1 Samuel 30

Ilonggo (Ang Biblia (1982))

← Chapter 29 Jump to: Chapter 31 →

1Karon sang nag-abut si David kag ang iya mga tawo sa Ziklag sa ikatlo nga adlaw, ang mga Amalecnon nagpangati sa Bagatnan kag sa Ziklag. Nalaglag nila ang Ziklag, kag nagsonog sini sa kalayo,

2kag nagdala nga bihag sang mga babayi kag sang tanan nga yara sa iya, tingub ang magamay kag dalagku; wala sila sing ginpatay, kondi ginbihag sila, kag naglakat sila.

3Kag sang si David kag ang iya mga tawo nag-abut sa banwa, nasonog ini sa kalayo, kag ang ila mga asawa kag ang ila mga anak nga lalaki kag ang ila mga anak nga babayi gindala nga bihag.

4Niyan si David kag ang katawohan nga nag-upud sa iya nagbayaw sang ila tingug kag naghibi, tubtub nga wala na sila sing kusug sa paghibi.

5Ang duha ka asawa ni David nga si Ahinoam nga Jezreelnon kag si Abigail nga asawa anay ni Nabal nga Carmelonhon gindala nga bihag.

6Kag si David nagpangalisud sing daku; kay ang katawohan nagpamolong nga batohon nila sia, bangud nga ang kalag sang bug-os nga katawohan nagkalisud, ang tagsa ka tawo tungud sang iya mga anak nga lalaki kag tungud sang iya mga anak nga babayi. Apang si David nagpamag-on sang iya kaugalingon sa Ginoo nga iya Dios.

7Kag si David nagsiling kay Abiatar nga sacerdote, ang anak ni Ahimelec, “Dalha diri sa akon ang efod.” Gani si Abiatar nagdala sang efod kay David.

8Kag si David nagpamangkot sa Ginoo, “Kon maglagas ako sa sini nga pinanong, malambut ko bala sila?” Ang Ginoo nagsabat sa iya, “Lagsa; kay sa pagkamatuud malambut mo kag sa wala sing duhaduha mabawi ang tanan.”

9Gani naglakat si David, sia kag ang anum ka gatus ka lalaki nga nag-upud sa iya, kag nag-abut sa sapa nga Besor, diin magdolog ang mga nabayaan.

10Apang si David naglagas, sia kag ang apat ka gatus ka lalaki; kay nagpabilin ang duha ka gatus, nga tama kalapyo nga indi sila makatabok sang sapa nga Besor.

11Nasapwan nila sa latagon ang Egiptohanon, kag gindala sia kay David; kag ginhatagan sia sing kalan-on kag nagkaon sia, kag ginpainum nila sia sing tubig,

12kag ginhatagan nila sia sing isa ka tipik sang pighol nga higos kag duha ka pungpung nga uvas nga binulad. Kag sang nakakaon sia, nag-uli sa iya ang espiritu niya; kay wala sia makakaon sing kalan-on ukon makainum sing tubig sa tatlo ka adlaw kag tatlo ka gab-i.

13Kag si David nagsiling sa iya, “Sa kay sin-o ka bala natungud? kag taga-diin ka bala?” Nagsiling sia, “Ako pamatan-on sang Egipto, alagad sa Amalecnon; kag ginbayaan ako sang akon agalon bangud nga sang tatlo na ka adlaw karon nagbalatian ako.

14Nangati kami sa Bagatnan sang mga Keretnon kag sa naigo sa Juda kag sa Bagatnan sang Caleb; kag ginsonog namon ang Ziklag sa kalayo.”

15Kag si David nagsiling sa iya, “Dalhon mo bala ako padulhog sa sini nga panong?” Kag sia nagsiling, “Sumpa ka sa akon tungud sa Dios, nga indi mo ako pagpatyon, ukon itugyan ako sa mga kamut sang akon agalon, kag ako magadala sa imo padulhog sa sini nga panong.”

16Kag sang gindala niya sia padulhog, yari karon, nagalapta sila sing hil-ob sa ibabaw sang duta, nga nagakinaon kag nagaininum kag nagasinaut, bangud sang daku nga inagaw nga nakuha nila sa duta sang mga Filistinhon kag sa duta sang Juda.

17Kag gingubat sila ni David kutub sa kasisidmon tubtub sa kagab-ihon sang madason nga adlaw; kag wala sing tawo sa ila nga nakapalagyo, luwas sang apat ka gatus ka mga pamatan-on nga lalaki, nga nagsakay sa mga camelyo kag nagpalagyo.

18Nabawi ni David ang tanan nga naagaw sang mga Amalecnon; kag naluwas ni David ang iya duha ka asawa.

19Wala sing nakulang sa ila, bisan magamay ukon dalagku, mga anak nga lalaki ukon mga anak nga babayi, inagaw ukon ano nga ila nakuha sa ila; ang tanan gindala pabalik ni David.

20Ginkuha ni David ang tanan nga panong kag kabakahan; nga gintabog nila sa una sadto nga iban nga kahayupan, kag nagsiling, “Ini inagaw ni David.”

21Niyan nag-abut si David sa duha ka gatus ka mga lalaki, nga nalapyo sing tama nga indi sila makasonod kay David, nga ginbilin nila man sa sapa nga Besor; kag naggowa sila sa pagsugata kay David kag sa pagsugata sa mga katawohan nga nag-upud sa iya; kag sang nagpalapit si David sa katawohan, gin-abiabi niya sila.

22Niyan nagsabat ang tanan nga malaut kag huroshuros nga mga lalaki nga nag-upud kay David, “Bangud nga wala sila mag-upud sa aton, indi naton sila paghatagan sing bisan ano sang inagaw nga aton nabawi, luwas sa tagsa ka tawo ang iya asawa kag ang iya mga anak, agud nga madala niya sila, kag magtaliwan.”

23Apang si David nagsiling, “Indi kamo maghimo sing subong, mga utud ko, sang ginhatag sa aton sang Ginoo; sia nagtipig sa aton kag nagtugyan sa aton mga kamut sang panong nga nagkari batok sa aton.

24Sin-o bala ang magapamati sa inyo sa sini nga butang? Kay subong sang bahin sang mga nagadulhog sa inaway, amo ang bahin sang nagapabilin sa mga dinala; alangay ang ila bahin.”

25Kag kutub sadto nga adlaw padayon ginhimo niya ini nga palatukuran kag pagsolondan sa Israel tubtub sini nga adlaw.

26Sang nag-abut si David sa Ziklag, nagpadala sia gikan sa inagaw sa mga tigulang sang Juda, sa iya mga abyan, nga nagasiling, “Yari ang dolot sa inyo gikan sa inagaw sa mga kaaway sang Ginoo ”;

27sa mga yara sa Bet-el, sa mga yara sa Ramot sang Bagatnan, sa mga yara sa Jatir,

28sa mga yara sa Aroer, sa mga yara sa Sifmot, sa mga yara sa Estemoa,

29sa mga yara sa Racal, sa mga yara sa mga banwa sang mga Jerameelnon, sa mga yara sa mga banwa sang mga Cinhanon,

30sa mga yara sa Horma, sa mga yara sa Bor-asan, sa mga yara sa Atac,

31sa mga yara sa Hebron, sa tanan nga duug nga didto nagkadto si David kag ang iya mga tawo masami magsayo.

← Chapter 29 Jump to: Chapter 31 →