2 Samuel 19

Ilonggo (Maayong Balita nga Biblia (2012))

← Chapter 18 Jump to: Chapter 20 →

1Si Joab ginsugiran nga si Haring David nagahilibion kag nagalalaw tungod kay Absalom.

2Gani ang kalipay sang pagdaog ginbayluhan sang paglalaw sadto nga adlaw sa tanan nga mga hangaway ni David, tungod kay nakabati sila nga ang hari nagalalaw tungod sa iya anak.

3Nagbalik sila sing mahipos sa siudad, kaangay sang mga soldado nga nahuya kag nagpalagyo sa inaway.

4Gintabunan sang hari ang iya guya kag naghibi sing tudo, “O anak ko! Anak ko nga Absalom! Absalom nga anak ko!”

5Si Joab nagkadto sa balay sang hari kag nagsiling sa iya, “Ginpakahuy-an mo ang imo mga soldado sini nga adlaw, nga nagluwas sang imo kabuhi, sang kabuhi sang imo mga anak nga lalaki kag mga babayi, sang imo mga asawa kag mga babayi.

6Ginsumpong mo ang mga nagahigugma sa imo, kag ginbuligan mo ang mga nagadumot sa imo! Maathag na gid nga ginapakawalay pulos mo ang imo mga opisyales kag ang imo mga tinawo. Sa banta ko malipayon ikaw kon si Absalom buhi sini nga adlaw kag kami tanan nagkalamatay.

7Karon lakat kag paumpawi ang imo mga tinawo. Kon indi ka, ginasumpa ko sa ngalan sang Ginoo nga buas sa aga wala sing bisan isa sa ila nga magapabilin upod sa imo. Labing daku pa ini nga kapierdihan sa tanan nga imo inagihan sa bug-os mo nga kabuhi.”

8Dayon ang hari nagtindog kag naglakat, kag nagpungko malapit sa pwerta sang siudad. Ang iya mga tinawo nakabati nga didto sia, gani tanan sila nagtipon palibot sa iya. Sa pihak nga bahin, ang tanan nga mga Israelinhon nagpalagyo, ang tagsa ka tawo sa iya kaugalingon nga balay.

9Ang mga tawo sa bug-os nga pungsod nagsugod sa pag-ilinaway. Nagsiling sila sa isa kag isa, “Si Haring David nagluwas sa aton gikan sa aton mga kaaway. Ginluwas niya kita gikan sa mga Filistinhon, pero karon nagpalagyo sia kay Absalom kag nagbiya sa aton pungsod.

10Si Absalom ginhaplasan naton subong aton hari, pero napatay sia sa inaway. Gani, ngaa nga wala sing isa nga magpabalik kay Haring David subong hari?”

11Ang balita nahanungod sa ginasiling sang mga Israelinhon nakalambot kay Haring David. Gani ginpadala niya ang mga pari nga si Sadoc kag si Abiatar sa pagpamangkot sa mga pangulo sang Juda, “Ngaa ulihi kamo sa pagpabalik sang hari sa iya palasyo?

12Kamo akon mga pariente, kag mga kadugo, ngaa kamo pa ang ulihi sa pagpabalik sa akon?”

13Ginsingganan sila ni David nga isugid ini kay Amasa, “Ikaw akon pariente. Sugod karon ginatugyan ko sa imo ang pagdumala sang akon mga hangaway sa baylo ni Joab. Kabay nga patyon ako sang Dios kon indi ko ini paghimuon!”

14Ining ginpanghambal ni David nagpabalik sang pagsalig sang tanan nga mga tawo sang Juda, kag gintugonan nila sia sa pagbalik upod sa tanan niya nga mga opisyales.

15Sang nagapabalik sia, ang hari ginsugata sa Suba sang Jordan sang mga tawo sang Juda, nga nagkadto sa Gilgal sa pag-ubay sa iya sa pagtabok sa suba.

16Sa amo man nga tion si Simei nga Benjaminhon nga anak ni Gera nga taga-Bahurim, nagdalidali sa pagkadto sa Jordan sa pagsugata kay Haring David.

17May upod sia nga 1,000 ka mga tawo gikan sa tribo ni Benjamin. Amo man si Siba, ang suloguon sa panimalay ni Saul, nag-abot upod sa iya kinse ka mga anak nga lalaki kag baynte ka mga suloguon, kag nag-abot sila sa Jordan nga nauna sa hari.

18Gintabok nila ang suba sa pag-ubay sa grupo sang hari nga nagatabok kag sa pagtuman sang luyag sang hari. Sang manugtabok na ang hari, si Simei naghapa sa iya atubang

19kag nagsiling, “Mahal nga Hari, kon mahimo kalimti ang akon sala nga nahimo sang adlaw nga naghalin ka sa Jerusalem. Indi ka magdumot sa akon ukon dumdomon pa nimo ini.

20Mahal nga Hari, ginakilala ko nga nakasala ako, gani ako ang nahauna gikan sa tanan nga tribo sa aminhan nga nagkadto sini nga adlaw sa pagsugata sa imo.”

21Si Abisai, nga ang iya iloy amo si Seruya nagsiling: “Dapat patyon si Simei tungod kay ginpakamalaut niya ang hari nga ginpili sang Ginoo.”

