2 Samuel 15

Ilonggo (Maayong Balita nga Biblia (2012))

← Chapter 14 Jump to: Chapter 16 →

1Sa tapos sini, si Absalom nag-aman sing karwahi kag mga kabayo para sa iya kaugalingon kag singkwenta ka mga soldado ang nag-una sa iya.

2Aga pa sia nagamata kag nagatindog sa higad sang dalan sa pwerta sang siudad. Kon may tawo nga mag-abot nga may kaso nga luyag niya ipahusay sa hari, ginatawag sia ni Absalom kag ginapamangkot kon taga-diin sia. Sa tapos sia makasugid kon taga-diin sia kag kon sa ano nga tribo sia naghalin,

3si Absalom nagasiling sa iya, “May rason ikaw, pero ang hari wala sing tawo nga magabulig sa imo.”

4Kag si Absalom nagsiling pa gid, “Kon ako lang kuntani ang hukom! Ang kada-isa nga may kasuayon makakadto sa akon kag apinan ko ang iya katarungan.”

5Kon ang tawo magpalapit kay Absalom kag magluhod sa atubang niya, si Absalom nagaduko kag ginauyatan sia kag halukan.

6Ginahimo ini ni Absalom sa tagsa ka Israelinhon nga nagakadto sa hari sa pagpahusay sang iya kaso, gani nahaylo niya ang mga tawo.

7Sa tapos ang apat ka tuig, si Absalom nagsiling kay Haring David, “Mahal nga Hari, malakat ako anay sa Hebron sa pagtuman sang akon panaad sa Ginoo.

8Sang didto pa ako nagaestar sa Gesur, sa Siria, nagsaad ako sa Ginoo nga kon pabalikon niya ako sa Jerusalem, magasimba ako sa iya sa Hebron.”

9Ang hari nagsiling, “Sigi, lakat, ginatugotan ko ikaw.” Gani si Absalom nagkadto sa Hebron.

10Pero nagpasugo sia sa tanan nga mga tribo sang Israel sa pagsiling, “Kon mabatian ninyo ang tunog sang mga trumpeta, dayon magsinggit kamo, ‘Si Absalom nanginhari sa Hebron!’”

11May 200 ka mga tawo nga nag-upod kay Absalom halin sa Jerusalem nga iya gin-agda, wala sila makahibalo sini nga plano kundi nag-upod sila nga wala sing malain nga tinutuyo.

12Samtang nagadulot sia sang mga halad, si Absalom nagpatawag man didto sa banwa sang Gilo kay Ahitofel nga amo ang isa sang mga palamangkutan sang hari. Ang plano batok sa hari nagbaskog kag nagdamo ang sumolunod ni Absalom.

13May isa ka mensahero nga nagsugid kay David nga ang mga Israelinhon nagbuylog kay Absalom.

14Gani si David nagsiling sa tanan niya nga mga opisyales nga kaupod niya didto sa Jerusalem, “Kinahanglan malakat kita sa gilayon, kon luyag kita makapalagyo kay Absalom! Dali, basi maabtan niya kita diri kag lutoson ukon pamatyon kita tanan diri sa siudad!”

15Nagsabat sila, “Huo, Mahal nga Hari. Handa kami sa paghimo sang bisan ano nga imo ginasiling.”

16Gani ang hari naglakat, upod sang bug-os niya nga panimalay kag sang iya mga opisyales, luas sa iya napulo ka mga babayi nga iya ginbilin sa pag-atipan sang palasyo.

17Samtang ang hari kag ang tanan niya nga mga tinawo naghalin sa siudad, nagdulog sila sa katapusan nga balay.

18Ang iya tanan nga mga opisyales nagtindog sa iya kilid samtang ang mga gwardya sang hari nag-agi sa iya atubang. Ang 600 ka mga soldado nga nagsunod sa iya halin sa Gat nag-agi man,

19kag ang hari nagsiling kay Itai nga ila pangulo, “Ngaa bala maupod ka sa amon? Balik ka, kag mag-upod sa bag-o nga hari. Dumoluong ka kag nakapalagyo halin sa imo kaugalingon nga pungsod.

