1 Samuel 8

Ilonggo (Ang Biblia (1982))

← Chapter 7 Jump to: Chapter 9 →

1Sang tigulang na si Samuel, ginhimo niya ang iya mga anak nga lalaki nga mga hukom sa Israel.

2Ang ngalan sang iya anak nga panganay amo si Joel, kag ang ngalan sang iya ikaduha nga anak, si Abias; mga hukom sila sa Beer-seba.

3Apang ang iya mga anak wala maglakat sa iya mga dalanon, kondi naglipas sa paghingamo sang dimatarung nga daug; kag nagbaton sing mga hamham kag nagpatiko sang katarungan.

4Niyan ang tanan nga tigulang sang Israel nagtipon sing tingub kag nagkadto kay Samuel sa Rama,

5kag nagsiling sila sa iya, “Yari karon, ikaw tigulang na kag ang imo mga anak nga lalaki wala nagalakat sa imo mga dalanon; karon himoi kami sing hari sa paghukom sa amon kaangay sang tanan nga pungsud. ”

6Apang ang butang malaut kay Samuel sang nagsiling sila, “Hatagi kami sing hari nga magahukom sa amon.” Kag si Samuel nagpangamuyo sa Ginoo.

7Kag ang Ginoo nagsiling kay Samuel, “Pamatii ang tingug sang katawohan sa tanan nga ginasiling nila sa imo; kay wala sila magsikway sa imo, kondi nagsikway sila sa akon agud nga indi ako maghari sa ila.

8Sono sa tanan nga binuhatan nga nahimo nila kutub sang adlaw nga ginpataklad ko sila gikan sa Egipto bisan tubtub sini nga adlaw, nga ginbayaan nila ako kag nag-alagad sa iban nga mga dios, amo man ang ginahimo nila sa imo.

9Busa karon, pamatii ang ila tingug; apang paandaman mo sila sing maligdong, kag pakitaan sila sang bagay sang hari nga magagahum sa ila.”

10Gani si Samuel nagsugid sang tanan nga polong sang Ginoo sa katawohan nga nagpangayo sa iya sing hari.

11Nagsiling sia, “Ini amo ang bagay sang hari nga magagahum sa inyo: kuhaon niya ang inyo mga anak nga lalaki kag itangdo sila sa iya nga sa iya mga kangga kag sa iya mga manugkabayo, kag magdalagan sa una sang iya kangga;

12kag itangdo niya sila nga mga pangolo sang linibo kag mga pangolo sang kinalim-an, kag ibutang niya ang iban sa pag-arado sa iya duta kag sa pag-ani sang iya alanyon, kag sa paghimo sang iya mga gamit sa inaway kag sa mga gamit sang iya mga kangga.

13Kuhaon niya ang inyo mga anak nga babayi nga manginmanugpahumut kag mga manugloto kag mga manugtinapay.

14Kuhaon niya ang inyo mga uma kag ang inyo mga ulubasan kag ang inyo mga katamnan sang olivo bisan ang labi gid kaayo sa ila kag ihatag sila sa iya mga alagad.

15Kuhaon niya ang ikapulo sang inyo binhi kag sang inyo mga ulubasan kag ihatag sa iya mga eunuco kag sa iya mga alagad.

16Kuhaon niya ang inyo mga alagad nga lalaki kag ang inyo mga ulipon nga babayi, kag ang inyo ali nga mga pamatan-on nga lalaki kag ang inyo mga asno, kag ibutang sila sa iya pangabudlayan.

17Kuhaon niya ang ikapulo sang inyo mga panong, kag mangin-iya alagad kamo.

18Kag magatuaw kamo sa sadto nga adlaw bangud sang inyo hari, nga inyo ginpili sa inyo; apang ang Ginoo indi magsabat sa inyo sa sadto nga adlaw.”

19Apang ang katawohan nagdumili sa pagpamati sang tingug ni Samuel; kag nagsiling sila, “Indi! kondi buut kami nga may hari sa ibabaw namon,

20agud nga kami manginkaangay man sa tanan nga pungsud, kag nga ang amon hari maghukom sa amon kag maggowa sa una namon kag mag-away sang amon mga inaway.”

21Kag ginpamatian ni Samuel ang tanan nga polong sang katawohan, kag ginsulit niya sila sa idulungug sang Ginoo.

22Kag ang Ginoo nagsiling kay Samuel, “Pamatii ang ila tingug, kag himoi sila sing hari.” Niyan si Samuel nagsiling sa mga tawo sa Israel, “Magpauli ang tagsa ka tawo sa iya banwa.”

← Chapter 7 Jump to: Chapter 9 →