2 Samuel 14

Ilonggo (Maayong Balita nga Biblia (2012))

← Chapter 13 Jump to: Chapter 15 →

1Si Joab nga ang iya iloy amo si Seruya nakahibalo nga si Haring David nahidlaw gid kay Absalom.

2Gani nagpatawag si Joab sang isa ka maalam nga babayi nga nagaestar sa Tekoa. Sang pag-abot niya, nagsiling si Joab sa iya, “Magpakunokuno ka nga nagalalaw, isuksok ang imo bayu sa paglalaw, kag indi ka magpanghusay sang imo buhok. Magginawi ka subong sang isa ka babayi nga naglalaw sing malawig nga tion.

3Dayon kadto ka sa hari kag sugiri sia sang akon ginsiling sa imo.” Kag si Joab nagsiling sa iya sang iya inughambal.

4Ang babayi nagkadto sa hari, naghapa sa duta sa pagtahod sa iya, kag nagsiling, “Buligi ako, Mahal nga Hari!”

5Ang hari nagpamangkot sa iya, “Ano bala ang kinahanglan mo?” Nagsabat sia, “Isa ako ka imol nga balo, Mahal nga Hari. Patay na ang akon bana.

6May duha ako ka mga anak nga lalaki kag sang isa ka adlaw nag-away sila sa uma sa diin wala gid sing may makatambag sa ila, kag ang isa sa ila ginpatay sang isa.

7Karon, Mahal nga Hari, ang tanan ko nga mga pariente naakig sa akon, kag ginpangayo nila nga itugyan ko sa ila ang isa ko ka anak agod mapatay nila, tungod sang iya pagpatay sang iya utod. Kon himuon nila ini, madulaan ako sing anak. Kuhaan nila ako sing katapusan nga paglaom, kag wala na sing anak ang akon bana nga magapadayon sang iya ngalan.”

8Ang hari nagsabat, “Pauli ka, kay ako ang makahibalo sini nga butang.”

9Nagsabat sia, “Mahal nga Hari, ang bisan ano nga imo pagahimuon, ako kag ang akon panimalay amo ang basulon, ikaw kag ang imo harianon nga panimalay wala sing salabton.”

10Ang hari nagsabat, “Kon may isa nga magpamahog sa imo, dalha sia sa akon kag indi na niya ikaw paggamuhon liwat.”

11Nagsiling sia, “Mahal nga Hari, kon mahimo magpangamuyo ka sa Ginoo nga imo Dios, agod nga ang akon pariente nga nagaplano sa pagtimalos tungod sang kamatayon sang akon anak indi maghimo sing daku pa gid nga sala kag magpatay sang akon isa pa gid ka anak.” Si David nagsabat, “Nagasaad ako sa buhi nga Ginoo nga ang imo anak indi gid maano.”

12Ang babayi nagsiling, “Kon mahimo, Mahal nga Hari, may isa pa gid ako ka inughambal sa imo.” “Sigi,” sabat sang hari.

13Nagsiling sia sa hari, “Ngaa bala naghimo ikaw sing sayop batok sa mga tawo sang Dios? Wala nimo pagpabalika ang imo anak gikan sa iya pagpalagyo, kag tungod sini ginakondenar mo ang imo kaugalingon paagi sa imo bag-o lang ginsiling.

14Tanan kita mapatay, kaangay kita sang tubig nga naula sa duta kag indi na mabalik liwat. Bisan ang Dios wala nagapabalik sang mga patay nga tawo, pero ang hari sarang makapangita sing paagi sa pagpabalik sang tawo nga nakapalagyo.

15Karon, Mahal nga Hari, amo ini ang kabangdanan nga ako nagkari sa paghambal sa imo: ang mga tawo nagpahog sa akon, gani nagahunahuna ako sa pagpakighambal sa imo nga nagalaom nga ikaw magatuman sang akon ginapangayo.

16Naghunahuna ako nga ikaw magpamati sa akon kag luwason mo ako sa tawo nga luyag magpatay sa akon kag sa akon anak, kag sa pagpahalin sa amon sa duta nga ginhatag sang Dios sa iya mga tawo.

