2 Samuel 2

Ilonggo (Maayong Balita nga Biblia (2012))

← Chapter 1 Jump to: Chapter 3 →

1Sa tapos sini, si David nagpamangkot sa Ginoo, “Makadto bala ako kag maggahom sa isa sang mga banwa sang Juda?” Nagsabat ang Ginoo, “Huo.” Nagpamangkot liwat si David, “Sa ano nga banwa?” Ang Ginoo nagsiling, “Sa Hebron.”

2Gani si David nagkadto sa Hebron upod ang iya duha ka mga asawa: si Ahinoam nga taga-Jezreel, kag si Abigail nga balo ni Nabal nga taga-Carmel.

3Gindala man niya ang iya mga tinawo kag ang ila mga panimalay kag nag-estar sila sa mga banwa sa palibot sang Hebron.

4Dayon ang mga tawo sang Juda nagkadto sa Hebron kag naghaplas kay David subong hari sang Juda. Sang pagkabati ni David nga ang mga tawo sang Jabes sa Galaad naglubong kay Saul,

5nagpadala sia sing pila ka mga tawo didto sa pagsiling: “Kabay nga ang Ginoo magbendisyon sa inyo tungod sang inyo pag-unong sa inyo hari paagi sa paglubong ninyo sa iya.

6Kag karon kabay nga ang Ginoo magmaayo kag magmatutom sa inyo. Ako man manginmaayo sa inyo, tungod sang inyo ginhimo.

7Magpakalig-on kag magpakaisog kamo! Si Saul nga inyo hari patay na, kag ang mga tawo sang Juda naghaplas sa akon subong ila hari.”

8Si Abner nga anak ni Ner, nga pangulo sang mga soldado ni Saul, nakapalagyo upod kay Isboset nga anak ni Saul sa tabok sang Jordan pakadto sa Mahanaim.

9Didto ginhimo ni Abner si Isboset nga hari sa mga kadutaan sang Galaad, Aser, Jezreel, Efraim, kag Benjamin, kag sa bug-os gid nga Israel.

10Si Isboset nagaedad sang kwarenta ka tuig sang paghimo sa iya nga hari sang Israel, kag naghari sia sa sulod sang duha ka tuig. Pero ang tribo sang Juda nag-unong kay David,

11kag naggahom sia sa ila sa Hebron sa sulod sang pito ka tuig kag tunga.

12Si Abner kag ang mga opisyales ni Isboset nagkadto sa siudad sang Gabaon halin sa Mahanaim.

13Si Joab nga ang iya iloy amo si Seruya kag ang iban nga mga opisyales ni David nagkadto kag nagsugata sa ila didto sa punong, sa diin nagpungko sila tanan, ang isa ka grupo sa pihak sang punong kag ang isa sa pihak.

14Si Abner nagsiling kay Joab, “Paawayon ta ang pila sang aton mga pamatan-on nga mga tinawo kon sin-o ang madaog.” Nagsabat si Joab, “Sigi.”

15Gani, ang dose ka tawo gikan sa grupo ni Isboset kag sang tribo ni Benjamin, nagpakig-away sa dose ka tinawo ni David.

16Ang kada-isa sa ila nagdakop sang iya kontra sa ulo kag ginbuno sang iya espada ang kilid sang iya kontra sa bagay nga nagkalamatay sila tanan. Amo ina nga yadto nga lugar sa Gabaon ginatawag nga “Latagon sang mga Espada.”

17Dayon may malapuyot nga inaway, kag si Abner kag ang mga Israelinhon ginlutos sang mga tinawo ni David.

18Ang tatlo ka mga anak nga lalaki ni Seruya yadto didto: sanday Joab, Abisai, kag si Asael. Si Asael nga madasig magdalagan subong sang usa,

19naglagas kay Abner nga wala bulobalikid.

20Si Abner nagbalikid kag nagpamangkot, “Asael, ikaw bala ina?” Nagsabat si Asael, “Huo.”

21Si Abner nagsiling, “Indi ako paglagsa, kundi ang isa lang sang mga soldado kag kuhaa ang tanan nga yara sa iya.” Pero si Asael nagpadayon sa paglagas sa iya.

22Sa liwat si Abner nagsiling sa iya, “Indi ako paglagsa! Ngaa nga piliton mo ako sa pagpatay sa imo? Ano ang pag-atubang ko sa imo utod nga si Joab?”

23Pero si Asael wala mag-untat sa paglagas, gani si Abner sa isa ka duso sang puno sang iya bangkaw nagbuno sa iya sa tiyan kag ang bangkaw naglapos sa iya likod. Si Asael naghaplak nga patay sa duta, kag ang tagsatagsa nga nagkadto sa amo nga lugar sa diin sia nagahamyang nagdulog kag nagtindog didto.

24Pero si Joab kag si Abisai nagpangita kay Abner, kag sang pagtunod sang adlaw nakaabot sila sa bakulod sang Ama, sa sidlangan sang Gia sa dalanon pakadto sa desierto sang Gabaon.

25Ang mga tawo gikan sa tribo ni Benjamin nagtipon liwat sa palibot ni Abner, kag nagtindog sila sa ibabaw sang bakulod.

26Si Abner nagsinggit kay Joab, “Indi na gid bala mag-untat ang aton pag-inaway? Wala ka bala kahibalo nga sa katapusan wala kita sing makuha sini kundi pagdumtanay? Mga kasimanwa man lang kita. San-o mo pa bala pauntaton ang imo mga tinawo sa paglagas sa amon?”

27Nagsabat si Joab, “Nagasumpa ako sa Dios nga buhi nga kon wala ka lang maghambal, ang akon mga tinawo magapadayon sa paglagas sa imo tubtob mag-aga.”

28Dayon si Joab nagpatunog sang trumpeta, subong patimaan agod ang tanan niya nga mga tinawo mag-untat sa paglagas sa mga Israelinhon, kag nag-untat ang inaway.

29Si Abner kag ang iya mga tinawo naglakat paagi sa Kapatagan sang Jordan sa bug-os nga gab-i. Nagtabok sila sa Suba sang Jordan, kag nakabalik sila sa Mahanaim sa tapos makapanglakaton sa bug-os nga aga.

30Sang pag-untat ni Joab sa paglagas, gintipon niya ang tanan niya nga mga tinawo kag nasapwan niya nga desi-nwebe ang wala sa ila lakip kay Asael.

31Ang mga tinawo ni David nakapatay sing 360 ka mga tinawo ni Abner halin sa tribo ni Benjamin.

32Si Joab kag ang iya mga tinawo nagkuha sang bangkay ni Asael kag ginlubong ini sa lulobngan sang iya panimalay sa Betlehem. Dayon naglakat sila sa bug-os nga gab-i kag nakabalik sa Hebron sang kaagahon.

← Chapter 1 Jump to: Chapter 3 →