1 Samuel 22

Ilonggo (Ang Biblia (1982))

← Chapter 21 Jump to: Chapter 23 →

1Nagtaliwan si David didto kag nagdangup sia sa lungib sang Adulam; kag sang pagkabati sini sang iya mga utud kag sang bug-os nga balay sang iya amay, nagdulhog sila sa iya didto.

2Kag nagtipon sa iya ang tagsatagsa nga yara sa kalisud, kag ang tagsatagsa nga nakautang, kag ang tagsatagsa nga yara sa kapaitan sang kalag; kag nanginpangolo sia sa ila. Kag didto upud sa iya may apat ka gatus ka lalaki.

3Kag gikan didto si David nagkadto sa Mizpa sang Moab; kag nagsiling sia sa hari sang Moab, “Ginaampo ko sa imo pakari-a ang akon amay kag ang akon iloy kag mag-upud sa imo, tubtub nga mahibaloan ko kon ano ang buut nga himoon sang Dios sa akon.”

4Kag gindala niya sila sa atubangan sang hari sang Moab, kag nagpuyo sila upud sa iya sa bug-os nga tion nga si David didto sa pamakud.

5Niyan ang manalagna nga si Gad nagsiling kay David, “Dili ka magpuyo sa pamakud; halin ka, kag sulud ka sa duta sang Juda.” Niyan si David nagtaliwan, kag nagsulud sa talon sang Heret.

6Karon si Saul nakabati nga nasapwan si David, kag ang mga lalaki nga nag-upud sa iya. Si Saul nagalingkod sa Gabaa, sa idalum sang kahoy nga tamarisk sa Rama, nga may bangkaw sa iya kamut, kag ang tanan niya nga mga alagad nagatindug sa palibut niya.

7Kag si Saul nagsiling sa iya mga alagad nga nagtindug sa palibut niya, “Pamati karon, kamo nga mga Benjaminhon; hatagan bala sang anak ni Jesse ang tagsa sa inyo sing mga uma kag mga ulubasan, himoon bala niya kamo tanan nga pangolo sang linibo kag pangolo sang ginatus,

8nga tanan kamo naghimbon batok sa akon? Wala sing bisan sin-o nga nagpahayag sa akon sang nagpakigkatipan ang akon anak sa anak ni Jesse, wala sing bisan sin-o sa inyo nga nagakasubo tungud sa akon ukon nagapahayag sa akon nga ang akon anak nagsugyot sang akon alagad batok sa akon, sa pagpuut, subong sang sa sini nga adlaw.”

9Niyan nagsabat si Doeg nga Edomnon, nga nagtindug sa luyo sang mga alagad ni Saul, “Nakita ko ang anak ni Jesse nga nagapakadto sa Nob, kay Ahimelec nga anak ni Ahitub,

10kag sia namangkot sa Ginoo nahanungud sa iya, kag naghatag sa iya sing mga balon, kag naghatag sa iya sang espada ni Goliat nga Filistinhon. ”

11Niyan ang hari nagpadala sa pagtawag kay Ahimelec nga sacerdote, ang anak ni Ahitub, kag ang bug-os nga panimalay sang iya amay, ang mga sacerdote nga yara sa Nob; kag tanan sila nag-abut sa hari.

12Kag si Saul nagsiling, “Pamati karon, ikaw nga anak ni Ahitub.” Kag nagsabat sia, “Yari ako, ginoo ko.”

13Kag si Saul nagsiling sa iya, “Ngaa bala nga naghimbon kamo batok sa akon, ikaw kag ang anak ni Jesse, sa sina nga ginhatagan mo sia sing kalan-on kag espada, kag namangkot nahanungud sa iya sa Dios, agud nga magtindug sia batok sa akon, sa pagpuut, subong sang sa sini nga adlaw?”

14Niyan si Ahimelec nagsabat sa hari, “Kag sin-o bala sa tunga sang tanan mo nga alagad ang matutum subong kay David, nga umagad sang hari, kag ginpasulud sa imo kasapulan, kag dungganon sa imo panimalay?

15Nagsugud ako bala kutub karon nga adlaw sa pagpamangkot tungud sa iya sa Dios? Malayo ini sa akon! Dili magpabangud sa akon ang hari sing bisan ano nga butang sa iya alagad ukon sa bug-os nga panimalay sang akon amay; kay ang imo alagad wala makahibalo sing bisan ano nga butang nahanungud sini tanan, kulang ukon kapin.”

16Kag ang hari nagsiling, “Sa pagkamatuud mapatay ka, Ahimelec, ikaw kag ang bug-os nga panimalay sang imo amay.”

17Kag ang hari nagsiling sa mga manugdalagan nga nagtindug sa palibut niya, “Liso kag patya ang mga sacerdote sang Ginoo; bangud nga ang kamut nila man upud kay David, kag bangud nga nahibaloan nila nga nagpalagyo sia, kag wala magpahayag sini sa akon.” Apang ang mga alagad sang hari dili buut mag-untay sang ila kamut sa pagpatupa sa mga sacerdote sang Ginoo.

18Niyan nagsiling ang hari kay Doeg, “Liso ka kag damhagi ang mga sacerdote.” Kag si Doeg nga Edomnon nagliso kag nagdamhag sa mga sacerdote, kag ginpatay niya sa sadto nga adlaw ang kawaloan kag lima ka tawo nga nagsuklub sang efod nga lino.

19Kag ang Nob, banwa sang mga sacerdote, ginlaglag niya sa sulab sang espada; tingub ang mga lalaki kag ang mga babayi, kabataan kag mga nagasoso, mga kabakahan, mga asno kag mga carnero, sa sulab sang espada.

20Apang ang isa sang mga anak ni Ahimelec nga anak ni Ahitub, nga ginhingalanan Abiatar, nakaluwas kag nagpalagyo sa pagsonod kay David.

21Kag si Abiatar nagsugid kay David nga ginpatay ni Saul ang mga sacerdote sang Ginoo.

22Kag si David nagsiling kay Abiatar, “Ako nakahibalo sadto nga adlaw, sang didto si Doeg nga Edomnon, nga sa pagkamatuud sugiran niya si Saul. Ako ang kabangdanan sang kamatayon sang tanan nga tawo sa panimalay sang imo amay.

23Pabilin ka upud sa akon, dili ka mahadluk; kay ang nagatinguha sang akon kabuhi nagatinguha sang imo kabuhi; kay upud sa akon mabantayan ka sing malig-on.”

← Chapter 21 Jump to: Chapter 23 →