1 Samuel 11

Ilonggo (Ang Biblia (1982))

← Chapter 10 Jump to: Chapter 12 →

1Niyan nagtaklad si Nahas nga Amonhon kag nagpahamtang sing dologan batok sa Jabes-galaad; kag ang tanan nga lalaki sang Jabes nagsiling kay Nahas, “Pakigkatipan ka sa amon, kag kami magaalagad sa imo.”

2Apang si Nahas nga Amonhon nagsiling sa ila, “Sa sini nga kasugtanan magakatipan ako sa inyo, nga ang tanan ninyo nga mata nga too lukaton, kag ibutang ko ini nga kahuluy-an sa bug-os nga Israel.”

3Ang mga tigulang sang Jabes nagsiling sa iya, “Hatagi kami sing pito ka adlaw agud nga makapadala kami sing mga manugbalita sa bug-os nga ginsakpan sang Israel. Niyan, kon wala gid sing bisan sin-o nga magaluwas sa amon, magakadto kami sa imo.”

4Sang nag-abut ang mga manugbalita sa Gabaa ni Saul, ginpamolong ini nga mga polong sa idulungug sang katawohan; kag ang bug-os nga katawohan nagbayaw sang ila tingug kag naghibi.

5Karon si Saul nagpauli gikan sa latagon nga nagasonod sa mga baka; kag si Saul nagsiling, “Ano bala ang ginabatyag sang katawohan, nga nagahibi sila?” Gani ginsugid nila sa iya ang mga polong sang mga lalaki sang Jabes.

6Kag ang Espiritu sang Dios nag-abut sing gamhanan kay Saul sang pagkabati niya sini nga mga polong, kag nagdabdab sing daku ang iya kaakig.

7Nagkuha sia sing isa ka pareha nga baka, kag ginhiwahiwa sila kag ginpadala sila sa bug-os nga ginsakpan sang Israel sa kamut sang mga manugbalita, nga nagasiling, “Ang bisan sin-o nga indi maggowa sa pagsonod kay Saul kag kay Samuel, amo ini ang himoon sa iya mga baka!” Niyan ang kakugmat sa Ginoo naholog sa katawohan, kag nag-abut sila subong sang isa ka tawo.

8Sang gin-isip niya sila sa Bezec, ang mga anak sang Israel tatlo ka gatus ka libo, kag ang mga lalaki sang Juda katloan ka libo.

9Kag nagsiling sila sa mga manugbalita nga nag-abut, “Amo ini ang isiling ninyo sa mga tawo sang Jabes-galaad: ‘Buwas, sa pag-init sang adlaw, may kaluwasan kamo.’” Sang nagkadto ang mga manugbalita kag nagsugid sa mga tawo sang Jabes, nalipay sila.

10Busa ang mga tawo sang Jabes nagsiling, “Buwas magagowa kami pakadto sa inyo, kag himoon ninyo sa amon ang tanan nga ginapakamaayo ninyo.”

11Kag sa madason nga adlaw ginbahinbahin ni Saul ang katawohan sa tatlo ka hut-ong; kag nagsulud sila sa tunga sang dologan sa pagpulaw sang kaagahon, kag ginsamad ang mga Amonhon tubtub sa pag-init sang adlaw; kag ang mga nabilin ginpaaplaag, sa bagay nga wala sing nabilin nga duha sa ila nga tingub.

12Niyan ang katawohan nagsiling kay Samuel, “Sin-o bala ang nagsiling, ‘Magagahum bala si Saul sa aton?’ Dalha ninyo ang mga tawo, agud nga mapatay namon sila.”

13Apang si Saul nagsiling, “Wala sing tawo nga patyon sini nga adlaw, kay karon nga adlaw ang Ginoo naghimo sing pagluwas sa Israel.”

14Niyan si Samuel nagsiling sa katawohan, “Kari kamo, magkadto kita sa Gilgal kag bag-ohon ang ginharian didto.”

15Gani ang tanan nga katawohan nagkadto sa Gilgal, kag didto ginhimo nila si Saul nga hari sa atubangan sang Ginoo sa Gilgal. Didto nagdolot sila sang mga halad-sa-paghidait sa atubangan sang Ginoo, kag didto si Saul kag ang tanan nga katawohan sang Israel nagkalipay sing daku.

← Chapter 10 Jump to: Chapter 12 →