1 Samuel 1

Ilonggo (Ang Biblia (1982))

Jump to: Chapter 2 →

1May isa ka lalaki sa Ramataimzofim sa kabakoloran sang Efraim, kag ang iya ngalan si Elcana nga anak ni Jeroham, ang anak ni Eliu, ang anak ni Tohu, ang anak ni Zuf, ang Efraimnon.

2May duha sia ka asawa; ang ngalan sang isa si Ana, kag ang ngalan sang isa si Penina. Kag si Penina may mga anak, apang si Ana walay anak.

3Karon ining lalaki nagataklad gikan sa iya banwa tuigtuig sa pagsimba kag paghalad sa Ginoo sang mga kasoldadosan sa Silo, diin ang duha ka anak nga lalaki ni Eli, nga si Ofni kag si Finees, mga sacerdote sang Ginoo.

4Sang adlaw nga si Elcana naghalad, naghatag sia sing mga bahin kay Penina nga iya asawa kag sa tanan niyang anak nga lalaki kag sa iya anak nga babayi;

5apang kay Ana naghatag sia sing pilo nga bahin, kay ginahigugma niya si Ana, apang ang Ginoo nagpabaw-as sa iya.

6Kag ang iya kaindis nagpaakig sa iya sing tama, sa pagpaugtas sa iya, bangud nga ginpabaw-as sia sang Ginoo.

7Gani ginhimo niya ang amo tuigtuig; kon magtaklad sia sa balay sang Ginoo, sa amo ginpaakig sia ni Penina. Busa naghibi si Ana kag wala magkaon.

8Kag si Elcana nga iya bana nagsiling sa iya, “Ana, ngaa bala nagahibi ka? Kag ngaa bala wala ka nagakaon? Kag ngaa bala nagakasubu ang imo tagiposoon? Indi bala ako labi pa sa imo sang sa napulo ka anak nga lalaki?”

9Nagtindug si Ana sa tapus nga nakakaon kag nakainum sila sa Silo. Karon ang sacerdote nga si Eli nagalingkod sa iya lingkoran sa luyo sang bakalan sang templo sang Ginoo.

10Sia may kapaitan sa kalag kag nagpangamuyo sa Ginoo, kag naghibi sing tama.

11Kag nagsaad sia kag nagsiling, “O Ginoo sang mga kasoldadosan, kon buut ka magtamud sa kapipit-an sang imo ulipon, kag magdumdum sa akon, kag indi magkalipat sa imo ulipon, kondi maghatag sa imo alagad sing anak nga lalaki, niyan sia ihatag ko sa Ginoo sa tanan nga adlaw sang iya kabuhi, kag wala sing inugkiskis nga magaagi sa iya olo. ”

12Sang nagpadayon sia sa pagpangamuyo sa atubangan sang Ginoo, si Eli nagtanda sang baba niya.

13Si Ana nagpamolong sa iya tagiposoon; ang iya mga bibig lamang ang naghulag, apang ang iya tingug wala mabatii; busa naghunahuna si Eli nga hobog sia.

14Kag si Eli nagsiling sa iya, “Tubtub pa bala san-o hobog ka? Isikway sa imo ang imo alak.”

15Apang si Ana nagsabat, “Indi, ginoo ko, ako babayi nga masinulub-on sa espiritu; wala ako makainum sing alak ukon ilimnon nga masingkal, kondi gin-ula ko ang akon kalag sa atubangan sang Ginoo.

16Dili pagkabiga ang imo ulipon nga malaut nga babayi, kay gikan sa kabugana sang akon kagha kag sang akon kalisdanan nagpamolong ako tubtub karon.”

17Niyan si Eli nagsabat, “Lakat ka sa paghidait, kag ang Dios sang Israel maghatag sa imo sang imo pangabay nga ginpangayo mo sa iya.”

18Kag nagsiling sia, “Magmahamut-an ang imo ulipon sa imo itololok.” Niyan naglakat ang babayi kag nagkaon, kag ang iya nawung indi na masubu.

19Nagbangon sila sing aga pa kag nagsimba sa atubangan sang Ginoo; niyan nagpauli sa ila balay sa Rama. Kag naghiusa si Elcana kay Ana nga iya asawa, kag ang Ginoo nagdumdum sa iya;

20kag sang nagsapul ang tion nagpanamkon si Ana kag nag-anak sing lalaki, kag ginhingalanan sia Samuel, kay nagasiling sia, “Ginpangayo ko sia sa Ginoo.”

21Kag ang lalaki nga si Elcana kag ang bug-os niyang panimalay nagtaklad sa pagdolot sa Ginoo sang halad nga tinuig, kag sang iya saad.

22Apang si Ana wala magtaklad, kay nagsiling sia sa iya bana, “Indi ako magtaklad tubtub nga ang bata malutas, kag ugaling dalhon ko sia, agud nga mag-atubang sia sa Ginoo, kag magpabilin didto sa gihapon.”

23Si Elcana nga iya bana nagsiling sa iya, “Himoa ang daw maayo sa imo, pabilin ka tubtub nga malutas mo sia; lamang, ang Ginoo mag-palig-on sang iya polong.” Gani nagpabilin ang babayi kag nagpasoso sang iya anak, tubtub nga nalutas sia niya.

24Kag sang nalutas niya sia, ginpataklad sia niya upud sa iya, pati sang tatlo ka tinday nga baka, isa ka efa sang harina, kag isa ka suludlan nga panit nga alak; kag gindala niya sia sa balay sang Ginoo sa Silo; kag ang bata lanubo pa.

25Niyan gin-ihaw nila ang baka, kag gindala ang bata kay Eli.

26Kag sia nagsiling, “O, ginoo ko! Sa nagakabuhi ang imo kalag, ginoo ko, ako ang babayi nga nagtindug diri sa luyo nimo, nga nagapangamuyo sa Ginoo.

27Tungud sini nga bata nagpangamuyo ako; kag ang Ginoo naghatag sa akon sang akon pangabay nga ginpangayo ko sa iya.

28Busa gintugyan ko man sia sa Ginoo; sa nagakabuhi sia ginatugyan sia sa Ginoo.” Kag nagsimba sila sa Ginoo didto.

Jump to: Chapter 2 →