2 Samuel 9

Ilonggo (Maayong Balita nga Biblia (2012))

← Chapter 8 Jump to: Chapter 10 →

1Sang isa ka adlaw, si David nagpamangkot, “May nabilin pa bala nga isa sa panimalay ni Saul nga akon mapakitaan sing kaayo tungod kay Jonatan?”

2May isa ka alagad sa panimalay ni Saul nga si Siba, kag ginsingganan sia sa pagkadto kay David. Ang hari nagpamangkot, “Ikaw bala si Siba?” Nagsabat sia, “Huo, Mahal nga Hari.”

3Ang hari nagpamangkot sa iya, “May nabilin pa bala sa panimalay ni Saul nga mapakitaan ko sing kaayo suno sa akon ginsaad sa Dios nga akon himuon?” Si Siba nagsabat, “May isa pa ka anak nga lalaki si Jonatan nga nabilin. Lupog sia.”

4Ang hari nagpamangkot, “Diin bala sia?” Nagsabat si Siba, “Yadto sia sa balay ni Maquir nga anak ni Amiel sa Lodebar.”

5Gani si Haring David nagpasugo sa pagkuha kay Mefiboset.

6Sang pag-abot ni Mefiboset nga anak ni Jonatan kag apo ni Saul, naghapa sia sa atubang ni David sa pagtahod sa iya. Si David nagsiling, “Mefiboset!” Kag nagsabat sia, “Yari ako, Mahal nga Hari.”

7Si David nagsabat, “Indi ka magkahadlok! Manginmaayo ako sa imo tungod sang imo amay nga si Jonatan. Iuli ko sa imo ang tanan nga kadutaan nga iya sang imo lolo nga si Saul kag magakaon ka upod sa akon sa akon lamisa.”

8Si Mefiboset naghapa liwat kag nagsiling, “Wala na ako sing pulos! Pareho lang ako sang isa ka patay nga ido, Mahal nga Hari! Ngaa bala ayuhan mo gid ako?”

9Dayon ginpatawag sang hari si Siba nga alagad ni Saul kag ginsingganan, “Ginahatag ko kay Mefiboset nga apo sang imo agalon, ang tanan nga mga pagkabutang ni Saul kag sang iya panimalay.

10Ikaw, ang imo mga anak nga lalaki, kag ang imo mga alagad magapanguma sang duta para sa panimalay sang imo agalon nga si Saul kag tipunon mo ang patubas nga para sa ila. Pero si Mefiboset iya magakaon upod sa akon pirme sa akon lamisa.” Karon si Siba may kinse ka mga anak nga lalaki kag may baynte ka mga suloguon.

11Si Siba nagsabat, “Tumanon ko ang tanan nga imo ginasugo, Mahal nga Hari.” Gani si Mefiboset nagkaon sa lamisa sang hari, pareho sang isa sang mga anak nga lalaki sang hari.

12Si Mefiboset may isa ka pamatan-on nga anak nga lalaki nga ginahingalanan kay Mica. Ang tanan nga katapo sang panimalay ni Siba nanginsuloguon ni Mefiboset.

13Gani si Mefiboset nga lupog nag-estar sa Jerusalem, kag nagkaon sa lamisa sang hari.

← Chapter 8 Jump to: Chapter 10 →