17Nagsiling ako sa akon kaugalingon nga ang imo saad, O Mahal nga Hari, magaluwas sa akon sa katalagman, tungod kay ang hari kaangay sang anghel sang Dios nga nakahibalo sang maayo sa malain. Kabay nga updan ka sang Ginoo nga imo Dios!”

18Ang hari nagsabat, “May isa lang ako ka pamangkot sa imo, kag kinahanglan sugiran mo ako sang bug-os nga kamatuoran.” Nagsabat sia, “Magpamangkot ka sang bisan ano, Mahal nga Hari.”

19Nagpamangkot sia sa iya, “Si Joab bala ang nagtudlo sa imo sini?” Nagsabat sia, “Mahal nga Hari, nagasumpa ako sa Ginoo, nga indi ako makabalibad sa pagsabat sang imo pamangkot. Si Joab nga imo opisyal amo ang nagsugo sa akon kon ano ang akon himuon kag ihambal.

20Ginhimo niya ini agod matadlong ini tanan nga butang. Mahal nga Hari, maalam ikaw subong sang anghel sang Dios kag nakahibalo sang tanan nga nagakatabo sa kalibutan.”

21Sang ulihi, ang hari nagsiling kay Joab, “Nagpamat-od ako nga himuon ang imo luyag. Lakat kag kuhaa ang pamatan-on nga si Absalom kag dalha sia diri sa akon.”

22Si Joab naghapa sa duta sa atubang ni David sa pagtahod, kag nagsiling, “Kabay nga bendisyunan ka sang Dios, Mahal nga Hari! Karon nahibal-an ko nga nalipay ka sa akon tungod kay gintuman mo ang akon pangayo.”

23Dayon nagtindog sia kag nagkadto sa Gesur kag ginkuha si Absalom kag gindala sa Jerusalem.

24Pero ang hari nagsugo nga si Absalom indi dapat mag-estar sa palasyo. Nagsiling ang hari, “Indi ako luyag nga makita sia.” Gani si Absalom nag-estar sa iya kaugalingon nga balay kag wala magpakita sa hari.

25Wala gid sing isa nga nabantugan sa bug-os nga Israel sa ka gwapo pareho kay Absalom. Wala sia sing depekto halin sa iya ulo tubtob sa iya tiil.

26Ang iya buhok madamol kaayo nga iya ginapaguntingan sing makaisa sa isa ka tuig, kon ini maglaba kag magbug-at. Ini mga lima ka libra, suno sa timbangan nga talaksan sang hari.

27Si Absalom may tatlo ka mga anak nga lalaki kag isa ka babayi nga ginahingalanan kay Tamar nga tama ka gwapa.

28Si Absalom nag-estar sa Jerusalem sa sulod sing duha ka tuig nga wala makapakigkita sa hari.

29Dayon ginpatawag niya si Joab, sa pagpangabay sa iya sa pagpakigkita sa hari tungod sa iya, pero si Joab wala magkadto sa iya. Sa liwat ginpasugoan sia ni Absalom, pero si Joab nagpamalibad sa pagkadto.

30Gani ginsingganan ni Absalom ang iya mga suloguon, “Nahibal-an ninyo nga ang uma ni Joab nagatambi sa akon, kag natamnan ini sang sebada. Lakat kamo kag tutdi ninyo ini.” Gani naglakat sila kag gintutdan nila ang uma.

31Si Joab nagkadto sa balay ni Absalom kag nagpanukna, “Ngaa bala gintutdan sang imo mga suloguon ang akon uma?”

32Si Absalom nagsabat, “Ginpasugoan ko ikaw sa pagkadto diri kay pakadtuon ko ikaw sa hari sa pagpamangkot sa iya: ‘Ngaa nga naghalin ako sa Gesur kag nagkadto diri? Maayo pa nga nagpabilin na lang ako didto.’” Si Absalom nagsiling pa gid, “Luyag ko nga patigayunon mo nga makapakigkita ako sa hari, kag kon nakasala ako, dayon ipapatay niya ako.”

33Gani si Joab nagkadto kay Haring David kag ginsugiran sia sang ginsiling ni Absalom. Ang hari nagpatawag kay Absalom kag nag-abot sia kag naghapa sa duta sa atubang sang hari. Dayon ang hari naghalok sa iya sa pag-abiabi.

← Chapter 13 Jump to: Chapter 15 →