2 Samuel 5

Ilonggo (Maayong Balita nga Biblia (2012))

← Chapter 4 Jump to: Chapter 6 →

1Karon ang bug-os nga mga tribo sang Israel nagkadto kay David sa Hebron kag nagsiling sa iya, “Mga pariente mo kami.

2Sang una sang si Saul ang amon hari, ikaw ang nagpangulo sang mga tawo sang Israel sa inaway. Kag ang Ginoo nagsaad sa imo nga ikaw ang magapangulo sang iya mga tawo kag mangin-ila manugdumala.”

3Gani ang tanan nga mga pangulo sang Israel nagkadto kay Haring David sa Hebron. Naghimo sia sing kasugtanan sa ila, kag ginhaplas nila sia nga hari sang Israel.

4Si David nagaedad sing traynta ka tuig sang iya paghari kag naggahom sia sa sulod sing kwarenta ka tuig.

5Didto sa Hebron naghari sia sa Juda sa sulod sang pito ka tuig kag tunga, kag sa Jerusalem sa bug-os nga Israel kag Juda sa sulod sang trayntay tres ka tuig.

6Si Haring David kag ang iya mga tinawo nagsalakay sa Jerusalem. Ang mga Jebusnon nga nagaestar didto naghunahuna nga si David indi sarang makaagaw sang siudad. Gani nagsiling sila sa iya, “Indi gid ikaw makasulod diri, bisan ang mga bulag kag ang mga piang sarang makatabog sa imo.”

7Pero gin-agaw ni David ang ila pamakod sa Sion, kag ginkilala ini nga “Siudad ni David.”

8Sa sadto nga adlaw si David nagsiling sa iya mga tinawo, “May yari bala diri nga nagadumot sa mga Jebusnon subong sang akon pagdumot kag handom sa pagpatay sa ila? Magkadto sia sa kanal nga ginaagyan sang tubig kag salakayon ining makaluluoy nga mga bulag kag mga piang.” Gani amo ina nga ginasiling nga ang mga bulag kag mga piang indi makasulod sa balay sang Ginoo.

9Sa tapos maagaw ni David ang pamakod, nag-estar sia didto kag gintawag niya ini nga “Siudad ni David.” Ginpatindugan niya sing mga pader ang palibot sini nga nagalambot halin sa lugar nga ginpangtampukan sa nasidlangan nga bahin sang bakulod.

10Nagpadayon sia nga nangingamhanan tungod kay ang Ginoo, ang Dios sang mga hangaway nagaupod sa iya.

11Si Hiram nga hari sang Tiro nagpadala sing mga tiglawas kay David; ginpadalhan sia sing mga tablon nga sedro, mga panday kag mga kantero sa pagpatindog sang iya palasyo.

12Gani si David nakatalupangod nga ang Ginoo nagpalig-on sa iya subong nga hari sang Israel, kag nagpauswag sang iya ginharian tungod sang iya mga tawo nga Israelinhon.

13Sa tapos sia makahalin sa Hebron, si David nagkuha sing madamo pa nga mga babayi kag mga asawa halin sa Jerusalem, kag nagdamo pa ang iya mga anak nga lalaki kag mga anak nga babayi.

14Ang mga anak nga natawo sa iya sa Jerusalem amo sanday Samua, Sobab, Natan, Solomon,

15Ibhar, Elisua, Nefeg, Jafia,

16Elisama, Eliada, kag Elifelet.

17Ang mga Filistinhon nakabati nga si David nanginhari sa Israel, gani nagtaklad ang ila mga hangaway sa pagdakop sa iya. Sang pagkabati sini ni David nagdulhog sia sa napamakuran nga lugar.

18Ang mga Filistinhon nag-abot sa Kapatagan sang Refaim kag gin-agaw ini.

19Si David nagpamangkot sa Ginoo, “Malakat bala ako sa pagpakig-away sa mga Filistinhon? Padag-on mo bala ako?” Ang Ginoo nagsabat, “Lakat ka, padag-on ko ikaw!”

20Gani si David nagkadto sa Baal-perazim kag ginlutos ang mga Filistinhon didto. Nagsiling sia, “Ang Ginoo nagbulwang sang akon mga kaaway subong sang isa ka baha.” Gani yadto nga lugar gintawag nga Baal-perazim.

21Ginbayaan sang mga Filistinhon ang ila mga diosdios didto sang ila pagpalagyo, kag gindala ini ni David kag sang iya mga tinawo.

22Dayon ang mga Filistinhon nagbalik sa Kapatagan sang Refaim kag gin-agaw ini liwat.

23Sa liwat ginpamangkot ni David ang Ginoo kag ang Ginoo nagsabat, “Indi sila pagsalakaya halin diri, kundi libot ka kag salakaya sila sa likod malapit sa mga kahoy nga balsamo.

24Kon imo mabatian ang pagmartsa sa ibabaw sang mga kahoy, maghanda ka sa pagsalakay, tungod kay ina nagakahulogan nga nag-una ako sa imo sa paglutos sang mga hangaway sang mga Filistinhon.”

25Ginhimo ni David ang ginsiling sang Ginoo, kag gintabog niya ang mga Filistinhon halin sa Geba tubtob sa Gezer.

← Chapter 4 Jump to: Chapter 6 →