2 Samuel 8

Ilonggo (Maayong Balita nga Biblia (2012))

← Chapter 7 Jump to: Chapter 9 →

1Sang ulihi, ginsalakay ni Haring David ang mga Filistinhon kag ginlutos sila. Gin-agaw niya ang Meteg-ama sa pagdumala sang mga Filistinhon.

2Dayon ginlutos niya ang mga Moabnon, ginpahigda niya sila sa duta, kag gintakos sila sing lubid. Sa tagsa ka duha ka takos iya ginpamatay kag ang ikatatlo nga takos iya gintugotan nga mabuhi. Gani ang mga Moabnon nanginsakop niya kag nagbayad sila sing buhis sa iya.

3Dayon ginlutos niya ang hari sang Soba, si Hadadezer nga anak ni Rehob, sang nagkadto si Hadadezer sa paggahom liwat sang kadutaan sa higad sang Suba sang Eufrates.

4Si David nagdakop sing 1,700 sang iya mga tawo nga nagasakay sa kabayo, kag 20,000 sang iya mga soldado nga nagalakat lang. Ginpamiang man niya ang mga kabayo nga nagaguyod sing karwahi, kag nagbilin sang mga kabayo para lamang sa 100 ka mga karwahi.

5Sang ang mga Sirianhon halin sa Damasco nag-abot sa pagbulig kay Hadadezer, ginsalakay sila ni David kag ginpamatay ang 22,000 sa ila.

6Dayon nagpatindog sia sing mga pamakod para sa iya mga hangaway sa ila kadutaan kag nangin-iya sila mga sakop kag nagbayad sila sing buhis sa iya. Ang Ginoo nagpadaog kay David bisan diin.

7Si David nag-agaw sang mga taming nga bulawan nga iya sang mga opisyales ni Hadadezer kag gindala ini sa Jerusalem.

8Nagkuha man sia sing madamo nga bronsi halin sa Beta kag sa Berotai, mga siudad nga gingamhan ni Hadadezer.

9Si Haring Toi nga taga-Hamat nakabati nga ginlutos ni David ang bug-os nga hangaway ni Hadadezer.

10Gani ginpadala niya ang iya anak nga si Joram kay Haring David sa pagpanginbulahan tungod sa iya pagdaog batok kay Hadadezer, nga gin-away ni Toi sing madamo nga beses. Si Joram nagdala kay Haring David sing mga dulot nga nahimo sa pilak, bulawan, kag bronsi.

11Ginhalad ini ni Haring David agod gamiton sa pagsimba, pati ang pilak kag bulawan nga iya gin-agaw sa mga pungsod nga iya ginlutos:

12ang Edom, Moab, Amon, Filistia, Amalek—kag subong man ang bahin nga iya naagaw kay Hadadezer.

13Si David nanginbantog pa gid sang iya pagbalik sa tapos niya mapamatay ang 18,000 ka mga Edomnon sa Kapatagan sang Asin.

14Nagpatindog sia sing mga pamakod para sa iya mga hangaway sa bug-os nga Edom, kag ang mga tawo didto nangin-iya mga sakop. Bisan diin, ang Ginoo nagpadaog kay David.

15Si David naggahom sa bug-os nga Israel, kag gintinguhaan niya nga sa tanan nga tion ang iya mga tawo pagatratahon sing maayo kag matarong.

16Si Joab nga ang iya iloy si Seruya amo ang pangulo sang mga hangaway; si Josafat nga anak ni Ahilud amo ang gintugyanan sang mga listahan;

17si Sadoc nga anak ni Ahitub kag si Ahimelek nga anak ni Abiatar amo ang mga pari; si Seraya amo ang sekretaryo sang administrasyon;

18si Benaya nga anak ni Joiada amo ang pangulo sang mga badigard ni David, kag ang mga anak ni David, mga pari.

← Chapter 7 Jump to: Chapter 9 →