2 Samuel 17

Ilonggo (Maayong Balita nga Biblia (2012))

← Chapter 16 Jump to: Chapter 18 →

1Isa ka adlaw, si Ahitofel nagsiling kay Absalom, “Papilia ako sing 12,000 ka mga tawo, kag karon sa gab-i magwa ako sa pagpangita kay David.

2Salakayon ko sia samtang ginalapyo sia kag ginaluyahan. Magakahadlok sia, kag ang tanan niya nga mga tinawo malagyo. Ang hari lang ang akon patyon,

3kag dayon ipabalik ko sa imo ang tanan niya nga mga tinawo, subong sang asawa nga nagabalik sa iya bana. Isa lamang ka tawo ang luyag mo patyon, kag ang iban nga mga tawo indi maano.”

4Ini daw maayo nga laygay kay Absalom kag sa tanan nga mga pangulo sang Israel.

5Pero si Absalom nagsiling, “Tawga si Husai kag pamatian ta ang iya isiling.”

6Sang pag-abot ni Husai, si Absalom nagsiling sa iya, “Amo ini ang plano ni Ahitofel nga ginhatag sa amon, sundon bala naton ini? Kon indi, ano bala sa imo ang dapat naton himuon?”

7Si Husai nagsabat, “Ang plano ni Ahitofel nga ginhatag sa inyo indi maayo sa sini nga tion.

8Nahibal-an mo nga ang imo amay nga si David kag ang iya mga tinawo batid sa inaway kag mabangis sila pareho sang uso sa kagulangan nga nadulaan sang iya mga tutoy. Ang imo amay batid nga soldado kag wala nagatulog kon gab-i upod sa iya mga tinawo.

9Sa sini nga tion ayhan didto sia nagapanago sa isa ka kweba, ukon sa iban nga lugar. Sa pagsalakay ni David sang imo mga tinawo, ang bisan sin-o nga makabati sini magasiling nga nalutos na ang imo mga tinawo.

10Dayon ang pinakamaisog nga mga tawo subong sang mga leon magakahadlok, tungod kay ang tanan nga mga tawo sa Israel nakahibalo nga ang imo amay isa ka bantog nga soldado kag ang iya mga tinawo batid nga mga hangaway.

11Ang akon laygay amo nga tipunon mo ang tanan nga mga Israelinhon sa bug-os nga pungsod, subong kadamo sang balas sa baybayon, kag ikaw gid ang magpangulo sa inaway.

12Pangitaon naton si David bisan diin sia, kag salakayon naton sia sing kibot. Sia kag ang iya mga tinawo magakalamatay kag wala sing isa nga mabilin.

13Kon magpalagyo sia sa siudad, ang aton mga tinawo magdala sing mga lubid kag pukanon nila ang siudad kag guyoron ini pakadto sa latagon, kag wala sing mabilin nga bato didto sa ibabaw sang bakulod.”

14Si Absalom kag ang tanan nga mga Israelinhon nagsiling, “Ang plano ni Husai mas maayo sang sa iya ni Ahitofel.” Ginbuot sang Ginoo nga ang maayo nga plano ni Ahitofel indi pagsundon agod malutos si Absalom.

15Dayon ginsugiran ni Husai si Sadoc kag si Abiatar nga mga pari kon ano ang plano nga iya ginhatag kay Absalom kag sa mga pangulo sang mga Israelinhon, kag kon ano nga laygay ang ginhatag ni Ahitofel.

16Si Husai nagsiling pa gid, “Karon, dalidali kamo! Pahibal-a si David nga indi sia magpabilin sa mga ginsang-an sang suba sa desierto karon nga gab-i, kundi magtabok sia gilayon sa Jordan, agod sia kag ang iya mga tinawo indi madakpan kag magkalamatay.”

17Si Jonatan nga anak ni Abiatar kag si Ahimaaz nga anak ni Sadoc nagahulat sa tuboran sang Enrogel sa gwa sang Jerusalem, tungod kay indi sila luyag nga makit-an sa siudad. Ang isa ka suloguon nga babayi nagakadto sa ila pirme kag nagasugid sa ila sang nagakahanabo, kag dayon nagalakat sila kag sugiran si Haring David.

18Pero sang isa ka adlaw, may isa ka bata nga lalaki nga nakakita sa ila kag ginsugid sila kay Absalom, gani nagdalidali sila sa pagpanago sa balay sang isa ka tawo sa Bahurim. Ini nga tawo may bubon malapit sa iya balay kag nagpanaog sila sa sini nga bubon.

19Ang asawa sang tawo nagtabon sang baba sang bubon, kag ginsabwagan ini sang trigo agod nga wala sing makatalupangod sini.

20Ang mga opisyales ni Absalom nagkadto sadto nga balay kag nagpamangkot sa babayi, “Diin na bala si Ahimaaz kag si Jonatan?” Nagsabat sia, “Nagtabok sila sa suba.” Ginpangita nila sila pero wala nila makita, gani nagbalik sila sa Jerusalem.

21Sang nakalakat na sila, si Ahimaaz kag si Jonatan nagsaka kag naggwa sa bubon kag naglakat kag ginsugid ini kay Haring David. Ginsugiran nila sia kon ano ang plano ni Ahitofel batok sa iya kag nagsiling sila, “Dalidali kamo kag magtabok sa suba.”

22Gani si David kag ang tanan niya nga mga tinawo nagtabok dayon sa Jordan, kag sang magpamanagbanag didto na sila sa tabok sang suba.

23Sang pagkahibalo ni Ahitofel nga ang iya plano wala ginsunod, nagsakay sia sa iya asno kag nagpauli sa iya banwa. Sa tapos niya mabilin ang iya panimalay sa nagakaigo nga kahimtangan, ginbitay niya ang iya kaugalingon. Ginlubong sia sa lulobngan sang iya panimalay.

24Si David nakalambot na sa banwa sang Mahanaim sang si Absalom kag ang iya mga tinawo nagatabok pa lang sa Suba sang Jordan.

25Karon ginhimo ni Absalom si Amasa nga pangulo sang mga soldado sa baylo ni Joab. Si Amasa anak ni Jeter nga Ismaelinhon, ang iya iloy amo si Abigail nga anak ni Nahas nga utod sang iloy ni Joab nga amo si Seruya.

26Si Absalom kag ang iya mga tinawo naghimo sing kampo didto sa Galaad.

27Sang pag-abot ni David sa Mahanaim, ginsugata sia ni Sobi nga anak ni Nahas nga taga-siudad sang Raba sa Amon, kag ni Maquir nga anak ni Amiel nga taga-Lodebar, kag ni Barsilai nga taga-Rogelim sa Galaad.

28Nagdala sila sing mga yahong, mga kolon, kag mga hiligdaan. Nagdala man sila sing pagkaon para kay David kag sa iya mga tinawo: trigo, sebada, harina, sinanlag nga uyas, balatong, lentihas, dugos, keso, mantikilya, kag pila ka mga karnero. Kahibalo sila nga si David kag ang iya mga tinawo pagagutmon, pagauhawon, kag pagakapuyon sa desierto.

← Chapter 16 Jump to: Chapter 18 →