20Nag-estar ka diri sa malip-ot lamang nga tion, gani, ngaa bala maupod ka sa akon? Wala gani ako makahibalo kon diin ako makadto. Balik ka, kag dalha ang imo mga kasimanwa upod sa imo, kag kabay ang Ginoo magmaluloy-on kag magmatutom sa imo.”

21Pero si Itai nagsabat, “Mahal nga Hari, nagasumpa ako sa imo sa ngalan sang Ginoo nga magaupod ako gihapon sa imo bisan diin ikaw makadto kag bisan pa mapatay ako.”

22Gani si David nagsabat, “Sigi, lakat na!” Gani si Itai naglakat upod sa iya mga tinawo kag sang tanan nila nga mga kabataan.

23Ang mga tawo naghibi sing tudo sang maghalin ang mga sumolunod ni David. Ang hari nga ginasunod sang iya mga tinawo nagtabok sa Sapa sang Kidron, kag nagtabok sila padulong sa desierto.

24Si Sadoc nga pari yadto didto kag ang mga Levita kaupod niya nga nagadala sang Kaban sang Kasugtanan. Ila anay ini ginbutang, tubtob ang tanan nga tawo nakahalin sa siudad. Si Abiatar nga pari yadto man didto.

25Dayon ang hari nagsiling kay Sadoc, “Dalha ang Kaban sang Kasugtanan pabalik sa siudad. Kon ang Ginoo nalipay sa akon, sa pila ka adlaw pabalikon niya ako agod makita ko ini kag ang lugar nga iya nabutangan.

26Pero kon wala sia nalipay sa akon, sarang niya mahimo ang iya luyag nga himuon.”

27Kag nagsiling pa gid sia kay Sadoc, “Maayo pa, dalhon mo ang imo anak nga si Ahimaaz, kag ang anak ni Abiatar nga si Jonatan pabalik sa siudad nga wala sing kahadlok.

28Magahulat ako sa ginsang-an sang suba sa desierto tubtob nga makabaton ako sing balita halin sa imo.”

29Gani si Sadoc kag si Abiatar nagdala sang Kaban sang Kasugtanan pabalik sa Jerusalem kag nagpabilin didto.

30Si David nagtaklad sa Bukid sang Olivo nga nagahibi. Naglakat sia nga nagatiil lang kag gintabunan niya ang iya ulo sa kasubo. Ang tanan nga nagaupod sa iya nagtabon sang ila mga ulo kag naghibi man.

31Sang masugiran si David nga si Ahitofel nagbuylog kay Absalom sa pagrebelde, nagsiling sia, “Kon mahimo, O Ginoo, himua nga walay pulos ang mga laygay ni Ahitofel!”

32Sang pag-abot ni David sa putokputokan sang bakulod, sa diin may lugar didto nga ginasimbahan, ang iya salaligan nga abyan nga si Husai nga Arquinhon nagsugata sa iya nga gisi ang iya mga bayu kag may lunang ang iya ulo.

33Si David nagsiling sa iya, “Wala ka gid sing sarang mabulig sa akon kon mag-upod ka.

34Pero sarang ka makabulig sa akon paagi sa pagguba sang plano ni Ahitofel kon magbalik ka sa siudad kag magsiling kay Absalom, ‘Mahal nga Hari, karon magaalagad ako sa imo subong sang akon pag-alagad anay sa imo amay.’

35Ang mga pari nga si Sadoc kag si Abiatar yadto didto kag sugiri sila sang tanan nga imo mabatian sa palasyo sang hari.

36Kaupod nila ang ila mga anak nga si Ahimaaz kag si Jonatan kag sarang mo sila masugo sa pagdala sa akon sang mga balita nga imo matipon.”

37Gani si Husai nga abyan ni David, nagbalik sa siudad sa tion gid sang pag-abot ni Absalom.

← Chapter 14 Jump to: Chapter 16 →