Wala man bala maano ang pamatan-on nga si Absalom?” Si Ahimaaz nagsabat, “Mahal nga Hari, sang pagpadala sa akon sang imo opisyal nga si Joab, may nakita ako nga kinagubot, pero wala ako makahibalo kon ano yadto.”

30Ang hari nagsiling sa iya, “Pahigad ka,” kag nagpahigad sia kag didto nagtindog.

31Dayon ang Etiopiahanon nga ulipon nag-abot kag nagsiling sa hari, “Mahal nga Hari, may maayong balita ako para sa imo! Sa sini nga adlaw ang Ginoo nagpadaog sa imo sa tanan nga nagrebelde batok sa imo!”

32Ang hari nagpamangkot, “Wala bala maano ang pamatan-on nga si Absalom?” Ang Etiopiahanon nagsabat, “Mahal nga Hari, maayo kuntani nga ang natabo sa iya amo man ang natabo sa tanan mo nga mga kaaway kag sa tanan nga nagarebelde batok sa imo.”

33Wala makapugong ang hari sa iya paghibi. Nagsaka sia sa kwarto sa ibabaw sang pwerta kag naghibi. Samtang nagalakat sia, nagahibi sia nga nagapanalambiton, “Anak ko! Anak ko! Anak ko nga Absalom! Maayo pa kuntani nga ako na lang ang napatay sa baylo sa imo, O anak ko! Absalom, anak ko!”

← Chapter 17 Jump to: Chapter 19 →