1 Samuel 13

Ilonggo (Ang Biblia (1982))

← Chapter 12 Jump to: Chapter 14 →

1Si Saul… ka tuig sang nagsugud sia sa paggahum; kag nakagahum sia sa Israel sing… kag duha ka tuig.

2Si Saul nagpili nga sa iya sing tatlo ka libo ka lalaki sang Israel; ang duha ka libo sini upud kay Saul sa Micmas kag sa kabakoloran sang Bet-el, kag ang isa ka libo upud kay Jonatan sa Gabaa sang Benjamin; ang nabilin sang katawohan ginpadala niya ang tagsa ka tawo sa iya layanglayang.

3Si Jonatan naglaglag sang pamakud sang mga Filistinhon nga yara sa Geba; kag nakabati sini ang mga Filistinhon. Kag ginpatonog ni Saul ang budyong sa bug-os nga duta, nga nagasiling, “Pabati-a ang mga Hebreo.”

4Kag ang bug-os nga Israel nakabati nga ginasiling nga si Saul naglaglag sang pamakud sang mga Filistinhon, kag nga ang Israel man ginkangil-aran sang mga Filistinhon. Kag ang katawohan nagtipon sing tingub sa olihi ni Saul sa Gilgal.

5Kag ang mga Filistinhon nagtipon sing tingub sa ila kaugalingon sa pagpakig-away sa Israel, katloan ka libo ka kangga, kag anum ka libo ka manugkabayo, kag ang katawohan sa kadamuon subong sang balas sa baybayon; nagtaklad sila kag nagpahamtang sing dologan sa Micmas, nayon sa sidlangan sang Bet-aven.

6Sang nakita sang mga lalaki sang Israel nga yara sila sa ital-ital (kay ang katawohan yara sa katalagman), ang katawohan nagpanago sa mga lungib kag sa mga kasiotan, sa mga igang kag sa mga palanagoan kag sa mga awang,

7karon ang iban sang mga Hebreo nakatabok sa Jordan sa duta sang Gad kag Galaad. Si Saul yadto pa sia sa Gilgal, kag ang bug-os nga katawohan nagsonod sa iya nga nagakurug.

8Naghulat sia sing pito ka adlaw, sono sa tion nga ginpat-ud ni Samuel; apang si Samuel wala mag-abut sa Gilgal, kag ang katawohan nag-alaplaag gikan sa iya.

9Gani si Saul nagsiling, “Dalha diri sa akon ang halad-nga-sinonog, kag ang mga halad-sa-paghidait.” Kag gindolot niya ang halad-nga-sinonog.

10Sa gilayon nga natapus niya ang pagdolot sang halad-nga-sinonog, yari karon, si Samuel nag-abut; kag si Saul nagsugata sa iya agud nga maabiabi niya sia.

11Si Samuel nagsiling, “Ano bala ang nahimo mo?” Kag si Saul nagsiling, “Bangud nga nakita ko nga ang katawohan nga nag-alaplaag gikan sa akon, kag ikaw wala mag-abut sa sulud sang mga adlaw nga ginpat-ud, kag ang mga Filistinhon nagtipon sing tingub sa ila kaugalingon sa Micmas,

12nagsiling ako, ‘Karon ang mga Filistinhon magadulhog sa akon sa Gilgal, kag wala ako nakapangayo sang kahamuut sang Ginoo ’; gani ginpilit ko ang akon kaugalingon, kag gindolot ang halad-nga-sinonog.”

13Kag si Samuel nagsiling kay Saul, “Nakahimo ka sing binuang; wala mo nabantayi ang sogo sang Ginoo nga imo Dios, nga iya ginsogo sa imo; kay karon kuntani ang Ginoo nagtukud sang imo ginharian sa Israel sing dayon.

14Apang karon ang imo ginharian indi magpadayon; ang Ginoo nagpangita nga sa iya sing lalaki sono sa iya tagiposoon; kag ang Ginoo nagpili sa iya nga manginprincipe sa ibabaw sang iya katawohan, bangud nga wala ka magbantay sang ginsogo sa imo sang Ginoo.”

15Kag si Samuel nagtindug, kag nagtaklad gikan sa Gilgal pakadto sa Gabaa sang Benjamin. Kag si Saul nag-isip sang katawohan nga nasakpan upud sa iya, mga anum ka gatus ka lalaki.

16Kag si Saul, kag si Jonatan nga iya anak nga lalaki, kag ang katawohan nga nasakpan upud sa ila, nagpabilin sa Geba sang Benjamin; apang ang mga Filistinhon nagpahamtang sing dologan sa Micmas.

17Kag naggowa sa dologan sang mga Filistinhon ang tatlo ka hut-ong nga mga mangangati; ang isa ka hut-ong nagliso sa dalanon pakadto sa Ofra, sa duta sang Sual,

18ang isa ka hut-ong nagliso sa dalanon pakadto sa Bet-horon, kag ang ikatlo ka hut-ong nagliso pakadto sa dalanon sang dulunan nga nagapadulhog sa nalupyakan sang Zeboim nayon sa kamingawan.

19Karon sa bug-os nga duta sang Israel wala sing makita nga manugsalsal; kay ang mga Filistinhon nagsiling, “Basi nga ang mga Hebreo maghimo sa ila kaugalingon sing mga espda ukon mga bangkaw”;

20apang ang tanan nga Israelnon nagdulhog sa mga Filistinhon ang tagsa ka tawo sa pagbaid sang iya punta sang arado, sang iya sadol, sang iya wasay, kag sang iya piko;

21apang may bal-ag sila sa mga piko kag sa mga punta sang arado, kag sa mga kahig nga salsalon kag sa mga wasay kag sa pagpatalum sang mga suntok.

22Gani sa adlaw sang inaway wala sing nakita nga espada ukon bangkaw sa kamut sang bisan sin-o sang mga tawo nga nag-upud kay Saul kag kay Jonatan; apang may iya si Saul kag si Jonatan nga iya anak.

23Kag ang kasoldadosan sang pamakud sang mga Filistinhon naggowa pakadto sa lubluban sang Micmas.

← Chapter 12 Jump to: Chapter 14 →