1 Samuel 9

Ilonggo (Ang Biblia (1982))

← Chapter 8 Jump to: Chapter 10 →

1May lalaki sang Benjamin nga ginhingalanan si Cis, anak ni Abiel, anak ni Zeror, anak ni Becorat, anak ni Afia, nga Benjaminhon, gamhanan nga tawo nga isganan;

2kag may anak sia nga lalaki nga ginhingalanan si Saul, pamatan-on kag maayoayo. Sa katawohan sang Israel wala na sing iban nga tawo nga maayoayo pa sa iya; kutub sa iya mga abaga kag pa ibabaw labaw pa sia sa bisan kay sin-o sang katawohan.

3Karon ang mga asno ni Cis, amay ni Saul, nadula. Gani si Cis nagsiling kay Saul nga iya anak, “Dala ka karon upud sa imo sing isa sang mga alagad, kag tindug ka, lakat ka sa pagpangita sang mga asno.”

4Kag sia naglatas sa kabakoloran sang Efraim kag naglatas sa duta sang Salisa, apang wala nila sila makita. Niyan naglatas sila sa duta sang Saalim, apang wala sila didto. Kag naglatas sila sa duta sang mga Benjaminhon, apang wala nila sila makita.

5Sang pag-abut nila sa duta sang Zuf, si Saul nagsiling sa iya alagad nga upud niya, “Kari, mapauli kita, basi nga ang akon amay nag-untat sa pagkabalaka sang mga asno kag maglangkag tungud sa aton.”

6Apang nagsiling sia sa iya, “Yari karon, may tawo sang Dios sa sini nga banwa, kag sia lalaki nga ginatahud; ang tanan nga iya ginasiling nagakahanabu sing matuud. Makadto kita didto; ayhan makasugid sia sa aton nahanungud sang aton dalanon nga ginalaktan ta.”

7Niyan si Saul nagsiling sa iya alagad, “Apang kon makadto kita, ano bala ang dalhon naton sa tawo? Kay naubus na ang kalan-on sa aton mga balunan, kag wala na sing amuma nga dalhon sa tawo sang Dios. Ano bala ang yari sa aton?”

8Nagsabat liwat ang alagad kay Saul, “Yari karon, may akon ako sa akon kamut nga ikap-at nga bahin sang isa ka siclo nga pilak, ina ihatag ko sa tawo sang Dios, sa pagsugid sa aton sang aton dalanon.”

9(Sadto anay sa Israel, kon ang tawo magkadto sa pagpamangkot sa Dios, amo ini ang siling niya, “Kari, kag makadto kita sa manugpanan-aw”; kay ang ginatawag karon nga Manalagna sadto anay gintawag Manugpanan-aw.)

10Niyan si Saul nagsiling sa iya alagad, “Maayo ang imo ginsiling; kari, makadto kita.” Gani nagkadto sila sa banwa diin ang tawo sang Dios.

11Sang nagtaklad sila sang taklaran pa banwa, nakita nila ang mga pamatan-on nga babayi nga nagagowa sa pagsag-ub sing tubig, kag nagsiling sa ila, “Yari bala diri ang manugpanan-aw?”

12Sila nagsabat sa ila, “Yari sia; yari karon, yara sia sa una mo. Dalidali ka karon; kay nag-abut sia karon nga adlaw sa banwa, kay ang katawohan may halad karon nga adlaw sa banwa sa mataas nga duug.

13Sa pagsulud gid ninyo sa banwa, sa gilayon makita ninyo sia, sa wala pa sia magtaklad sa mataas nga duug sa pagkaon; kay ang katawohan indi magkaon tubtub nga sia mag-abut, bangud nga sia ang magapakamaayo sang halad; ugaling nagakaon ang mga inagda. Karon taklad kamo, kay sa sini nga tion makita ninyo sia.”

14Gani nagtaklad sila sa banwa. Sang nag-abut sila sa sulud sang banwa, si Samuel naggowa pakadto sa ila sa pagtaklad sa mataas nga duug.

15Karon ang Ginoo nakapahayag kay Samuel, sa isa ka adlaw sa wala pa mag-abut si Saul:

16“Buwas sa mga amo ini ang tion magapadala ako sa imo sing tawo gikan sa duta sang Benjamin, kag haplason mo sia nga manginprincipe sa akon katawohan nga Israel. Luwason niya ang akon katawohan gikan sa kamut sang mga Filistinhon; kay nagtamud ako sa akon katawohan, bangud nga ang ila pagtuaw naglambut sa akon.”

17Sang nakita ni Samuel si Saul, ang Ginoo nagsiling sa iya, “Yari ang lalaki nga ginpamolong ko sa imo! Ini sia magagahum sa akon katawohan.”

18Niyan nagpalapit si Saul kay Samuel sa gawang, kag nagsiling, “Sugiri ako kon diin ang balay sang manugpanan-aw?”

19Si Samuel nagsabat kay Saul, “Ako ang manugpanan-aw; taklad ka sing una sa akon sa mataas nga duug, kay magakaon kamo karon nga adlaw upud sa akon, kag sa pagkaaga palakton ko ikaw kag magasugid sa imo sang tanan nga yara sa imo tagiposoon.

20Nahanungud sang imo mga asno nga nadula sing tatlo na ka adlaw, dili ka magpalibog sa ila, kay nakita sila. Kag sa kay sin-o bala ang bug-os nga kalaluyagan sa Israel? Indi bala sa imo kag sa bug-os nga panimalay sang imo amay?”

21Si Saul nagsabat, “Indi bala ako Benjaminhon, sa isa sang labi gid kadiotay sang mga kabikahan sang Israel? Kag ang akon panimalay labi gid kakubus sa tanan nga panimalay sang kabikahan ni Benjamin? Ngaa bala niyan nagapamolong ka sa akon sono sa sining bagay?”

22Niyan si Samuel nagdala kay Saul kag sang iya alagad kag ginpasulud sila sa hulut sang inagda kag ginpalingkod sila sa nahauna gid nga duug sa tunga sang mga inagda, nga mga katloan ka tawo.

23Kag si Samuel nagsiling sa manugloto, “Dalha ang bahin nga ginhatag ko sa imo, nga sa sini nagsiling ako sa imo, ‘Paina ini sa imo luyo.’”

24Gani ginhakwat sang manugloto ang paa kag ang yara sa ibabaw niya kag ginbutang ini sa atubangan ni Saul; kag si Samuel nagsiling, “Yari karon, ang gintigana ginabutang sa atubangan mo. Magkaon ka; bangud nga sa tinangdo nga tion gintago ini nga sa imo, agud nga magkaon ka upud sa mga inagda.” Gani si Saul nagkaon sa sadtong adlaw kaupud ni Samuel.

25Kag sang nakadulhog sila sa banwa gikan sa mataas nga duug, naghinun-anon sia upud kay Saul sa atop sang balay.

26Niyan nagbangon sila sing aga pa kag si Samuel nagtawag kay Saul sa atop sang balay, “Tindug ka, agud nga mapalakat ko ikaw.” Gani si Saul nagtindug, kag naggowa sila nga duha sa unhan, sia kag si Samuel.

27Sang nagadulhog sila sa higad sang banwa, nagsiling si Samuel kay Saul, “Paunaha ang alagad sa aton, kag kon nakauna sia, dolog ka anay, agud nga mapabati ko ikaw sang polong sang Dios.”

← Chapter 8 Jump to: Chapter 10 →