1 Samuel 23

Ilonggo (Ang Biblia (1982))

← Chapter 22 Jump to: Chapter 24 →

1Karon ginsugiran nila si David, “Yari karon, ang mga Filistinhon nagapakig-away sa Ceila, kag ginakawatan ang mga linasan.”

2Busa si David nagpamangkot sa Ginoo, “Maglakat bala ako kag magpatay sini nga mga Filistinhon?” Kag ang Ginoo nagsiling kay David, “Lakat kag patya ang mga Filistinhon kag luwasa ang Ceila.”

3Apang ang mga tawo ni David nagsiling sa iya, “Yari karon, ginahadlukan kami diri sa Juda; daw ano pa gid kon magkadto kami sa Ceila batok sa mga hangaway sang mga Filistinhon?”

4Niyan si David nagpamangkot pa liwat sa Ginoo. Kag ang Ginoo nagsabat sa iya, “Tindug, dulhog sa Ceila; kay itugyan ko ang mga Filistinhon sa imo kamut.”

5Kag si David kag ang iya mga tawo nagkadto sa Ceila, kag nagpakig-away sa mga Filistinhon, kag gindala niya ang ila mga kahayupan, kag ginpatay sila sa daku nga kamatay. Gani ginluwas ni David ang mga pumuluyo sa Ceila.

6Sang si Abiatar nga anak ni Ahimelec nalagyo kay David sa Ceila, nagdulhog sia nga may efod sa iya kamut.

7Karon ginsugid kay Saul nga si David nag-abut sa Ceila. Kag si Saul nagsiling, “Ang Dios nagtugyan sa iya sa akon kamut; kay nakibon sia sa pagsulud sa banwa nga may mga gawang kag mga pintal.”

8Kag gintawag ni Saul ang bug-os nga katawohan sa pag-away, sa pagdulhog sa Ceila, sa pagkibon kay David kag sang iya mga tawo.

9Nakahibalo si David nga si Saul nagapadugi sing malain batok sa iya; kag nagsiling sia kay Abiatar nga sacerdote, “Dalha diri ang efod.”

10Niyan si David nagsiling, “O Ginoo, ang Dios sang Israel, ang imo alagad nakabati sing matuud nga si Saul nagahimulat sa pagkari sa Ceila, sa paglaglag sang banwa tungud sa akon.

11Itugyan bala ako sang mga tawo sang Ceila sa iya mga kamut? Magadulhog bala si Saul, subong sang nabatian sang imo alagad? O Ginoo, ang Dios sang Israel, nagapakilooy ako sa imo, sugiri ang imo alagad.” Kag ang Ginoo nagsiling, “Magadulhog sia.”

12Niyan si David nagsiling, “Itugyan bala ako kag ang akon mga tawo sang mga tawo sang Ceila sa kamut ni Saul?” Kag ang Ginoo nagsiling, “Itugyan ka nila.”

13Niyan si David kag ang iya mga tawo, nga mga anum ka gatus, nagtindug kag nagtaliwan gikan sa Ceila, kag nagkadto sa bisan diin nga sarang nila makadtoan. Sang ginsugid kay Saul nga si David nakapalagyo gikan sa Ceila, wala sia magpadayon.

14Kag si David nagpabilin sa kamingawan sa mga pamakud, kag nagpabilin sa kabakoloran sa kamingawan sang Zif. Kag ginpangita sia ni Saul sa tagsa ka adlaw, apang ang Dios wala magtugyan sa iya sa iya kamut.

15Kag nakita ni David nga si Saul naggowa sa pagtinguha sang iya kabuhi. Si David didto sa kamingawan sang Zif sa kakahoyan.

16Kag si Jonatan, anak ni Saul, nagtindug, kag nagkadto kay David sa kakahoyan, kag nagpabakud sang iya kamut sa Dios.

17Kag nagsiling sia sa iya, “Dili mahadluk; kay ang kamut ni Saul nga akon amay indi makatultul sa imo; ikaw magahari sa ibabaw sang Israel, kag ako magadason sa imo; nasayran man ini ni Saul nga akon amay.”

18Kag sila nga duha nagpakigkatipan sa atubangan sang Ginoo; si David nagpabilin sa kakahoyan, kag si Jonatan nagpauli sa iya balay.

19Niyan nagtaklad ang mga Zifhanon pakadto kay Saul sa Gabaa, nga nagasiling, “Wala bala nagapanago si David upud sa amon sa mga pamakud sa kakahoyan, sa bakolod sang Haquila, nga yara sa bagatnan sang desierto?

20Busa karon, O hari, dulhog, sono sa bug-os nga handum sang imo kalag sa pagdulhog; kag ang amon bahin amo ang pagtugyan sa iya sa kamut sang hari.”

21Kag si Saul nagsiling, “Pinakamaayo kamo sang Ginoo; kay may kaawa kamo sa akon.

22Lakat kamo, palig-ona pa gid ninyo; kilalaha kag tan-awa ang iya duug kon diin ang iya hukmongan, kag kon sin-o ang nakakita sa iya didto; kay ginsugid sa akon nga sia tama gid kamalalangon.

23Busa tan-awa, kag tultula ang tanan nga palanagoan nga mga duug diin sia nagapanago, kag balik kamo liwat sa akon nga may balita nga totoo. Niyan ako magaupud sa inyo; kag kon sia yara sa duta, ako magapangita sa iya sa tunga sang tanan nga linibo sang Juda.”

24Kag nagtindug sila, kag nagkadto sa Zif sing una kay Saul. Karon si David kag ang iya mga tawo yara sa kamingawan sang Maon, sa Araba sa bagatnan sang desierto.

25Kag si Saul kag ang iya mga tawo nagkadto sa pagpangita sa iya. Kag ginsugiran nila si David; busa nagdulhog sia pakadto sa igang kag nagpuyo sa kamingawan sang Maon. Kag sang pagkabati ni Saul, ginlagas niya si David sa kamingawan sang Maon.

26Si Saul nagkadto sa sining kilid sang bukid, kag si David kag ang iya mga tawo sa sadtong kilid sang bukid; kag si David nagdalidali sa pagpalagyo sa kahadluk kay Saul, kay si Saul kag ang iya mga tawo naglikup kay David kag sa iya mga tawo sa pagdakup sa ila,

27sang pag-abut sang manugbalita kay Saul, nagasiling, “Dalidali ka kag magkari; kay ang mga Filistinhon naggubat sang duta.”

28Gani si Saul nagbalik gikan sa paglagas kay David, kag nagkadto batok sa mga Filistinhon; busa ginhingalanan nila yadtong duug Sela-hamalekot.

29Kag si David nagtaklad kutub didto, kag nagpuyo sa mga pamakud sang En-gedi.

← Chapter 22 Jump to: Chapter 24 →