22Pero si David nagsiling kay Abisai kag sa iya utod nga si Joab, “Wala kamo sing labot sini. Hatagan bala ninyo ako sing palaligban? Ako karon amo ang hari sang Israel, kag wala sing Israelinhon nga pagapatyon sini nga adlaw.”

23Kag nagsiling sia kay Simei, “Ginapasalig ko ikaw nga indi ka pagpatyon.”

24Dayon si Mefiboset nga apo ni Saul, nagdulhog sa pagsugat sa hari. Wala sia makapanghinaw sang iya mga tiil, wala sia makapamarbas, kag wala makapanglaba sang iya bayu halin sang tion nga naghalin ang hari sa Jerusalem kag makabalik nga madinalag-on.

25Sang pag-abot ni Mefiboset halin sa Jerusalem sa pagsugat sa hari, ang hari nagsiling sa iya, “Mefiboset, ngaa nga wala ka mag-upod sa akon?”

26Nagsabat sia, “Mahal nga Hari, nahibaluan mo nga ako lupog. Ginsingganan ko ang akon alagad sa pagtakod sang montora sa asno, agod sakyan ko sa pag-upod sa imo, pero ginluiban niya ako.

27Mahal nga Hari, nagsugid sia sing butig sa imo nahanungod sa akon, pero kaangay ikaw sang anghel sang Dios, gani himua ang ginahunahuna mo nga matarong sa imo.

28Ang tanan nga katapo sang panimalay sang akon amay takos pagapatyon sang Mahal nga Hari, pero ginhatagan mo ako sing pabor sa pagkaon sa imo lamisa upod sa imo. Wala ako sing kinamatarong sa pagpangayo sang bisan ano pa nga pabor gikan sa Mahal nga Hari.”

29Ang hari nagsabat, “Husto na ina ang imo ginsiling. Nagpamat-od na ako nga ikaw kag si Siba magatunga sang pagkabutang ni Saul.”

30Si Mefiboset nagsabat, “Ihatag lang sa iya ang tanan. Para sa akon, tuman na nga ikaw, Mahal nga Hari, nakapauli nga wala maano.”

31Si Barsilai nga taga-Galaad, nagdulhog man halin sa Rogelim sa pag-ubay sa hari sa pagtabok sa Jordan.

32Tigulang na sia kaayo, otsenta ka tuig ang iya edad. Manggaranon sia kaayo kag sia ang naghatag sa hari sang pagkaon samtang didto ang hari nagatener sa Mahanaim.

33Ang hari nagsiling sa iya, “Upod ka na lang sa akon sa Jerusalem, kag ako ang magatatap sa imo.”

34Pero si Barsilai nagsabat, “Indi na ako maglawig, ngaa nga mag-upod pa ako sa imo sa Jerusalem, Mahal nga Hari?

35Ang akon edad otsenta ka tuig kag wala na sing butang nga makalipay sa akon. Indi na ako makapanabor sang akon ginakaon kag ginainom. Indi na ako makabati sang tingog sang mga manugkanta. Mabudlayan ka lang sa akon, Mahal nga Hari.

36Indi ako takos sining daku nga balos. Gani, maupod lang ako sa imo tubtob lang sa unhan sang Jordan.

37Mapauli lang ako dayon agod mapatay malapit sa lulobngan sang akon mga ginikanan. Yari ang akon anak nga si Kimham nga magaalagad sa imo. Dalha sia upod sa imo, Mahal nga Hari, kag himua sa iya ang labing maayo nga nahunahuna mo para sa iya.”

38Ang hari nagsabat, “Dalhon ko sia kag himuon ko sa iya ang bisan ano nga luyag mo, kag tumanon ko ang tanan mo nga ginpangabay.”

39Dayon si David kag ang tanan niya nga mga tinawo nagtabok sa Jordan. Ginhalukan niya si Barsilai kag ginbendisyunan, kag nagpauli si Barsilai sa iya balay.

40Sang nakatabok na ang hari nga ginaupdan sang tanan nga mga tawo sang Juda kag sang katunga sang mga tawo sang Israel, nagpadayon sia sa Gilgal, kag si Kimham nag-upod sa iya.

41Dayon ang tanan nga mga Israelinhon nagkadto sa hari kag nagsiling sa iya, “Mahal nga Hari, ngaa nga ang amon mga utod nga mga tawo sang Juda naghunahuna nga sila ang may kinamatarong sa pagdala kag pag-upod sa imo, sa imo panimalay, kag sa imo mga tinawo sa pagtabok sa Jordan?”

42Ang mga tawo sang Juda nagsabat, “Ginhimo namon ini kay ang hari nagikan sa amon. Ngaa bala maakig gid kamo tungod sini? Naggasto bala sia para sa amon pagkaon, ukon may ginhatag bala sia sa amon?”

43Ang mga Israelinhon nagsabat, “Napulo ka pilo ang amon kinamatarong sa pag-angkon kay Haring David sang sa inyo, bisan sia nagikan sa inyo. Ngaa bala ginapakanubo ninyo kami? Kon sa bagay, kami ang nahauna nga nagsiling sa pagpabalik sa hari!” Pero ang mga tawo sang Juda indi gid magpasupil sang ila kinamatarong sa pag-angkon sa hari sang sa mga tawo sang Israel.

← Chapter 18 Jump to: Chapter 20 →